Plötuumsögn

 - Titill:  Spegill sálarinnar - Open Your Eyes

 - Flytjandi:  Herbert Guðmundsson

 - Útgefandi:  HG hljómplötur

 - Einkunn:  **** (af 5)

  Yngra fólk þekkir Hebba fyrst og fremst af laginu sívinsæla  Can´t Walk Away  frá 1985.  Farsæll tónlistarferill hans nær þó aftur til upphafs áttunda áratugarins.  Þá söng hann í vinsælum rokkhljómsveitum.  Hæst báru Eik og Pelican. 

  Spegill sálarinnar er áttunda sólóplata Hebba.  Upphafslagið,  Colours of Dreaming,  byrjar líkt og píanóballaðan  Mother  með John Lennon.  Áður en fyrsta erindi lýkur er skipt yfir í hraðari og léttari takt.  Þannig heldur lagið áfram að skiptast í mishraða kafla.  Sem minnir á fortíð Hebba í framsækna rokkinu (progressive).  Taktskiptingarnar túlka líka þær breytingar sem orðið hafa í lífi hans á árinu.  Hann hefur sagt skilið við vímuefni og tóbak og tekið kristna trú.

  Í eðlilegu framhaldi af þessu eru tvö næstu lög,  Day of Freedom  og  Magic Feeling,  fagnaðarsöngvar (gospel) með tilheyrandi kór félaga úr Gospelkór Fíladelfíu og björtum bakröddum Magnúsar og Jóhanns ásamt Hebba sjálfs.  Falleg lög með mögnuðum "sing-a-long" viðlögum.

  Hebbi býður áfram upp á öflugar ballöður með grípandi viðlagi og snyrtilega útfærðum bakröddum en hvílir Gospelkórinn í lögum númer 4 og 5.  Kórinn dúkkar aftur upp í lagi númer 6 og tveimur lögum til viðbótar. 

  Það er góð ákvörðun að nota Gospelkórinn aðeins til spari á þennan hátt.  Kórinn "stækkar" lögin sem hann er í og gefur plötunni flottan heildarsvip.  Meiri notkun á kórnum hefði hinsvegar orðið þrúgandi.

  Besta lag plötunnar,  Open Your Eyes,  er plássfrekt.  Það er flutt í tveimur hlutum sem samtals telja 12 mínútur.  Lagið er mergjað og þolir hið besta þennan mínútufjölda.  Er líður á lagið fara teygðir gítartónar að setja seyðandi blæ á og minnir þá örlítið á  Heroes  með David Bowie.

  Í kjölfar fyrri hluta  Open Your Eyes  stekkur Hebbi í hressilegan rokkgír í næstu tveimur lögum,  Garden Above  og  God is Real.  Í síðarnefnda laginu kemur gítarsnillingurinn Þorsteinn Magnússon (Steini í Eik) við sögu og rífur kröftuglega í.  Hann spilar einnig í tveimur öðrum lögum.  Jón Elvar Hafsteinsson afgreiðir að uppistöðu til annað gítarspil.  Það gerir hann með stæl.  Þetta er töluverð gítarplata.  Annar hljóðfæraleikur er allur hinn fínasti. 

  Eitt lag er án söngs (instrumental),  His Grace.  Ljúf en ágeng ballaða. 

  Upphaflega ætlaði Hebbi að syngja stóran hluta plötunnar á íslensku.  Eftir að hafa mátað texta á íslensku við nokkur lög hvarf hann frá því.  Aðeins lokalag plötunnar,  merkt sem aukalag,  er með texta á íslensku. 

  Öfugt við flesta aðra Íslendinga sem semja söngtexta á ensku þá hljóma textar Hebba vel og eðlilega. 

  Hljómur plötunnar er hreinn og bjartur og heildarsvipurinn sterkur.  Þetta er besta plata Hebba til þessa. 

