Miðilsfundur

 

  Fyrir nokkrum árum varð ég samferða vini mínum í flugvél út á land.  Við vorum báðir með námskeið í tilteknum kaupstað.  Af tillitssemi við þá sem þar voru nefni ég ekki staðinn.  Í flugvélinni ræddum við um miðilsfundi.  Vinur minn er grallari og ákvað að sprella.  Við bjuggum í heimavist framhaldsskóla.  Um kvöldið þóttist vinurinn falla í trans þar sem við sátum í sjónvarpssal með heimavistarbúum.  Vinurinn þóttist fá krampakast og náði að froðufella.  Ég tilkynnti viðstöddum að hann væri fallinn í miðilstrans.

  ALLIR viðstaddir keyptu grínið.  Vinurinn þuldi upp algengustu íslensk mannanöfn og viðstaddir gáfu sig fram sem ættingjar og aðstandendur framliðinna.  Vinurinn bar þeim skilaboð að hætti miðla.  Honum þótti þetta svo kjánalegt að hann fór að tiltaka sértækari og furðulegri dæmi.  Ekkert lát varð á viðbrögðum viðstaddra sem töldu sig kannast við skilaboðin.

  Vinurinn gekk ennþá lengra í sprellinu og gaf upp sjaldgæft íslenskt nafn.  Enginn kannaðist við það.  Þá sagði vinurinn:  "Fyrirgefið.  Viðkomandi ætlaði að mæta á miðilsfund á Hvammstanga en villtist."

  Enginn fattaði djókið.  Annað eftir þessu.  Vinurinn bullaði út í eitt og allir voru gagnrýnislausir á bullið.

  Daginn eftir kallaði einn heimavistardrengja vininn á eintal.  Sagðist hafa skýrt mömmu sinni frá miðilsfundinum og þau mæðgin væru tilbúin að borga vininum pening fyrir að setja upp einkamiðilsfund með þeim.  Faðir drengsins var nýlega fallinn frá og þau mæðgin langaði að ná sambandi við föðurinn.

  Þá var vini mínum nóg boðið.  Hann sagði:  "Undir þessum kringumstæðum skulið þið ekki koma nálægt miðilsfundum.  Alls ekki.  Forðist allt slíkt eins og þið mögulega getið."   

Athugasemdir

[Hannes, 1.10.2009 kl. 00:25]

hahaha skemmtileg saga og sýnir vel hve fáranlegt það er að trúa miðlum enda ekkert nema þvæla alveg.

Á ekki að svvara kommenti númer 11?

[Helga Kristjánsdóttir, 1.10.2009 kl. 01:21]

Það er bara fullt af fólki sem gleypir við svona upp á komum. Kúnstin hjá miðlum er að segja nógu mikið,hitta þá alltaf á e.h.   Viðurkenni að það væri gaman að prufa að fara til einhvers,oft verið beðin um það,bara ekki nennt.Hrædd um að ég yrði óþarflega hæðin,ekkert gaman að stuða fólk sem ekkert hefur gert manni. En í þessari sögu snýr "miðillinn" á fólk en tók reyndar ekkert gjald fyrir.       Hef spáð í bolla fyrir áeggjan,hitt ótrúlega á ´það sem  fólki hugnast vel og "passar".  

[Hörður Halldórsson, 1.10.2009 kl. 08:22]

Kannast þú við mann sem heitir Sigurður ? Og konu sem heitir Guðrún ?

[Hörður Halldórsson, 1.10.2009 kl. 08:23]

 En Líkafrón.Gottskálk eða Hallberu ?

[Matthías Ásgeirsson, 1.10.2009 kl. 09:13]

Skemmtileg saga.

Hér er pistill um háttlestur, sem er ein helsta aðferð miðla.  Þegar maður þekkir þessar aðferðir er stundum pínlegt að fylgjast með miðlum eins og Þórhalli, þeir eru flestir svo rosalega lélegir.  Mætti ég þá frekar biðja um fagmenn eins og Derren Brown.

[Jón Logi (IP-tala skráð) 1.10.2009 kl. 10:22]

Fór nú einu sinni á miðilsfund og vorum við tveir hjá miðlinum. Ég kom svona í skyndingu þannig að hún vissi ekki hvað ég hét eða starfaði. En styst er frá því að segja að þetta var svolítið svona þessi formúla, "Þekkirðu einhvern Einar" o.s.frv. og reyndi ég að vera eins passívur og skeptískur eins og ég gat, og lét ekki yfirheyra mig.

