Frábær forréttur - einfaldur og hollur

  Eftir hressandi umræðu um það hvað Madonna er hrikalega ljót - og músík hennar næstum því jafn leiðinleg og plötur Stjórnarinnar (róleg,  róleg,  ég sagði næstum því.  Ekki jafn) - er upplagt að laga einfaldan og bráðhollan forrétt.  Forrétturinn er fyrir 4 (eða þrjá mjög svanga og gráðuga).  Það eina sem þarf í réttinn er:

5 kíló af rækju

2,3 lítrar af tómatsósa

1,5 lítrar hvítvín

Hálft kíló af smátt söxuðum súrum gúrkum 

Flaska af sítrónusafa

5 matskeiðar af kaldri piparsósu

Salt eftir smekk

.

  Fyrst þarf að kaupa 72 litlar skyrdollur.  Skyrið er fjarlægt úr þeim og sett í þokkalega hreina skúringafötu og dósirnar þvegnar.  Teljið rækjurnar samviskusamlega og skiptið þeim jafnt í skyrdollurnar.   Ef verulegur stærðarmunur er á rækjunum skulu 2 smáar jafngilda einni stórri.

Bleytið rækjurnar lítillega með sítrónusafanum.  Ekki til að framkalla skarpt sítrónubragð heldur til að koma í veg fyrir matareitrun því viðbúið er að rækjurnar séu skemmdar.

Hrærið öllu hinu saman og hellið yfir rækjurnar. 

  Það kemur vel út að fara með þetta á næstu umferðareyju,  rífa þar eins og eina lúku af grasi,  fínklippa það og strá í örlitlum mæli yfir skálarnar.  Örlitlum.  Það má alls ekki vera það mikið að bragð finnist af grasinu.  Grasið er bara til skrauts.

  Með þessu er nartað í ristað brauð og kælt hvítvín þambað af áfergju.

 

  Heppilegt er að byrja snemma dags að snæða þennan forrétt.  Hann er ótrúlega drjúgur og dugir fram að kvöldmat.

  Sem aðalrétt er mælt með hrossabjúgum og kartöflumús.  Hrossabjúgun skulu vera alvöru,  það er að segja einungis úr hökkuðu hrossakjöti en ekki drýgð með kartöflumjöli,  undarennudufti,  sagi,  hveiti eða öðru. 

Í eftirrétt er upplagt að nota skyrið.  Það er stemmning í því að moka skyrinu upp í sig með berum höndum og enda á skyrslag.  Þá er best að reyna að hitta með skyrinu í andlit hvers annars og muna að klína því líka í hárið.  Það virkar eins og góð hárnæring.  Mýkir hárið og gerir það glansandi.  Held ég.   

. 

  Myndin sýnir mann sem var búinn að telja þrjú þúsund og eitthvað rækjur þegar hann fipaðist í talningunni og þurfti að byrja að telja upp á nýtt.  Það kenndi honum að vera ekki með hugann við eitthvað annað.

Athugasemdir

[Magnús Geir Guðmundsson, 19.8.2008 kl. 23:32]

Fjandakornið félagi Jens, þetta er ekkert "Bara", heldur, eins og við segjum gjarna hérna fyrir norðan, hellings andskoti!

Fyrir utan hvítvínið annars já BARA hættulega sultvekjandi!

[Jenný Anna Baldursdóttir, 19.8.2008 kl. 23:34]

Jens þú átt ekki að ganga laus með uppskriftir villingurinn þinn.

[Þorsteinn Briem, 19.8.2008 kl. 23:42]

Þetta er Ólafur F. að telja kjósendur F-listans í síðustu borgarstjórnarkosningum. Þeir voru 6.527.

[Frænka Madonnu. (IP-tala skráð) 19.8.2008 kl. 23:46]

Er ekki bara málið að hreinsa skyrið úr eyrunum og gefa Madonnu og Stjórninni sjens,  Jens ?

[Ómar Ingi, 19.8.2008 kl. 23:53]

U can Keep it

[N.N. (IP-tala skráð) 20.8.2008 kl. 01:13]

Þetta hlaut auðvitað að vera of gott til að vera satt... að svona "skussi" eins og þú gætir gefið e-a frábæra uppskrift að einu eða neinu!!!  Njóttu sjálfur  

[Skattborgari, 20.8.2008 kl. 02:01]

Ég var akkurat að velta fyrir mér hvað ég ætti að hafa þegar ég fæ dömu í mat sem ég er að reyna við takk fyrir þessa frábæru uppskrift.

Einhvern veginn held ég að stefnumótin verði ekki fleiri ef ég nota þessa uppskrift.

Kveðja Skattborgari. 

[Einar Bragi Bragason., 20.8.2008 kl. 02:08]

Þakka meðmælin....þetta er ekkert annað

[Jens Guð, 20.8.2008 kl. 02:25]

  Maggi,  þetta er hellings andskoti með norðlenskum framburði!

  Jenný,  ég er að reyna að hemja mig með uppskriftirnar.  Ég luma á svo mörgum en reyni að halda þeim í nettu lágmarki.

  Steini,  ég held að rækjurnar séu einmitt 6527 í uppskriftinni þegar best lætur.

  Frænka Madonnu,  ég vil frekar hafa skyr í eyrunum.

  Ómar og N.N. ,  takk fyrir það.  Ég slæ ekki hendi á móti svona góðum forrétt.

  Skattborgari,  ég get lofað þér því að daman kolfellur fyrir þessu.  Það er jafnvel næsta víst að hún ber upp bónorð.

  Enar,  það er alltaf gaman að stríða þér smá.  Ég veit að þú þolir það.     

[Gunnar Pálsson, 20.8.2008 kl. 08:58]

Þennan rétt væri ekki galið að hafa til sölu á almenningssalernum.

[Þorsteinn Briem, 20.8.2008 kl. 09:52]

Ættrækinn hann er Órækja,
en ættin er samt tóm flækja,
hann tók feil,
hélt sig kokteil,
í raun fór í salat sú rækja.

[Einar Bragi Bragason., 20.8.2008 kl. 13:03]

jamm það er rétt....þoli það vel.....

[Rúna Guðfinnsdóttir, 20.8.2008 kl. 13:52]

Ég borða ekki rækjur...þær minna mig á túnsnigla. Sem krakki fékk ég einu sinni upp í mig snigil sem hafði setið á hundasúrublaði. Þetta er mér í fersku minni og þ.a.l. læt ég rækjur vera og verð ég því að sleppa annars girnilegri uppskrift. Kannski líka fullstór fyrir mína fjölskyldu, væri þó hægt að hafa afganginn daginn eftir.

Hilsener.

[Sigríður Inga Sigurjónsdóttir, 20.8.2008 kl. 20:40]

Ég stórefa að sítrónusafinn hjálpi mikið, ef átt er við alvarlega matareitranir.....Góð hugmynd annars, ef von er góðum gestum.

[Þorleifur S Ásgeirsson (IP-tala skráð) 21.8.2008 kl. 12:24]

Ég gæti líka  reddað þér hvalkjöti á 120 kr,kg ................................................................................................................................... í heilum skrokkum

Leifr

[Steingrímur Helgason, 21.8.2008 kl. 14:46]

Leifr; verðið er fínt, tvö kílódúzín takk...