Plötudómur

 

Flytjandi:  I Adapt

Titill:  Chainlike Burden

Einkunn:  ****1/2 (af 5)

  Nýjasta plata I Adapt er gullmoli.  10 flott lög.  Þetta er sennilega 6 ára gömul hljómsveit.  Stofnuð upp úr ýmsum harðkjarna hljómsveitum (Bisund,  Snafu,  Molesting Mr. Bobo.fl.).  Harðkjarni er á ensku kallaður hardcore og nær yfir pönkhljómsveitir í þyngri og harðari kantinum.  Mikil öskur.  Mikil læti.

  Framan af var "pjúra" pönk áberandi.  Á nýju plötunni er músíkin orðin þyngri,  yfirvegaðri og að hluta "rólegri" eða hæggengnari.  Án þess að það eigi að hljóma eins og eitthvað neikvætt gagnvart eldri frábærum plötum I Adapt þá er nýja platan eins og meira "alvöru".   Hljómsveitin er eins og þroskaðri. 

  Það vantar ekkert upp á kraft eða hraða.  Þó að inn á milli sé keyrslan ekki eins yfirkeyrð.  Trommuleikurinn er einstaklega skemmtilegur.  Kröftugar áherslurnar í trommuleiknum gera mikið fyrir lögin.  Söngvarinn,  Birkir Fjalar Viðarsson,  var lengi í framlínu bestu trommara landsins.  Spilaði með Bisund,  Döðlunum og Stjörnukisa.  Var réttilega kosinn besti trommuleikarinn í Músíktilraunum þegar Bisund lenti þar í 2.  sæti (man ekki hvort að það var á eftir Soðinni fiðlu eða Steiner).  Birkir myndi ekki sætta sig við neitt minna en þann snilldar trommuleik sem heyrist á plötunni. 

  Birkir ræður við að öskra út í eitt. Smá hnökri við plötuna er að söngurinn hefði fyrir minn smekk mátt vera hljóðblandaður pínu pons framar.  Samt ekki neitt sem kemur að sök.  Platan hljómar flott eins og hún er.  Á köflum tel ég mig heyra samhljóm með einni af mínum uppáhalds hljómsveitum,  hinni bandarísku Minsitry.  Kröftugur öskursöngur yfir rólyndislega en þunga undiröldu. 

  Annar lítillegur hnökri er að ég heyri ekki orðaskil og textarnir sem prentaðir eru í flott umslag eru illlæsilegir fyrir mann á sextugsaldri.  Þetta atriði skrifast þó frekar á sjóndepurð gamals manns en plötuumbúðir.

  Þriðja atriðið er að I Adapt er ein allra skemmtilegasta hljómleikahljómsveit landsins.  Stemmningin sem hljómsveitin nær að magna upp á hljómleikum skilar sér eðlilega ekki að fullu á plötu. 

  Fjórða atriðið er að platan er frekar seintekin.  Ég er búinn að hlusta á hana um það bið 30 sinnum.  Það tók mig nokkrar hlustanir að fá góðar lagasmíðarnar til að laumast inn. 

  Eftir stendur að þetta er frábær plata með frábærri hljómsveit.  Platan fæst í 12 Tónum,  Smekkleysu og fleiri búðum öðrum en Skífunni. 

 

   

 

Athugasemdir

[Ragga (IP-tala skráð) 4.9.2007 kl. 06:51]

Spennandi, þarf að fara að drífa mig í hlustun á þessa. Þessi dómur er auðvitað bara hvetjandi líka ;)

[Jens Guð, 4.9.2007 kl. 13:31]

  Erlingur,  rétt til getið.  Þetta eru I Adapt í góðum gír. 

[Gunnar Th. Gunnarsson, 4.9.2007 kl. 14:00]

Ég verð nú bara að segja alveg eins og er að ég skil ekki svona músik. Ég skil alveg að unglingar fíli kraftinn og hávaðann en mér nægir alveg að hlusta á þetta lag á utube einu sinni til að fá nóg. Fjórir tónar endurteknir í sífellu í tvær mínútur og svo öskraðir enn færri tónar í þrjár. Geta menn öskrað svona í heila tónleika án þess að missa röddina?