Nema hvað, að allt í einu fór hún að segja mér af hlutum allt í kringum mig sem allir pössuðu. Hverjir úr ættinni voru farnir, lýsingar á þeim, lýsingar á umhverfi, bæjarnöfn, og svo framtíðarspá sem reyndar rættist algerlega. Þarna komu upp hlutir sem ekki var séns að hún gæti vitað, og þurfti ég að leggjast í smá rannsóknarvinnu til að fá vissu. Maður varð náttúrulega bara kjaftstopp á eftir, og er nú skoðun mín að það séu bæði til ekta og fals, og hjá þeim ekta sé þetta svona svipað og að bera útvarpsfréttir sem heyrast dauflega úr næsta herbergi.

Þekkti aðra svona sem sá í gegnum holt og hæðir, en stundaði þetta ekki. Þar var það sama uppi á teningnum, nema hún spurði ekki, bara sagði. Og það fór um mann hrollur þegar hún sagði mér hluti sem ég einn vissi.....

Margt skrítið í kýrhausnum

[DoctorE (IP-tala skráð) 1.10.2009 kl. 12:19]

Já Jón Logi... þú gleypir svona eins og hver annar fornmaður.

James Randi hefur í mörg ár boðið hverjum þeim sem getur sýnt fram á yfirnáttúrulega hæfileika 1 milljón dollara... hvernig ætli það standi á því að miðlar og aðrir súperdúdar eru svona óviljugir að fá alla þessa peninga.. hvernig stendur á því að þeir fáu sem hafa farið til Randi hafa allir verið afhjúpaðir sem svindlarar og eða með geðræn vandamál...

Þeir sem trúa á svona vitleysu eru eingöngu að afhjúpa eigin einfeldni... afhjúpa að þeir eru með kýrhaus

[Ía Jóhannsdóttir, 1.10.2009 kl. 16:52]

Sé að hér hefur engin kona komið inn svo ég stenst ekki mátið.  Farið varlega strákar mínir þið vitið ekki hver er að fylgjast með ykkur núna múuuuuuhaaaaaaaa..........  það er ekki öll vitleysan eins skal ég segja ykkur elskurnar.

[Jens Guð, 1.10.2009 kl. 18:51]

  Hannes,  kommenti #11?  Þú ert þá að vísa í komment við aðra bloggfærslu en þessa.  Ég held að ég sé búinn að svara öllum kommentum nema við þessa færslu.

  Varðandi miðilsfundinn úti á landi þá varð ég mest hissa á hvað unglingarnir í heimavistinni voru algjörlega gagnrýnislausir.

[Jens Guð, 1.10.2009 kl. 19:01]

  Helga,  þessi náungi var svo undrandi á trúgirni fólksins og ánægður með hve honum tókst vel upp að hann ætlaði að setja upp glæsilegan miðilsfund í Reykjavík.  Hann var byrjaður að undirbúa sig þegar tengdamóðir hans heyrði af þessu og brást hin versta við.  Hótaði að hún myndi afhjúpa sprellið áður en af fundinum yrði. 

[Jens Guð, 1.10.2009 kl. 19:05]

  Hörður,  já,  ég kannast við nokkra Sigurði og nokkrar Guðrúnur.  Líka marga Guðmundi og Kristínur.  Þetta virkar alltaf.

[Jens Guð, 1.10.2009 kl. 22:47]

  Hörður,  það er hið skrítna að miðlar virðast bara ná allra algengustu mannanöfnum.

[Jens Guð, 1.10.2009 kl. 22:51]

  Hvenær heyrir þú miðil segja:  Hér er Gottskálk Hróbjartur og er með skilaboð til Hallberu Sigþrúðardóttur?  Nei,  það eru bara Sigurður,  Guðmundur,  Jón og Guðrún...

[Jens Guð, 1.10.2009 kl. 22:54]

  Matti,  bestu þakkir fyrir hlekkinn.  Þarna kemur fram allt sem segja þarf.  Þar fyrir utan:  Viva Pantera!

[Jens Guð, 1.10.2009 kl. 23:25]

  Jón Logi,  áttu upptöku af miðilsfundinum?  Ég hef margoft farið á miðilsfund með fólki sem upplifir bullið í miðlinum gjörólíkt mér.  Það sem ég heyri á miðilsfundinum er fálm út í loftið og eitthvað sem allir Íslendingar geta samþykkt og þekkt sig í:  Dæmi:  "Ég þarf að tengja þig við sveit" (hver getur ekki tengt sig við sveit?);  "Það er eins og sjávarþorp,  sjór,  litlir bátar.." (hver getur ekki tengt sig við sjávarþorp?),  "það er eitthvað listrænt í ættinni..." (einhver gefur sig fram:  "Bróðir pabba spilaði á harmónikku."  Miðillinn:  "Takk fyrir."). 

