Plötuumsögn

 

Titill:  Cover Up

Flytjandi:  Ministry

Einkunn: **** (af 5)

  Bandaríska hljómsveitin Ministry hefur í áratugi verið í fararbroddi svokallaðra "industrial"  þungarokkssveita.  Ég veit ekki hvaða íslenskt orð er best að nota yfir "industrial".  Það er óheppilegt að kalla þetta iðnaðarrokk vegna þess að hérlendis höfum við í áratugi notað orðið iðnaðarrokk yfir músík hljómsveita á borð við Journey,  Styx, REO Speedwagon,  Boston,  Toto,  Foreigner og slíkra.  Enskumælandi kalla músík þeirra "arena rock",  melódískt hard rock eða "US Faceless rock". 

  "Industrial" þungarokkið er allt annað.  Það einkennist af hljóðvegg sem svipar til hávaða á iðnaðarsvæði þar sem menn eru að saga,  negla,  fræsa og öðrum drunum og sargi. 

 

  Á þessari nýjustu plötu Ministry kráka (covera) Al Jourgensen og félagar uppáhaldslögin sín.

  Stærsta vandamálið við svona krákuplötur er að þar eru tekin fyrir lög sem notið hafa vinsælda vegna vel heppnaðs flutnings höfundanna.  Þegar reynt er að fylgja frumútgáfunni verður útkoman sjaldnast betri en þokkaleg karókí-útfærsla.  Ef farin er önnur og ólíkari leið er hætta á því að "sjarmi" frumútgáfunnar skili sér ekki því hann liggur jafnan í útsetningunni.

 

  Ministry fara bil beggja.  Al og félagar halda í flestum tilfellum tryggð við frumútgáfuna en bæta við "industrial" sérkenni sínu. Í fyrstu lögum plötunnar þykir mér Ministry halda sig um of við frumútgáfurnar:  "Under My Thumb" (Rolling Stones),  "Bang a Gang" (T. Rex.  Enskt glam-rokk dúó sem mér þótti/þykir afskaplega leiðinlegt.  Leiðinlegt lag og lítið skemmtilegra með Ministry),  "Radar Love" (hollenska Golden Erring) og "Space Truckin´" (Deep Purple).

  Platan fer á gott skrið með "Black Betty" (Leadbelly).  Þar er auðheyranlega tekið mið af flottum flutningi Ram Jam á laginu (sem heyra má meðal annars á plötunni "Rokkland 2007").  Næstu lög eru líka flott:  "Mississippi Queen"  (Mountain),  "Just Got Paid" (ZZ Top),  "Roadhouse Blues"  (Doors) og "Supernaut" (Black Sabbath).

  Toppurinn eru tvö síðustu lögin:  "Lay Lady Lay" (Bob Dylan) og "What a Wonderful World" (þekktast í flutningi Louis Armstrongs og Páls Óskars).  "Lay Lady Lay" er tekið af gamalli plötu með Ministry.  Hljómurinn í því lagi er allur "hreinni" og "grynnri" en á öðrum lögum plötunnar.  En aldeilis frábær flutningur. 

  "What a Wonderful World" hefst á rólegum nótum en skiptir síðan yfir í góðan og harðan rokksprett. Svipar á þann hátt til "My Way" í flutningi Sids Vicious og Nínu Hagen og "Lily Marlene" með Das Kapital.

 

  Verra er að "falin" aukalög á plötunni eru tvær útgáfur af þessu lagi.  Sú fyrri er rólega útgáfan.  Sú seinni er harða rokkútgáfan.  Þessum tveimur aukalögum er illa ofaukið.  Lagið er flott eins og það er sem lokalag plötunnar. 

  Það er til önnur útgáfa af plötunni sem ég á ekki.  Hún inniheldur Bítlalagið "She´s So Heavy",  óð Johns Lennons til Yokoar Ono.  Ég hefði gjarnan viljað eiga plötuna með því magnaða lagi,  einu því besta frá Bítlunum og ég get alveg heyrt fyrir mér að Ministry afgreiði það með stæl. 

  Ministry er fyrst og fremst Al Jourgensen,  flóttamaður frá Kúbu.  Framan af var Ministry fullskipuð hljómsveit en í áranna rás hefur flísast úr henni.  Al hefur lengi verið djúpt sokkinn í eiturlyfjaneyslu.  Dópið hefur þó ekki svo merkt verði komið niður á músíksköpun hans.  Andúð hans á Brúski forseta hefur sömuleiðis veitt honum mikinn innblástur á fyrr plötum Ministry. 

  Á þessari plötu er Ministry fyrst og fremst Al í slagtogi við liðsmenn frægra hljómsveita á borð við Fear Factory,  Revolting Cocks,  Prong o.fl.

  Ég gef fyrri hluta plötunnar 3 stjörnur og seinni hlutanum 5 stjörnur. 

Athugasemdir

[Magnús Axelsson, 30.6.2008 kl. 10:40]

Kráka? Það tók mig dágóða stund að átta mig á hvað það þýddi, en hvaðan kemur þetta? Ég varð svo hvumsa að sjá þetta orð að ég hætti að lesa dóminn og veit núna akkúra ekkert um plötuna.

Annars á ég ágæta plötu með Ministry sem heitir "The mind is a terrible thing to taste", þrusufínn gripur. Hef hinsvegar ekkert nennt að fylgjast með bandinu að öðru leiti.

[Óskar P. Einarsson (IP-tala skráð) 30.6.2008 kl. 15:52]

Já, þetta var fremur skammlíf tónlistarstefna (man t.d. einhver eftir 'jungle' tekknói, sem tröllreið öllu á Uxa '95?). Þetta industrial varð aðallega að einhverju tölvutrommuheila- og samplerastöffi. Þar fundust mér "The Young Gods" alltaf vera fremstir meðal jafningja, einkum þegar þeir sungu ennþá á frönsku.

