Deilan á Prestbakka dómtekin síðar í mánuðinum

 

  Ég hef leyft ykkur að fylgjast með sérstæðum deilum sem poppstjarnan Hebbi Guðmunds og Svala kona hans standa í við nágranna sína.  Neðst í þessum texta eru tenglar inn á fyrri færslur um málið.  Ég ætla samt að fara í stórum dráttum yfir málið. 

  Hebbi og Svala búa í raðhúslengju á Prestbakka.  Í raðhúsunum í bökkunum hefur verið hefð fyrir því að hver íbúðareigandi sér um viðhald á sínum íbúðum,  að því frátöldu að viðhald á göflum er sameiginlegt.

  Fyrir nokkrum árum létu Hebbi og Svala endurnýja þakið á sinni íbúð.  Það gerði annar íbúðareigandi líka.  Eigendur hinna fjögurra íbúðanna í lengjunni eru að láta skipta um þak á sínum íbúðum núna.  Samkvæmt áeggjan Húseigendafélagsins er kostnaðinum deilt yfir á allar íbúðirnar - þrátt fyrir að ekki verði skipt um þak á tveimur þeirra.

  Hússjóður var stofnaður og mánaðargjald á hverja íbúð er 500.000 kr.  Hebbi og Svala hafa mótmælt þessum yfirgangi óg ósvífni.  Þau neita að borga 500.000 kr. á mánuði.  Fyrir það hefur þeim verið stefnt.  Málið verður dómtekið síðar í þessum mánuði.

  Fyrir utan ósanngirnina sem Hebba og Svölu er sýnd af nágrönnum sínum þá hefur þeim hjónum blöskrað vinnubrögðin að öðru leyti.  Almenna verkfræðistofan var fengin til að halda utan um framkvæmdina.  Með tilheyrandi kostnaði (2 milljónir kr. áður en framkvæmdir hófust).  Meðal annars var smiður fenginn til að labba í kringum raðhúslengjuna og benda á steypuskemmdir sem blöstu við öllum.  Fyrir rölt smiðsins kom reikningur upp á 167.000 kall.   

  Verktakinn sem tók að sér verkið hefur látið ólærða unglingspilta vinna verkið.  Strákarnir kunna ekkert til verka.  Það hefur orðið að tvívinna suma hluti vegna þekkingar- og reynsluleysis þeirra.  Önnur vinna er verulega gölluð af sömu ástæðum.  Óvatnsvarðar krossviðarplötur eru negldar ofan á rennblautan 35 ára gamlan pappa og hann þekur timburþak.  Þakið á íbúð Hebba og Svölu,  Prestbakka 15,  og nágranna þeirra á nr. 17,  eru að sjálfsögðu steypt.

  Á dögunum hætti verktakinn og tveir smiðir hafa verið ráðnir í staðinn. 

  Ef að smellt er á myndirnar þá stækka þær og verða skýrari.  Við þær birtast þá númerin Prestbakki I,  II og III.  Þannig merkti ég þær inn á stjórnborðið mitt.  Sú merking er pínulítið villandi vegna þess að myndirnar eru af Prestbakka 21. 

  http://jensgud.blog.is/blog/jensgud/entry/284142

Athugasemdir

[Einar Bragi Bragason., 11.10.2007 kl. 23:58]

Áfram Hebbi

[Briet (IP-tala skráð) 12.10.2007 kl. 01:53]

Og verktakinn er ........... ?

[Briet (IP-tala skráð) 12.10.2007 kl. 01:55]

Framhald uppboðs fer fram á morgun. Er það að kröfu þessara óprúttnu aðila ?

[Jens Guð, 12.10.2007 kl. 08:13]

  Húsfélagið lætur banka halda utan um innheimtu á gíróseðlunum.  Þegar Hebbi og Svala borguðu ekki 500.000 kallinn þá fór innheimtuferli í gang með tilheyrandi stefnu,  lögtaki og þess háttar.  Það er krafist uppboðs á eignum þeirra fyrir ógreiddum gíróseðlum.  Það er sem sagt meirihluti húsfélagsins,  að áeggjan Húseigendafélagsins,  sem að stendur fyrir kröfunni. 

  Af því að líkast til er stutt í að niðurstaða fáist í málið þá ætla ég að hinkra í nokkra daga við að gefa upp nafn verktakans. 

[Jónína Dúadóttir, 12.10.2007 kl. 08:55]

Ég trúi ekki öðru en að þau vinni málið, þetta er með ólíkindum allt saman..

[Ásgerður , 12.10.2007 kl. 09:29]

Alveg ótrúlegt að þetta geti gengið svona langt. Þetta hlýtur að vera alveg siðlaust fólk þarna í götunni,,,það er að segja þessi fjögur sem eru að láta gera við þökin núna. Skrítið mál  

[Sigurður (IP-tala skráð) 12.10.2007 kl. 09:51]

Fyrir alla muni hættu að skrifa sem að og ef að. Láttu nægja sem og ef!

[Ragnheiður , 12.10.2007 kl. 11:15]

Hér eru ýmsir spekingar á ferð og meira að segja sjálfskipaður málfarsráðunautur.

[Steini Briem (IP-tala skráð) 12.10.2007 kl. 11:28]

Þau berjast í Prestbökkunum,
með bilað lið allt í kringum sig,
kellingar þar með krökkunum,
kúka á þök með hátt sýrustig.

 

[Jens Guð, 12.10.2007 kl. 20:05]

  Jónína og Ásgerður,  mér þykir yfirgangurinn vera með ólíkindum.  Ég hef bæði búið í blokkum og raðhúsi.  Ég þekki ekki þaðan yfirgang meirihluta.  Þvert á móti hef ég einungis kynnst vilja til að tekið sé tillit til aðstæðna hvers og eins af sanngirni.  Þannig eiga eðlileg mannleg samskipti að vera.

  Sigurður og Ragnheiður,  ég fagna leiðbeiningum í átt að betra ritmáli. 

  Steini,  skondnu vísurnar þínar lífga alltaf upp á bloggið.