Flott og spennandi sýning

 

  Í Sverrissal Hafnarborgar í Hafnarfirði stendur yfir sýningin  Skjaldarmerkið hennar Skjöldu.  Hún er hluti af listahátíðinni  List án landamæra.  Höfundur verkanna er fjöllistamaðurinn Atli Viðar Engilbertsson frá Akureyri.  Auk þess að vera í myndlist hefur hann látið að sér kveða í tónlist, leiklist, á ritvelli og víðar.

  Atli Viðar hefur samið fjölda leikverka.  Allt frá einþáttungum til viðamikilla söngleikja.  Einnig fór hann með hlutverk í sjónvarpsþáttunum  Hæ Gosi  sem sýndir voru á Skjá 1 og eru núna til sýningar í færeyska sjónvarpinu.

  Atli Viðar var í rokkhljómsveitinni Fnyk frænda.  Eftir hana liggur tónlist (2 lög) í kvikmyndinni Ingaló (með Sólveigu Arnarsdóttur í aðalhlutverki).  Að auki hefur Atli Viðar sent frá sér fjölda laga og ljóða á sólósnældum.

  Í Morgunblaðinu hafa birst ótal greinar eftir Atla Viðar.  Margar þeirra fjalla um geðræn veikindi.  Þá eru ótaldar smásögur,  internetverk,  ljóðakver og ýmislegt fleira sem skreytir ferilsskrá Atla Viðars.

  Sýningin í Hafnarborg er fjölbreytt og flott.  Mörg verkanna eru unnin úr og á bylgjupappa.  Það gefur þeim skemmtilegt yfirbragð.  Laðar fram tilfinningu fyrir léttleika og nýtni:  Að grípa til þess sem hendi er næst.  Önnur hráefni undirstrika þetta.  Til að mynda er eitt Íslandskort (af mörgum) þakið haframjöli.  Ofan á það eru límdar nokkrar rúsínur.  Band- og snærisspottar skreyta önnur verk.  Eitt er unnið úr gallabuxum.  Þetta eru skúlptúrar í bland við lágmyndir, málverk, litríka heklaða skó og sitthvað fleira. 

  Meðal skemmtilegra verka eru "styttur" af fjölskyldu unnar úr ómáluðum bylgjupappa.  Virkilega flott.  Einfalt en nostursamlega og vel gert. 

  Atli Viðar hefur næmt auga fyrir formum og litum.  Hann er hugmyndaríkur og djarfur en laus við "stæla".  Hann rembist ekki við að vera frumlegur til að vera frumlegur heldur er innblásinn af sköpunargleði og vinnur úr henni af yfirvegun og einlægni fyrir viðfangsefninu.

  Ég mæli með sýningu Atla Viðars í Hafnarborg.  Hún stendur til 29. apríl.   

  Kíkið á þessa síðu:

http://blogatlivarta.blogcentral.is/

Athugasemdir

[Tobbi (IP-tala skráð) 21.4.2012 kl. 23:15]

Alltaf seigur gamli.  Þarna varstu að upplýsa nýjan sannleik hvað varðar faðerni dóttur Þórhildar Þorleifsdóttur.  Hver er þessi Örn sem á Sólveigu með henni?  Ætli Arnar, maðurinn hennar, hafi ekki orðið fúll?

[Jens Guð, 21.4.2012 kl. 23:28]

  Æ,  æ,  æ.  Ekki vil ég koma af stað neinum leiðindum á því heimili.  Nú verð ég að leiðrétta þetta hið snarasta áður en illa fer.  Bestu þakkir fyrir ábendinguna.

[sæunn guðmundsdóttir (IP-tala skráð) 22.4.2012 kl. 03:53]

virkilega skemmtilega frumlegur listamaður og svo gaman að sjá hvað þú hefur náð karakternum Atla sem einmitt er uppfullur af frumlegum og skemmtilegum hugmyndum og leggur mikla vinnu í verkin sin.

[Sigurður I B Guðmundsson, 22.4.2012 kl. 09:43]

Er hann "kallinn"? Þú fyrirgefur vonandi, en ég er kominn með þennan "kall sem reddar öllu" á heilann!!! Áttu kannski "gervigras" við þessu??

[Jens Guð, 22.4.2012 kl. 13:30]

  Sæunn,  takk fyrir það.

[Jens Guð, 22.4.2012 kl. 13:30]

  Sigurður I.B.,  mér sýnist AVE redda sér bærilega.

[Atli Viðar Engilbertsson (IP-tala skráð) 22.4.2012 kl. 15:55]

jensguð! Þakka þér kærlega fyrir mjög góða umfjöllun um sýninguna mína í Hafnarborg. Þetta  var 4-5 stjörnu like hjá þér kunningi. Ég gef þér þá  á móti fimm J,J,J,J,J.  En já Sigurður spurði í gamni um gervigras? Ég bjó eitt sinn til líkan af æskuheimili mínu í sveit. Ég þekkti þá ekkert til um gervigras á markaði, -en reddaði gervigrasi  bara sjálfur og kurlaði í tvo daga  niður dökkrgænt netagarn með skærum og límdi á líkanið, þetta kom mjög vel út.

[Jens Guð, 22.4.2012 kl. 19:20]

Atli Viðar, takk fyrir skemmtilega sýningu.