[Jens Guð, 4.9.2007 kl. 14:27]

  Það er fæstum gefið að öskra samfellt út heila hljómleika án þess að missa röddina.  Þeir fáu sem ráða við það missa samt röddina af og til.  Þetta er svo gífurleg áreynsla fyrir raddböndin.  Þegar þeir missa röddina tekur allt upp í nokkrar vikur að fá hana aftur.

  Hugsanlega meðtekur fólk þessa músík öðruvísi ef að það hefur vanist henni á hljómleikum.  Það er svo gífurlega sterk upplifun.  Jafnframt þarf maður að hafa gaman af þungu og hörðu rokki yfir höfuð til að láta stemmninguna hrífa sig.    

[Anna Ólafsdóttir (anno) (IP-tala skráð) 4.9.2007 kl. 14:44]

Takk fyrir að upplýsa mig, fáfróða konuna, um þessa hljómsveit. Vissi bara ekkert um tilvist hennar.

En af því að þú veist allt um tónlist og þá sérstaklega rokk þá heyrði ég í gamalli hljómsveit í laugardagsþættinum hjá henni Erlu Ragnars. Erla var með Guðlaug Kristin Óttarsson í viðtali hjá sér. Hann kom með tónlist með Killing Joke með sér í þáttinn. Fyrsta lagið sem var spilað var Love like blood. Það fannst mér MJÖG flott lag!! Annars var þetta alveg frábært viðtal (milli 10 og 12 síðasta laugardag í vefupptökunum á RÚV ef þú misstir af því). 

[Gunnar Th. Gunnarsson, 4.9.2007 kl. 15:01]

Já þetta á auðvitað við um alla músik, að vera á staðnum, ekki síst klassík og kóramúsik sem ég hef hallað mér æ meira að í seinni tíð

[Magnús Geir Guðmundsson, 4.9.2007 kl. 16:53]

Út á þessa grein þína, selja piltarnir örugglega 50 - 100 eintök aukalega, varlega áætlað!

[Kristján Kristjánsson, 4.9.2007 kl. 19:21]

Þetta er eðalplata. Ég er ekki búinn að hlusta nógu mikið á hana til að dæma hana endanlega en hún hefur samt þegar stimplað sig inn sem ein af plötum ársins. Ég skil það mjög vel að sumir geti ekki hlustað á þessa tónlist. Sumir geta ekki hlustað á Sigur Rós aðrir ekki á Celine Dion og enn aðrir ekki á klassík. I Adapt standa mjög vel í þeim geira sem þeir eru í, svokölluðum harðkjarna. Þeir hafa kraft, frumleika, góðar lagasmiðar og eru þar að auki hörku hljóðfæraleikarar. Á tónleikum eru þeir frábærir og það er mjög gott fyrir sveitir að hafa spilað mikið áður en þeir ráðast í plötugerð. Það sanna þeir með þessari skífu.

Magnús Geir: Ég vona þeir selji meira en 50-100 eintök aukalega út á þessa grein :-)

[Magnús Geir Guðmundsson, 4.9.2007 kl. 20:28]

Jamm Kiddi, enda sagði ég líka varlega áætlað. Þú mælir svo auðvitað viturlega og veist sem er að til dæmis eru í klúbbnum góða menn sem nánast hlusta á allt nema til dæmis einmitt Sigurrós!

[Jens Guð, 4.9.2007 kl. 20:30]

  Anna,  ég veit ekki allt um tónlist.  Því fer fjarri.  En takk fyrir að benda mér á þennan þátt um Gulla Óttars.  Ég þekki þann merka snilling.  Við vorum samtíða á Laugarvatni.  Ég í gaggó en hann í menntó.  Þar spilaði hann í hljómsveitinn Lótusi en ég í hljómsveitinni Frostmarki. 

  Síðar lágu leiðir aftur saman þegar ég var að stússa í Gramminu og Gulli að spila með Þeysurum og síðar Kukli. 

