Færeyskar konur pissa standandi

  Nú eru stóru hljómleikahátíðirnar að ganga í garð í Færeyjum,  hver á fætur annarri (sjá örlítið eldri færslu).  Áberandi er á þessum hátíðum að það eru yfirleitt ekki biðraðir við salernin.  Ein ástæðan er sú að færeyskar konur pissa standandi á svona hátíðum.  Þær nota sérhannaðar pappírstrektir.  Mjög einfaldar, auðveldar og hreinlegar í umgengni.  Konur fara jafnvel að pissuskálum karla ef traffík er rólegri þar vegna þess að þær þurfa ekki að girða niðrum sig. 

  Ég veit ekki til þess að þessar pappírstrektir séu í umferð hérlendis.  En vegna vinsælda þeirra í Færeyjum mun hópur færeyskra stelpna dreifa trektunum á Hróarskeldu í Danmörku í sumar.

  Ef smellt er á myndirnar þá stækka þær og verða skýrari.

Gott ráð

  Fallhlífastökk nýtur vaxandi vinsælda.  Stundum verða óhöpp.  Fallhlífar opnast ekki.  Það sem gerist þegar manneskja fellur úr mikilli hæð er að hún skellur á jörðina og hendist aftur upp í loftið,   eins og bolti.  Við það að skella á jörðina brotna flest bein líkamans.  Þegar manneskjan hendist aftur upp í loftið skaða brotnu beinin líffærin það mikið að viðkomandi deyr.  Við þessar aðstæður er til gott ráð:  Það er að hafa snör handtök,  ná taki á grasi eða föstum steini um leið og skollið er á jörðina.  Ríghalda sér til skoppa ekki upp aftur.  Liggja síðan hreyfingarlaus þangað til hjálp berst.  Prófið.