Hver voru viðhorf Johns, Pauls og Julians við "Hey Jude"?

  Í nýlegu viðtali var bítillinn Paul McCartney spurður að því hvort hann sjái eftir einhverju lagi sem hann hafi samið og gefið út.  Paul sagðist iðrast lagsins "Hey Jude".  Það hafi verið ósmekkleg afskipti af fjölskyldumálum Johns Lennons.  Lagið er ávarp til sonar Johns,  Julians.  Huggunarorð vegna skilnaðar foreldra hans.  

  Þrátt fyrir þessa afstöðu tekur Paul lagið iðulega á hljómleikum. Enda voru John og Julian afar sáttir við lagið.  John sagði texta lagsins vera einn besta texta Pauls.  Hann hefði iðulega gert góðlátlegar lagfæringar á textum Pauls.  Sem Paul alltaf fagnaði.  En í þessu tilfelli hafi textinn verið virkilega flottur frá upphafi til enda.

  John las út úr textanum vinsamlega kveðju til sín. Í textanum segir: "When you found her, now go and get her."  John túlkaði þetta sem Paul væri að votta skilning eða samþykki á því að hann væri að skilja við Cintheu og taka saman við Yoko.

  John ólst upp á ástlausu en um margt góðu heimili kaldlyndrar og afar snobbaðrar frænku sinnar.  Hann þekkti ekki foreldra sína fyrr en á fullorðinsárum.  Það sat alltaf í honum.  Sauð á honum reiði sem leitaði útrásar í slagsmálum á pöbbum. 

  John var lítt góður faðir.  Paul var syni hans,  Julian,  miklu betri "faðir".  John lýsti Paul sem mikilli barnagælu.  Ótal ljósmyndir staðfesta að samband Pauls og Julians var nánara en samband Johns við son sinn. Julian kallar Paul besta frænda.  Þegar Julian var á barnsaldri og þeir þrír gengu saman voru það Paul og Julian sem leiddust.  Paul hefur alla tíð ræktað gott samband við börn Bítlanna.  Nema Sean Lennon.  Þeir hafa aldrei kynnst almennilega. 

      

Athugasemdir

[Wilhelm Emilsson, 20.6.2019 kl. 01:00]

Takk fyrir færsluna. Ef ég man rétt sagði Paul við John að hann þyrfði að breyta línunni "The movement you need is on your shoulder" af því að hún hljómaði skringilega og væri merkingarlaus, en John sannfærði hann um að þetta væri góð lína og að hún væri alls ekki merkingarlaus. Paul notaði þetta sem dæmi um hve það hafi verið gott að semja með John.

[Stefán (IP-tala skráð) 20.6.2019 kl. 12:35]

John Lennon var frábær, fluggáfaður og skapandi listamaður, en sem persóna bendir allt til þess að hann hafi verið stórskaddaður af sérstöku uppeldi og að sumu leiti ófær um mannleg samskipti, auk þess sem hann var alltof upptekinn af sjálfum sér á kostnað annara.

[Sigurður I B Guðmundsson, 21.6.2019 kl. 10:30]

Meira meira!!!

[Jens Guð, 21.6.2019 kl. 11:13]

Wilhelm,  ég man eftir sjónvarpsviðtali þar sem Paul sagði frá þessu.

[Jens Guð, 21.6.2019 kl. 11:19]

Stefán,  hann átti við ýmis hegðunarvandamál að sríða.  Hann stuðaði marga við fyrstu kynni.  Um daginn las ég að hann hefði stuðað Tom Jones svo illa við fyrstu knni að það tók hann mörg ár að sæta sig við að þetta var bara saklaus sérkennileg kímnigáfa Johns.  Eric Clapton segir frá því í ævisögu sinni að þegar hann kynnti John fyrir kærustunni sinni þá sagði John eitthvað ruddalegt við dömuna.  Eftir það var Eric stöðugt á varðbergi gagnvart John.

[Jens Guð, 21.6.2019 kl. 11:19]

Sigurður I B,  svo skal vera!