Glæsileg plata frá fyrrum borgarstjóra Reykjavíkur

  Á dögunum kom út platan "Ég elska lífið" með Ólafi F. Magnússyni.  Áður hafa heyrst frá honum stök lög sungin af Páli Rósinkrans.  Þau eru á plötunni.  Páll er frábær söngvari.  Tvímælalaust einn sá besti á landinu.  Það heyrist glöggt í þeim fimm lögum sem hann syngur á tíu laga plötunni.

  Ólafur og Guðlaug Dröfn Ólafsdóttir syngja hin lögin.  Hún er auðheyranlega lærð í öguðum klassískum söng.  Afskaplega raddfögur og þægilega lágstemmd.  Söngur hennar fellur vel að söngstíl Ólafs.  Söngstíl sem klæðir tónlistina betur en annars mjög svo góður söngur Páls.  Ólafur syngur af einlægni, innlifun og næmri tilfinningu fyrir boðskap söngtextanna.  Enda allir nema tveir ortir af honum.  Þeir eru innihaldsríkir, boðandi og gefandi.  Þeir eru vel ort ljóð sem standa sterk án tónlistar.  En falleg tónlistin og snotrar laglínur lyfta þeim.

  Eitt ljóðið,  "Ferðabæn", er eftir langömmu Ólafs, Önnu Guðmundsdóttur.  Annað,  "Ákall", er eftir afa hans, Stefán Ágúst Kristjánsson.  Þau tvö ljóð eru alveg í anda frumsömdu ljóðanna.  Ólafur er höfundur allra laga.  Þau eru lipurlega samin.  Laglínur vinalegar og auðlærðar.  Sumar með krækju (hook line),  svo sem "Máttur gæskunnar".  Öll lögin eru róleg, hlýleg og flest með sálmakenndum blæ.    

  Upphafslagið,  "Gott og göfugt hjarta",  gefur tóninn.  Textinn er heilræðavísa.  Laglínan er falleg og hátíðleg.  Hún er undirstrikuð með - að mestu - órafmögnuðum hljóðfærum.  Þar af setur saxófónn sterkan svip á. Vilhjálmur Guðjónsson "galdrakarl" útsetur snyrtilega og spilar á öll hljóðfæri á plötunni að frátöldu gítarplokki Gunnars Þórðarsonar á móti honum í tveimur lögum. Vilhjálmur raddar að auki með Ólafi og Guðlaugu. Raddanir eru hvarvetna smekklega nýttar og vel heppnaðar í alla staði.  Eins og öll platan.  Hún er glæsileg.  Mitt uppáhaldslag er óður til Eyjabakka,  "Ekki láta þá sökkva".