Mér hefur alltaf fundist Einstürzende Neubauten vera hið eina sanna 'industrial' band, fyrstu árin var í ALVÖRU verið að framleiða "...hávaða á iðnaðarsvæði þar sem menn eru að saga,  negla,  fræsa..".

[Magnús Axelsson, 30.6.2008 kl. 16:04]

Man einhver eftir bandinu Mental Hackers sem spilaði hérna á Casablanca á skúlagötunni, í kringum 1989? Það voru hressir industrial gaurar, lemjandi á járnarusl. Guðlaugur Kristinsson lék á gítar með þeim og maður var logandi hræddur um að fá gítarinn í hausinn, slíkur var hamagangurinn. Það væri nú gaman að grafa upp einhverja músík með þeim félögum.

[Jesús Kristur (IP-tala skráð) 30.6.2008 kl. 21:58]

ég held að "iðnaðarrokk" sé þýðing á "corporate rock". Sel það þó ekki dýrara. Industrial tónlist er mér mjög að skapi enda er ég einmitt með lag með téðri Ministry í spilaranum á síðunni minni.

[Jens Guð, 30.6.2008 kl. 23:18]

  Magnús,  fyrir margt löngu óskaði ég eftir tillögum um íslenskt orð yfir "cover" lög og sögnina að "covera" lög eftir aðra.  Af mörgum góðum tillögum hugnast mér best tillaga Steina Briem um sögnina að kráka lög. 

  Fyrir það fyrsta hljóma orðin "covera" og kráka líkt.  Í öðru lagi vísar orðið kráka til eftirhermu,  samanber hermikráka,  án þess að ganga alla leið.  Í þriðja lagi er kráka létt og þægilegt 2ja atkvæða orð sem mér og kunningjum mínum varð fljótt tamt á tungu. 

  Önnur orð sem notuð hafa verið standa kráku að baki.  Til að mynda orðin tökulag,  ábreiða og motta.  Þar vantar sagnorðin yfir gjörninginn.   

  Ég man ekki eftir Mental Hackers.  Miðað við ártalið var ég sennilega í Bandaríkjunum þegar þeir spiluðu hér.

  Óskar,  "industrial" rokkið lifir góðu lífi.  Plötur með Ministry og Nine Inch Nails seljast í milljóna upplögum og margfaldsinnum betur en plötur eldri "industrial" hljómsveita.  Ministry hefur að minnsta kosti í tvígang verið tilnefnd til Grammy verðlauna.  Án þess að ég beinlínis muni eftir því þá er ég viss um að NIN hafi einnig verið tilnefnd.

  Áður var "industrial" nokkurskonar neðanjarðarhreyfing.  Breskar hljómsveitir eins og Cabaret Voltaire, Throbbing Gristle og NON ásamt sænsku hljómsveitinni The Leather Nun voru í hávegum hafðar þegar ég rak pönk-plötubúðina Stuð á níunda áratugnum. 

  Síðan komu Test Department frá Englandi,  Laibach frá Júgóslavíu, The Young Gods frá Sviss og Enstürzende Neubauten frá Þýskalandi.  Ég tók þátt í að setja upp hljómleika hérlendis með Enstürzende Neubauten.  Fyrsta verk hljómsveitarinnar eftir að hafa lent hér var að fara upp á hauga og tína saman járnrusl til að nota á hljómleikunum.  Dópneysla á liðinu var áberandi.

  Þessar hljómsveitir eru allar í uppáhaldi hjá mér.  Ekki síst þær síðastnefndu. 

  Jesú,  gaman að heyra að þú sért með Ministry í spilaranum.  Ég þarf að tékka á síðunni þinni og hlusta á einn góðan Ministry slagara.

[Jesús Kristur (IP-tala skráð) 1.7.2008 kl. 11:56]

Ekki gleyma nokkurs konar guðföður Industrial tónlistar....J.G. Thirlwell A.K.A. Foetus.

Þetta lag er það næsta sem hann hefur komist "slagara":

http://www.mbl.is/mm/folk/frettir/2008/07/01/dilbert_kvedur/

Þú nefndir hljómsveitina Revolting Cocks. Mér gæti skjátlast en er það ekki basically sama hljómsveitin og Ministry ?

Á svipaðan hátt og Nomeansno og Hanson Brothers er sama hljómsveitin. Og Sonic Youth og Ciccone Youth.

[Jesús Kristur (IP-tala skráð) 1.7.2008 kl. 11:56]

Piff

Rangur linkur á Foetus slagarann í síðustu færslu, hérna er sá rétti:

http://www.youtube.com/watch?v=2PA_49DGLBU

[Jens Guð, 1.7.2008 kl. 13:03]

  Revolting Cocks og Ministry eru ekki sama hljómsveitin.  Ekki fremur en að þessar hljómsveitir séu þær sömu og Lard.  Al er að vísu í þeim öllum.  En RC stofnaði hann með Van Acker og einum sem ég man ekki hvað heitir en var í Front 242.  Yfirlýst markmið með RC var að spila dansvæna músík.  Í áranna rás hafa sumir sömu hljóðfæraleikarar spilað með öllum hljómsveitunum eða sitt á hvað.  Og einnig með enn öðrum hljómsveitum Als.  Í dag er Ministry eiginlega bara Al. 

[Jesús Kristur (IP-tala skráð) 1.7.2008 kl. 13:10]

Ókei gott að fá þetta á hreint. Ég var einmitt einnig haldinn þeirri ranghugmynd að Lard væri bara Ministry að viðbættum Jello Biafra. I stand corrected.