  Ég hef mikið dálæti á Killing Joke.  Á flestar plöturnar með þeim.  Þó að hljómsveitin sé þriggja áratuga gömul og hafi sprottið upp úr pönksenunni þá hefur hún þróast mjög vel.  Plata með þeim sem kom út 2003 og heitir ekki neitt er ein þeirra allra besta.  Dave Grohl (Nirvana,  Foo Fighters) sér um trommuleikinn.

  Maggi,  ég tek undir með Kidda og vona að þeir selji miklu meira út á þessa grein. 

[Georg P Sveinbjörnsson, 6.9.2007 kl. 17:06]

Búinn að renna plötunni 2 í gegn og er mjög hrifinn, eitthvað það' hressilegasta sem ég hef heyrt í Íslensku rokki í nokkurn tíma.

Anna, takk fyrir að benda á þáttinn hjá Erlu Ragnars með Guðlaugi, Killing Joke hefur verið mín uppáhalds hljómsveit síðan 1985 og ég er farinn beint að leita að þessu viðtali, Love Like Blood er frá 1985 af plötunn Night Time og er einmitt lagið sem kynnti mig fyrir Killing Joke, fór á tónleika með þeim í fyrra og gömlu mennirnir voru í feiknaformi.

Hér er videóið við lagið http://uk.youtube.com/watch?v=cVgMEsMZdcQ

[Þorsteinn Kolbeinsson (IP-tala skráð) 25.9.2007 kl. 00:56]

Ég er mikill þungarokkari sjálfur. Ég hef hins vegar almennt verið frekar lítið fyrir hardcore tónlist en I Adapt eru einu orði sagt rosalegir! Að fara á tónleika með þeim er mind blowing, mind changing experience og það að upplifa stemninguna, hina ómenguðu skemmtun sem tugir manna í I Adapt "vímu" (en I Adapt spila oftast nær á all-ages áfengislausum tónleikum), syngjandi hástöfum með Birki söngvara, í einni kös, menn jafnvel klifrandi hver ofan á öðrum, sveittir í gegn, í einum risastórum pitti (og mjög fáir, ef einhverjir undir áhrifum áfengis eða annarra vímuefna). 
Ég á eftir að heyra þessa nýju plötu en fyrri plötur meistaranna hafa gert lítið fyrir mig, en live er málið allt allt öðruvísi. Þar fíla ég drengina alveg í tætlur. 

Ég mæli með því að fólk skelli sér á tónleika með þeim áður en langt um líður... tónleikar með þeim eru hvort eð er aldrei dýrir, þeir spila sjaldnast á tónleikum þar sem kostar meira en 500 kall inn, eða bara frítt, eða eru að spila með erlendum sveitum þar sem miðaverðið fer sjaldan yfir 1000 kallinn. Útgáfutónleikar þeirra eru t.d. á næstu grösum, án þess að ég viti hvenær þeir verða, en það er alveg ljóst að þessi þungarokkari mun ekki láta sig vanta. Þeir eru einnig að spila með dönsku sveitinni The Psyke Project 3. nóvember og það má búast við húsfylli á þeim tónleikum.

Annars getur fólk heyrt tóndæmi af þessari nýju plötu hérna: http://www.mammathin.net/ Mæli með Sinkin Ship og Future In You.

[Jens Guð, 25.9.2007 kl. 01:58]

  Ég er einmitt að reyna að benda á að þrátt fyrir að plötur I Adapt séu frábærar þá er hljómsveitin ennþá flottari á sviði.  Hljómleikar I Adapt eru þvílík snilld að þeir eru bara gæsahúð og alvöru hljómleikaupplifun. 

[Jens Guð, 25.9.2007 kl. 02:08]

   Þorsteinn, endilega hentu inn á bloggið  mitt fréttatilkynningum um hljómleika með Amon Amarth eða öðrum spennandi dæmum sem að þú ert með.  Innlit á bloggið mitt eru um 14.000 á viku og ég vil nýta þennan vettvang til að koma á framfæri því sem að er áhugavert í rokksenunni.