Á plötu með skærustu poppstjörnum heims - til stuðnings mannréttindum í Tibet

  Í lok síðustu viku kom út safnplatan "Songs for Tibet".  Undirtitillinn er "The Art of Peace - Wisdom.  Action.  Freedom".  Platan er gefin út í tilefni Olympíuleikanna í Kína.  Henni er ætlað að fylgja eftir kröfu um mannréttindi,  tjáningarfrelsi og trúfrelsi í Tíbet.  Allur ágóði af sölu plötunnar rennur óskiptur til félagsskapar sem heitir Art of Peace Foundation.  Mér skilst að hann sé nátengdur Dalai Lama,  útlægum trúarleiðtoga frá Tíbet.

  Flytjendur laga á plötunni eru margar skærustu poppstjörnur heims.  Þær gefa allar eftir höfundarlaun sín af lögunum.  Meðal flytjenda á plötunni eru Sting,  Jackson Brown,  Alanis Morissette,  Moby,  Suzanna Vega,  Rush,  Joan Armatrading,  Garbage,  Dave Matthews,  Damian Rice,  John Mayer,  Ben Harper,  Underworld og færeyska söngvaskáldið Teitur. 

  Í huga okkar Íslendinga er álfadrottningin Eivör hin eina sanna færeyska poppstjarna.  Vissulega er hún súperstjarna á Íslandi,  í Færeyjum og vel þekkt í Danmörku,  Noregi,  Svíþjóð og víðar.  Og alltaf flott og frábær.  Á heimsmarkaði er hinsvegar Teitur töluvert stærra nafn.  Það er eins og sú staðreynd hafi ekki skilað sér til Íslands.

  Teitur er þokkalega vel kynntur í Ameríku.  Einkum í Bandaríkjunum,  Kanada og Grænlandi.  Lög hans eru í bandarískum kvikmyndum og sjónvarpsþáttum.  Myndbönd hans eru sýnd í bandaríska MTV og líka í MTV í Evrópu.  Það segir sitthvað um stöðu Teits á heimsmarkaði að hann skuli vera í slagtogi með öllum þessu heimsfrægu poppstjörnum á plötunni.  Það er sömuleiðis mikill heiður fyrir Teit að lögin á plötunni voru valin af Sting.

  Plötur Teits eru 4ra og 5 stjörnu plötur.  Ég mæli sérstaklega með "Káta horninu",  plötu sem fæst í versluninni Pier í turninum við Smáratorg.  Afskaplega notaleg plata.  Teitur er gott söngvaskáld og góður flytjandi.  Hann er áhugasamur um mannréttindi og með rétta afstöðu til tónlistar.  Það segir honum enginn fyrir verkum.  Hann gerir hlutina á sínum forsendum. 

  Þó "Káta hornið" sé einskonar vísnapoppsplata vísar umslagið til "London Calling" með The Clash og plötu sem ég man ekki hvað heitir með Elvis Presley.

Athugasemdir

[Ómar Ingi, 18.8.2008 kl. 23:46]

Skyldi diskurinn vera í lagi ?

[Birgitta Jónsdóttir, 19.8.2008 kl. 04:57]

Við sem skipulögðum Kerti fyrir Tíbet fengum að hlaða niður disknum án endurgjalds til að nota við athöfnina. Ég notaði lagið hans Moby með myndbandi sem ég gerði eftir athöfnina og verð að segja að þessi diskur er bara mjög góður. Lagið hans Teits er mjög gott:) ásamt öðrum gullmolum sem þarna eru að finna.

Frábær framkvæmd hjá Sting að setja þetta saman en hann er nú gamall baráttuhundur og hefur alltaf látið gott af sér leiða í gegnum tíðina. Platan fór í fyrsta sæti á itunes þegar hún kom þar út fyrir viku eða svo.

[ari feiti (IP-tala skráð) 19.8.2008 kl. 14:13]

Takk f. þetta. Áhugavert.

Áttaði mig einmitt á f. ári að Teitur var stærri en Eivör þegar hann var í viðtali á CNN og við BBC. Hefði póstað krækju á CNN viðtalið skemmtilega en það er dottið út. Sjá annars gamla frétt hér http://www.portal.fo/planet/?page=news&grein=37329