Lay Low er stórkostleg

 

  Söngkonan ljúfa og flotta Lay Low er ekki aðeins einn glæsilegasti tónlistarmaður landsins.  Hún er líka góð manneskja sem lætur sig varða samfélagsleg mál og ber umhyggju fyrir þeim sem orðið hafa fyrir áföllum í lífinu.  Að undanförnu hefur Lay Low vakið athygli og aðdáun fyrir frábæran tónlistarflutning í leikritinu Ökutímar í uppfærslu Leikfélags Akureyrar. 

  Eftir áramót kemur á markað plata með tónlist hennar úr leikritinu.  Lay Low rennur til rifja hvað bágur fjárhagur Aflsins,  systursamtaka Stígamóta á Norðurlandi,  háir starfsemi samtakanna.  Hún hefur nú brugðist við því með að ánafna Aflinu öllum sínum tekjum af plötusölunni.

  Þetta er stærsta og höfðinglegasta gjöf sem Aflinu hefur hlotnast.  Lay Low er einn vinsælasti tónlistarmaður Íslands.  Hún var sigurvegari íslensku tónlistarverðlaunanna síðast.  Var meðal annars kosin vinsælasta söngkonan.  Platan á eftir að seljast eins og heitar lummur. 

  Tilgangur Lay Low er ekki sá einn að leggja drjúgt af mörkum fjárhaldslega með þessu framlagi heldur ekki síður að vekja athygli á bráðnauðsynlegri starfsemi Aflsins.

  Sem stuðningsmaður Aflsins er maður hálf klökkur yfir þessu stórkostlega framlagi Lay Low-ar.  Mér er kunnugt um að sjálfboðaliðar Aflsins eru sömuleiðis dolfallnir af þakklæti yfir höfðingsskap hennar.  Það er auðvelt að mæla með plötunni og hvetja til kaupa á henni.  Platan verður klárlega virkilega góð.  Og nú bætist við að kaup á plötunni renna til góðs og þarfs verkefnis.

  Ofan á þetta bætist að LA ætlar að halda aukasýningu í janúar þar sem aðgangseyrir rennur óskiptur til Aflsins. 

  Ég hvet aðra bloggara til að vekja athygli á þessu á sínum bloggsíður þannig að örlæti,  góðmennska og hróður Lay Low-ar og Leikfélags Akureyrar berist sem víðast.

Athugasemdir

[Einar Bragi Bragason., 12.12.2007 kl. 00:09]

http://erla1001.blog.is/blog/erla1001/entry/388660/

USA í stuði

[Steini Briem (IP-tala skráð) 12.12.2007 kl. 00:46]

Styrkir bæjarstjórnin á Akureyri Aflið, eða er hún bara í því að vera í sífelldum málaferlum við Akureyringa og brjóta stjórnarskrána með því að meina fólki á ákveðnum aldri að tjalda á tjaldstæðinu á Akureyri? Hún hlýtur að geta styrkt Aflið um tvær milljónir, eða svo. Vilji er allt sem þarf og hestasveinn Stjána bláa hlýtur að geta tekið undir það á sínu bloggi.

[halkatla, 12.12.2007 kl. 01:24]

Lay Low er bara æðisleg

[Magnús Geir Guðmundsson, 12.12.2007 kl. 01:29]

Jájá, Lay eða Lovísa á hrós skilið og gott hjá þér frækni SkruatSkrautskrifari að segja frá þessu.

En hver skildi nú hestasveinn Stjána bláa vera !?

[Steini Briem (IP-tala skráð) 12.12.2007 kl. 02:10]

Hann Stefán Friðrik hefur verið hestasveinn Stjána bláa þegar hann hefur keypt kaffi og kandís hér í Reykjavíkinni, Magnús minn.

[ari (IP-tala skráð) 12.12.2007 kl. 14:01]

Flott mál.

Mér finnst hún þó ekki sem sóló slá út Benny Crespo´s Gang (sem hún er í) tónlistarlega séð, þó hún sé alveg ágæt. 

[Ingigerður Friðgeirsdóttir, 12.12.2007 kl. 14:49]

Lovísa er bara frábær stúlka

[Salvör Kristjana Gissurardóttir, 12.12.2007 kl. 16:01]

Frábært hjá henni

[tommi (IP-tala skráð) 12.12.2007 kl. 19:49]

Þvílík snilld há henni, nú þurfa bara allir að kaupa diskinn:-)

[Jens Guð, 13.12.2007 kl. 02:06]

  Ari,  ég er ekki alveg sammála þér. Benny Crespo´s Gang er flott hljómsveit.  En Lay Low er ennþá flottari sóló.  Látlaus söngrödd hennar er yndislega töff.  Einfaldar og grípandi laglínurnar bergmála frá Woody Guthrie og Leadbelly.

  Ingigerður og Salvör,  það væri frábært ef að þið mynduð setja inn færslur á ykkar bloggsíður um framtak/framlag Lay Low til Aflsins.  Ég er ennþá dolfallinn yfir uppátæki hennar með að framselja allar sínar tekjur af sölu disksins til Aflsins.  Þetta er framlag/styrkur upp á einhver hundruð þúsunda króna.

  Tommi,  ég tek undir hvatningu þína um að fólk kaupi diskinn. 

[Ingigerður Friðgeirsdóttir, 13.12.2007 kl. 15:24]

Sæll Jens ég leyfði mér að setja færsluna þína á síðuna mína.

Bestu kveðjur Ingigerður. 

[Jens Guð, 13.12.2007 kl. 15:31]

  Ingigerður,  alveg endilega og takk fyrir það.

[skilningur, 13.12.2007 kl. 16:03]

Ég skil.