Ólík sjónarmið leiða til árekstra

11.8.2008 | 23:29

Ólík sjónarmið leiða til árekstra

Tveir vinir mínir hafa mjög ólík sjónarmið til margra hluta. Eitt sinn voru þeir vinir. Núna eru þeir óvinir. Vegna ólíkra sjónarmiða. Ég breyti nöfnum þeirra í þessari frásögn. Ég veit ekki hvers vegna.

Gulli starfaði lengi sem sendibílstjóri í forföllum leyfishafans sem átti bílinn. Þegar leyfishafinn kom aftur til starfa hóf Gulli sjálfstæðan rekstur af allt öðru tagi.

Eins og algengt er með nýhafinn rekstur fór öll innkoma í útgjöld. Gulli var því ansi blankur. Hann tapaði íbúð sem hann leigði en fékk inni hjá Pétri vini sínum. Pétur rekur fyrirtæki á Selfossi og er þar meira og minna. Íbúð hans er mannlaus flesta daga.

Um það samdist að Gulli tæki íbúð Péturs á leigu en Pétur fengi þó að gista þar í þau fáu skipti sem hann væri í Reykjavík.

Þegar Gulli ætlaði að flytja inn í íbúðina bað hann Pétur um að fá sendibíl hans lánaðan í nokkra daga. Pétur sá engin vandkvæði á því. Gulli yrði þó að skutla sér á Selfoss morguninn eftir. Hann myndi hinsvegar sjálfur redda sér fari í bæinn þegar þar að kæmi. Gulli gæti verið með bílinn þangað til.

Þetta gekk eftir. Gulli settist undir stýri "til að venjast bílnum" sem var nokkuð stærri en bíllinn sem hann hafði ekið á sendibílastöðinni. Það hentaði Pétri líka að Gulli keyrði því það þurfti að afgreiða nokkur símtöl á leiðinni austur fyrir fjall.

Er þeir renna í hlaðið fyrir utan fyrirtæki Péturs segir Gulli ákveðinn: "Þetta eru 7000 krónur."

Pétur skildi ekki hvað hann var að meina og hváði. Gulli endurtók: "Skutlið hingað kostar 7000 kall."

Pétur varð alveg ringlaður og sagði: "Bíddu við, þetta er minn bíll sem ég er að lána þér..."

Þegar hér var komið sögu snöggfauk í Gulla og hann hrópaði: "Það skiptir engu máli hver á bílinn. Hellingur af leigubílstjórum og sendibílstjórum á ekki bílinn sem þeir aka. Og það skiptir engu andskotans máli. Taxtinn fyrir skutl til Selfoss er 7000 kall og vertu ekki að búa til eitthvað vesen. Komdu með 7000 kallinn og ekkert rugl."

Pétur var ennþá ringlaður og honum var brugðið við æsinginn í Gulla. Eiginlega ósjálfrátt kippti hann 7000 kalli upp úr vasa sínum, þeytti honum í Gulla, stökk um leið út úr bílnum og sagði: "Verði þér kærlega að góðu!"

Pétur var afar ósáttur þegar hann sagði mér söguna. Ég spurði Gulla út í málið. Hann svaraði með þunga og mjög hneykslaður: "Pétur er svo heimskur að hann fattar ekki að sendibílstjóri undir stýri er að vinna. Það kemur málinu ekkert við hver á bílinn. Ég eyddi næstum 2 tímum í að skutlast með manninn austur. Ég stóð í flutningum og hafði nóg annað við þennan tíma að gera."

Flokkur: Ferðalög | Breytt s.d. kl. 23:45 | Facebook

Athugasemdir

Hehehe ótrúlegt nóg til að skrítnu fólki.

Kveðja Skattborgari

Skattborgari, 11.8.2008 kl. 23:32

Skemmtilegur maður hann Gulli, og örugglega fjallmyndarlegur líka..

Gulli litli, 11.8.2008 kl. 23:33

Skattborgari, þessir menn eru ekki skrítnir. Þeir eru frábærir báðir tveir en með ólík sjónarmið. Ég held mikið upp á þá báða.

Gulli litli, þessi Gulli í sögunni er vissulega fjallmyndarlegur. Stórt og mikið vöðvafjall. Og bráðskemmtilegur eins og sagan vitnar um. Hann stendur fast á sínu og endar setningar oft á niðurlaginu: "Og ekkert andskotans rugl neitt með það!"

Jens Guð, 11.8.2008 kl. 23:52

Og er þar með öll SAGAN sögð?

Magnús Geir Guðmundsson, 11.8.2008 kl. 23:59

Jens ef þessi maður með taxtann og skutlið er til þá er ég stokkin í hafið.

Jenný Anna Baldursdóttir, 12.8.2008 kl. 00:05

Hannes er sérleyfishafi,
og Hólmsteinn, ekki vafi,
hann á réttinn,
hann fer rétt inn,
og stelpurnar falla í stafi.

Þorsteinn Briem, 12.8.2008 kl. 00:28

Þetta er nú örsaga hin furðulegasta. Ég vona að þú vinnir ekki við tölvu svo ég neyðist nú ekki til að senda þér einhverja þúsara...

...désú (IP-tala skráð) 12.8.2008 kl. 00:53

Steini: "I liked how you rhymed homer with Homer." Kannski ekki erfitt að geta sér til úr hvaða þætti þetta er ;)

Gunnar Hrafn Jónsson (IP-tala skráð) 12.8.2008 kl. 00:53

Hressandi saga:-)

Gunnar Pálsson, 12.8.2008 kl. 01:06

Maggi, sagan er ekki öll sögð. Gulli borgaði aldrei húsaleigu hjá Pétri. Þegar Pétur gekk eftir húsaleigunni reiddist Gulli mjög og benti honum á að öllum hafi verið kunnugt um að hann var ekki með tekjur og það hafði ekkert breyst. Það í bland við rukkunina á akstrinum leiddi til vinslita. Gulli meira að segja lamdi Pétur til að leggja áherslu á að hann var ósáttur við skilningsleysi Péturs.

Jenný, sagan er sönn. En plís ekki stökkva í hafið. Ég verð að hafa bloggið þitt inni í daglegum bloggrúnti mínum.

Steini, takk fyrir limruna.

Desú, ég vinn ekki við tölvu og kann ekkert á tölvur.

Gunnar Hrafn, Steini er meistari í rími.

Gunnar Pálsson, takk fyrir innlitið.

Jens Guð, 12.8.2008 kl. 01:32

Gunnar Hrafn, þú stendur þig vel í sjónvarpsfréttunum, enda þótt þú farir huldu höfði. Ég er ánægður með þig.

Þorsteinn Briem, 12.8.2008 kl. 01:44

Skemmtileg saga

Jóna Kolbrún Garðarsdóttir, 12.8.2008 kl. 01:58

Steini: án þess að ég vilji "hijacka" þessu spjalli þakka ég hólið og bendi á að ég var (viljandi stutt) í mynd í fyrstu frétt á laugardaginn þegar ég talaði við rússneska sendiherrann og aftur stutt í dag þegar ég talaði við ráðgjafa Baracks Obama. Skrítið hvað maður er alltaf ljótur á myndum og í speglum...