Athugasemdir

[Gunnar Helgi Eysteinsson, 7.12.2008 kl. 23:41]

Ég var í Lækjarskóla og kennarinn minn í samfélagsfræði var Valgeir (úr stuðmönnum) - Það voru tónleikar með Stuðmönnum í skólanum og Herbert Guðmundsson hitaði upp... eða reyndi. Hann var púaður af sviðinu af nemendunum og ég man að mér fannst það sorglegt, því mér finnst hann vera #!!&% góður.

[Sverrir Einarsson, 8.12.2008 kl. 03:57]

Nú verður allt vittlaust hér þegar ég set þetta á prent en MÉR finnst tónlist HG leiðinleg, ég tek fram að ég hef ekki heyrt neitt lag (ekki svo ég viti) þessum diski og get því ekki sagt neitt um hann annað en það að ég ber mig ekki eftir honum (labba frekar í hina áttina þar sem hann er á boðstólnum) ef þú skilur hvað ég á við.

En Jens mikið verð ég feginn þegar jólin verða búin og hægt að finna eitthvað af viti á blogginu þínu aftur.

Góða skemmtun fram að jólum, ég hætti ekkert að kíkja hér inn reglulega, verð bara sneggri út en vanalega.

Þarf ég nokkuð að taka fram að mér leiðast auglýsingar hehe.

[Steinn Skaptason (IP-tala skráð) 8.12.2008 kl. 04:05]

Þess má geta að lagið Day of freedom er ekki nýtt eins og mig minnir að Herbert hafi gefið í skyn í viðtali. Þetta gamla og mjög góða lag var upphaflega með hljómsveitinni Sólskin sem Herbert var meðlimur í árin 1973 - 1974. Lagið var upphaflega gefið út á samansafnshljómplötunni Hrif sem Ámundi Ámundason, ÁÁ Records gaf út árið 1974, flytjandi var hljómsveitin Sólskin, einnig átti hljómsveitin annað gott lag sem hét Let it go. Þessi lög hafa aldrei verið endurútgefin í upphaflegri útgáfu. Mér finnst ástæða til þess að endurútgefa þessi lög í upphaflegri útgáfu, eins og svo margt annað gamalt og gott íslenskt efni.  

[Dunni, 8.12.2008 kl. 06:53]

Gott að heyra að Hebbi er í fullu fjöri og enn betra að heyra að hann skuli vera komnin með áheyrilegan disk nú.  Þann var ekki að finna þegar ég var á skerinu í nóvember.

Tónsmíðar Hebba eru æði misjafnar, bæði af gerð og gæðum en þegar hann nær sér á strik er hann virkilega góður. Ég hef alltaf verið hrifinn að laginu hans "After The Storm". Það er kannski vegna þess að mér gegnur tiltölulega hægt að þroskast upp úr þungarokkinu. En kemst þó hægt fari. Einhverntíman.

Annars finnst mér sjálfsagt að geta þess að Hebbi hefur getið sér gott orð fyrir fleira en að semja og syngja tónlist.  Hebbi er afbragðs kokkur og var afar vinsæll af skipsfélögum sínum á Sighvati GK vetrarvertíðina 1984.  Þann vetur bar Sighvatur að landi verðmætasta afla vertíðarbáta landsins og þá má ekki vanmeta mikilvægi kokksins sem ber góðan og kjarnmikinn mat á borð fyrir jaxlana á dekkinu og ekki skemmir fyrir þegar kokkurinn er líka léttur í lundu og tekur lagið fyrir félagana af og til

Óska Hebba hjartanlega til hamingju með plötuna og ég veit að ég get líka gert það fyrir hönd gamla skipstjórans hans, Erling, líka.  Hann hafði mætur á kokkinum sínum.

Jenni!   Gerðu svo meira af því að blogga um músikk.

[sandkassi (IP-tala skráð) 8.12.2008 kl. 09:38]

Þakka þér fyrir þessa umfjöllun Jens, ég segi eins og áður að þarna ertu á heimavelli. Hebbi er frábær músikant og á eins og þú bentir á þá eru hans rætur í progressive músik. Þetta hljómar eins og eitthvað sem ég væri til í að tékka á.

kærar þakkir

g

[Bubbi J. (IP-tala skráð) 8.12.2008 kl. 22:27]

Sammála, þetta er hans besta plata