Hljómleikaumsögn

- Yfirskrift:  Af fingrum fram

- Gestgjafi:  Jón Ólafsson

- Gestur:  Eivör

- Staður:  Salurinn í Kópavogi

- Einkunn:  ***** (af 5)

.

  Margir muna eftir sjónvarpsþáttum Jóns Ólafssonar,  Af fingrum fram.  Þar fékk hann þekkta tónlistarmenn í spjall;  fór yfir tónlistarferil þeirra,  æsku,  uppruna og fleira.  Sýnishorn af ferlinum voru dregin fram og þættinum lauk á því að gesturinn tók lagið við píanóundirleik Jóns.

  Þættirnir voru skemmtilegir og nutu vinsælda.  Það var vel til fundið hjá Jóni að hafa framhald á og færa þá á svið í Salnum í Kópavogi.  Sjónvarpsformið var í knappasta lagi.  Rösklega hálfs þriðja klukkutíma dagskrá (með stuttu hlé) í Salnum gerir viðfangsefninu miklu betri skil.

  Eivör og Jón fluttu 19 lög,  studd dyggilega af bassaleikaranum Robba frá Húsavík (ég held að hann heiti Róbert Þórólfsson).  Þá eru meðtalin sýnishorn af fyrsta lagi sem Jón samdi og fyrsta lagi sem Eivör samdi.  Eivör var treg til að flytja sitt fyrsta frumsamda lag en Jón beitti þrýstingi með því að spila sitt fyrsta frumsamda lag.  Upprifjun á þessum bernskubrekum vakti kátínu.

  Á milli laga ræddi Jón við Eivöru um upphaf ferils hennar og tilurð söngva hennar.  Í fyrri hluta hljómleikanna var meira spjallað og músíkin djassaðri.  Í seinni hlutanum var músíkin þjóðlagakenndari. 

  Jón er orðheppinn og fyndinn.  Hann nær að skapa  heimilislegt,  létt og afslappað andrúmsloft.  Hann spilar stemmninguna af fingrum fram.

  Flestöll viðtöl sem Eivör hefur afgreitt í íslensku sjónvarpi,  útvarpi og fjölmiðlum hafa verið frekar formleg og alvörugefin.  Eivör er hinsvegar mikill fjörkálfur og grallari í eðli sínu.  Jón náði að laða þá hlið hennar fram.  Hún fór meira að segja út á þann hála ís að þýða dónaleg færeysk orð yfir á íslensku og öfugt.  Það var allt snyrtilega innan siðferðismarka.  Húmoristinn Jón náði að búa til góða brandara úr því.  Það var mikið hlegið og allir skemmtu sér konunglega.

  Til viðbótar við kunn lög frá ferli Eivarar flutti hún tvö lög af væntanlegri plötu.  Þar af annað gullfallegt og grípandi til minningar um föður sinn sem féll frá fyrir rösku ári síðan.

  Eivör er besta söngkona heims.  Frábær tónlistarmaður.  Lögin voru misvel æfð hjá tríóinu.  Jafnvel óæfð.  Það átti sinn þátt í því hvað stemmningin var heimilisleg. 

  Þessir hljómleikar voru frábær skemmtun.  Það var uppselt á þá nánast um leið og þeir voru settir á dagskrá.  Troðið út úr dyrum.  Sem gefur vonir um að Eivör verði aftur á dagskrá  Af fingrum fram  næsta vetur. 

  Lítill fugl hvíslaði að mér að tæknimenn frá rás 2 hafi verið á staðnum og hljóðritað hljómleikana.  Vonandi er það rétt.  Svona konfekt á að varðveita.      

 

 

 

   

Athugasemdir

[Sólrún (IP-tala skráð) 24.2.2012 kl. 14:00]

Þeta er það magnaðasta

Vonandi hefur verið séð um að þessi fjársjóður glatist ekki og allt hafi veri tekið upp.Það gerist ekki betra

og mér finnst að það hefði átt að sýna þetta í Færeyjum

þó að geti eftilvill verið dálítið snúið að texta brandarana hans Jóns þeir eru svo hárfínir :)

[Sólrún (IP-tala skráð) 24.2.2012 kl. 14:08]

Afsakaðu málvilluna eg átti við að mér finndist alveg nauðsynlegt að Færeyingum verði gefinn kostur á að sjá sína konu brillera.

Jens bloggið þitt er eins og vin í eyðimörkinni alltaf með eitthvað jákvætt og skemmtilegt eins og veitingastaður með allskonar holla rétti fyrir sálina :)

[Ásthildur Cesil Þórðardóttir, 24.2.2012 kl. 17:13]

Hún er svo flott þessi stelpa, mikið gríðarlega er þetta falleg mynd af þessari fallegu hæfileikaríku stúlku.

[Jens Guð, 24.2.2012 kl. 21:33]

  Sólrún,  takk fyrir það.  Les ég rétt út úr texta þínum að þú hafir verið á hljómleikunum?

[Jens Guð, 24.2.2012 kl. 21:35]

  Ásthildur Cesil,  mér detta alltaf í hug orðin álfadrottning eða álfadís þegar ég sé Eivöru.

[Sólrún (IP-tala skráð) 24.2.2012 kl. 22:09]

Nei Jens eg var ekki á hljómleikunum af því eg hafði ekki hugmynd um þá fyrr en eg las bloggið þitt.

EN þegar að eg er búin að lesa bloggið þá finnst mér eins og eg hafi veri þar svo myndrænt og vel er frá öllu sagt.

Eg horfði alltaf á þættina hjá Jóni Ólafs með mikilli andakt og veit alveg hvernig þeir gera sig.

Og Eivör er náttúrlega bara eivör...

Gat seð þetta allt fyrir mér

http://www.youtube.com/watch?v=-1etTS0ZzAY&noredirect=1

[Jens Guð, 24.2.2012 kl. 22:15]

  Sólrún,  þú misstir af góðri skemmtun.

[Sólrún (IP-tala skráð) 24.2.2012 kl. 22:24]

Eg er með það á hreinu að eg missti af klassa skemmtun

Þessir eru goð hjá mér :)

http://www.youtube.com/watch?v=8kZqSvmAsYc

[Sólrún (IP-tala skráð) 24.2.2012 kl. 22:33]

http://www.youtube.com/watch?v=NJb7TSAQkYc

[Ásthildur Cesil Þórðardóttir, 25.2.2012 kl. 00:57]

Jens ef til vill er hún eins og fleir hér meðal okkar ekki alveg mennsk, heldur eitthvað miklu meira eins og fleiri sem ganga hér um þessa jörð og gefa okkur svo margt.  Það er bara spurning um að meðtaka og þakka fyrir.

[Jens Guð, 25.2.2012 kl. 20:06]

  Sólrún,  Ljótu hálfvitarnir eru grallarar.  Þeir krydda íslensku músíkflóruna.

[Jens Guð, 25.2.2012 kl. 20:08]

  Ásthildur Cesil,  hvort sem Eivör er alvöru álfadrottning eða álfadís þá er hún flottust.