Gátan leyst

  Afabróðir minn flutti til Færeyja um aldamótin 1900.  Þar hófst hann þegar í stað við að eignast börn með tveimur þarlendum konum.  Fyrir bragðið á ég fjölmennan frændgarð í Færeyjum.  Flestir bera ættarnafnið Ísfeld.  Margir hafa orðið áberandi í sjávarútvegi,   tónlist og byggingarlist.  Samruni íslenskra og færeyskra gena hefur gefist vel.  

  Barnungur færeyskur frændi minn,  Nói,  var í kristnifræði í skólanum fyrir helgi.  Heimkominn tjáði hann mömmu sinni frá náminu.  Kennarinn hafi upplýst að guð,  Jesú og heilagur andi væru eitt og hið sama.

  Stríðin mamman spurði:  "Hvernig í ósköpunum geta 3 guðir verið eitt og hið sama?"

  Nói svaraði um hæl:  "Ætli það sé ekki eins og með sjampóið okkar,  3 in 1.  Það er hársápa,  hárnæring og baðsápa í einu og sömu flöskunni." 

  

Athugasemdir

[Stefán (IP-tala skráð) 15.10.2024 kl. 11:13]

,, Jens Guð, Jesú og heilagur andi ,, hljómar einhvernveginn betur, en ég veit samt ekki hvað heilagur andi merkir ?

[Jens Guð, 15.10.2024 kl. 11:21]

Stefán,  góður!

[Jóhann Elíasson, 15.10.2024 kl. 13:06]

Þetta alveg meiriháttar gott svar hjá stráknum.  Skyldi þetta vera í genunum?????????

[Jens Guð, 15.10.2024 kl. 13:15]

Jóhann,  já!

[Sigurður I B Guðmundsson, 15.10.2024 kl. 14:33]

Stutt sögulýsing: Afi minn átti tvær systur sem giftust til Færeyja. Hans Mohr skipstjóri kom til Karlsskála og sá Pálinu systur afa og giftist henni og hún fluttist til Færeyja. Síðan fór önnur systir afa Guðný til Færeyja til að heimsækja systur sína og þar var Jóhannsi Paturson í heimsókn hjá Hans vini sínum og sá Guðnýju og þau Jóhann og Guðný giftust og hún flutti að Kirkjubæ. 

[Jens Guð, 15.10.2024 kl. 15:20]

Sigurður,  gaman að heyra.  Væntanlega áttu frændgarð þarna.  Ég kannast við færeyskan listmálara sem heitir Mohr að eftirnafni (og Össur að fyrra nafni).

[Stefán (IP-tala skráð) 16.10.2024 kl. 18:08]

Var að horfa á Pallborð dagsins á Vísi og ætla að vona í framhaldi af því að frændfólk ykkar Jens og Sigurðar í Færeyjum búi við meira mál og fjölmiðlafrelsi en er í reynd á Íslandi í dag. 

[Jens Guð, 16.10.2024 kl. 21:47]

Stefán (# 7),  ég þarf að leita þetta Pallborð uppi.  Takk fyrir ábendinguna.