Íslensk tónlist í Amsterdam

  Þegar ég fer til útlanda þá fagna ég því að hafa ekki áhuga á búðarápi.  Ég hef engan skilning á fólki sem fer í búðir í útlöndum.  Það eru búðir á Íslandi.  Þar fást föt og allt annað sem Íslendingar kaupa í útlöndum - og borga síðan 20 þúsund kall fyrir yfirvigt við innritun.

  Einu búðir sem ég stíg fæti inn í útlöndum eru plötubúðir.  Reyndar er heimsókn í útlendar plötubúðir langt í frá sama skemmtun og fyrir daga internets.  Á síðustu öld fór ég jafnan klyfjaður allt að 40 - 50 plötum út úr plötubúðum í útlöndum.  Í dag eru plötubúðir í útlöndum óspennandi. Þær selja aðeins vinsælustu plötur dagsins og plötur með stærstu nöfnum tónlistarsögunnar, svo sem Bítlunum,  Stóns og Dylans.

  Þrátt fyrir þessa annmarka þá fletti ég hverri einustu plötu í plötubúðum sem verða á mínum vegi í útlöndum. Núna síðast í Amsterdam um páskana. Þar eru í dag aðeins tvær plötubúðir sem selja geisladiska.  Mér til undrunar er úrval íslenskrar tónlistar þar nokkuð gott.

  Plötur þessara flytjenda er að finna í plötubúðunum í Amsterdam:

Björk (15 titlar)

Sigur Rós (10 titlar)  

Ólafur Arnalds (5 titlar) 

Emilíana Torríni (4 tilar) 

John Grant (4 titlar)

Vaccines (3 titlar)

Ásgeir Trausti (2 titlar)

Jónsi í Sigur Rós (2)

Of Monsters and Men (2 titlar)

Hilmar Örn Hilmarsson (1 titill)

  Hér fyrir neðan er lag af plötu Hilmars Arnar.

            

Athugasemdir

[Vilhjálmur Örn Vilhjálmsson, 11.4.2016 kl. 05:52]

Blautur og flattur fiskur var einnig seldur til Hollands fyrr á öldum. Og langspilið kom til Íslands frá nyrsta hluta Hollands, Fríslandi. Ekkert er nýtt undir sólinni. En ekki er John Grant Íslendingur eða tónlist hans íslensk, þó hann búi með íslenskum pilti. Indverska prinsessan verður til að mynda seint talin íslensk og þaðan af síður Askhkenazi.

[Stefán (IP-tala skráð) 11.4.2016 kl. 10:58]

Það eru margir íslenskir tónlistarmenn frægir víða um lönd, en frægastur allra íslendainga í dag hlýtur að vera hinn þjóðrekni fyrrum forsætisráðherra sem menn hlæja endalaust af út um allan heim í dag. Samt afskaplega slæm og skammarleg auglýsing fyrir okkur.

[FORNLEIFUR, 11.4.2016 kl. 14:13]

Vonum bara að SDG fari ekki út í músík...

[Stefán (IP-tala skráð) 11.4.2016 kl. 14:51]

 
Sammála, enda er hann bestur ( skárstur ) þegar hann þegir.

[Jens Guð, 11.4.2016 kl. 22:21]

Vilhjálmur Örn,  þetta er alltaf á gráu svæði hvenær íslenskur ríkisborgari af erlendu bergi brotinn telst vera Íslendingur.  Eivör var aldrei íslenskur ríkisborgari en var og er ennþá hlaðin ótal titlum og verðlaunuð sem "Besta íslenska..." allskonar. Hún var ráðin í sönghópinn "Íslensku dívurnar".  

  Hún gerði út frá Íslandi með íslenskum hljóðfæraleikurum,  bæði á hljómleikum og í stúdíói.  Alveg eins og John Grant. Ég er ekki viss en held að hann sé íslenskur ríkisborgari. 

[Jens Guð, 11.4.2016 kl. 22:22]

Stefán  SDG er í dag þekktasti Íslendingurinn.

[Jens Guð, 11.4.2016 kl. 22:25]

Fornleifur,  það er til á youtube klippa af SDG að syngja gamlan ættjarðarsöng. Hann fer vitlaust með textann.  Ég finn ekki slóðina.  Hef séð þessu póstað á Fésbók en ekki haft rænu á að afrita slóðin.

[Jens Guð, 11.4.2016 kl. 22:25]

Stefán,  það er lúxus.