  Ég hef setið á svona miðilsfundum þar sem "fórnarlambið" gefur miðlinum upp allt sem miðillinn þarf að heyra.  Samanber sjúkraflutningamanninn Sigurbjörn í "Lífsauganu".  Eftir á undrast aulinn hvað miðillinn vissi mikið um hann.  Allt stóðst.  Þetta var alveg ótrúlegt.

  Ég hef aldrei heyrt upptöku frá miðilsfundi sem stenst gagnrýna skoðun.  Bara heimskulegt þvaður um eitthvað sem skiptir engu máli og trúgjarna sem oftúlka bullið í miðlinum. 

  Ef þú átt upptöku af miðilsfundinum er ég áhugasamur að fara yfir hana.  Þegar séra Eðvarð Ingólfsson vinur minn og prestur á Akranesi lærði til prests voru upptökur af miðilsfundum krufnir til mergjar.  Þvílíkt heimskurugl sem þær upptökur afhjúpuðu og bentu fyrst og fremst á hvað trúgjarnir eru rosalega viljugir til að teygja sig langt í að fatta ekki þvæluna.  Og fatta ekki hvað þeir gefa miklar upplýsingar upp í hendur á miðlinum. 

  Til að trúa á hæfileika miðils þarf:  a) Að trúa því að dáið fólk sé draugar.  b) Að draugarnir hafi ekkert gáfulegt að segja.  c)  Að draugarnir eigi erfitt með að tjá sig með fullu nafni en geti skýrt og skilmerkilega þulið upp almennar klisjur um viðkomandi skuli fylgja hjartanu,  hugsi of lítið um sjálfa sig og einhver þeim tengdur sé að læra nýtt tungumál.  Annað í þeim dúr.    

[Jens Guð, 1.10.2009 kl. 23:28]

  DoctorE,  150 miðlar hafa spreytt sig við að standast skoðun.  Allir hafa kolfallið á prófinu.  Svo illilega að þeir hafa ekki einu sinni náð lágmarksárangri í samanburði við kalda ágiskun.

[Jens Guð, 1.10.2009 kl. 23:32]

 Ingibjörg,  hver ætli sé að fylgjast með mér.  Stefán heitinn afi minn lofaði mér því að hann myndi sanna fyrir mér tilvist sína sem draugur.  Síðan eru liðin 33.  Ég hef mætt á marga miðilsfundi en afi ekki náð að standa við orð sín.  Hvað klikkaði?

[Jens Guð, 1.10.2009 kl. 23:35]

  Til gamans má geta að kjánarnir sem mæta í  Lífsaugað  á Skjá 1 þurfa að gefa upp kennitölu sína.  Það virðist ekki kveikja gagnrýna hugsun hjá bjálfunum sem gera sig að fífli í þættinum.

[Hannes, 2.10.2009 kl. 00:17]

Jens smelltu á linkinn á 11? og þá færðu færsluna upp gamli. Fólk heyrir það sem það vill heyra og gagnrýnir ekki ef hann segir eitthvað sem það býst við að heyra.

[DoctorE (IP-tala skráð) 2.10.2009 kl. 07:25]

Það er einmitt málið Jens, að menn eins og Þórhallur fái að reka sig undir þeim formerkum að þeir geti talað við þá dauðu.. það er glæpur.
Að sjónvarpstöðvar taki þessa menn inn sem eitthvað alvöru dæmi, það er viðbjóður að auki... nærast á sorg annarra í ágóðaskyni, er eitthvað verra en það... ekki margt

[Birna Dis Vilbertsdóttir (IP-tala skráð) 2.10.2009 kl. 09:36]

Það er "raunveruleikaþáttur"á skjá 1 sem er eins og þessi "miðilsfundur". 

[DoctorE (IP-tala skráð) 2.10.2009 kl. 10:17]

Við skorum náttlega á Þórthall að skella sér til James Randi, ef hann fer ekki.. þá er hann að játa upp á sig svívirðilegan glæp, að játa upp á sig að hann er eins og hrægammur yfir fólki sem hefur misst ástvini.

Boltinn er hjá þér Þórhallur... við munum dæma þig eftir því hvað þú gerir núna... ok

[Jens Guð, 2.10.2009 kl. 13:54]

  Hannes,  hvar finn ég þennan link á 11?  Ég er rosalega fattlaus.

[Jens Guð, 2.10.2009 kl. 13:56]

  DoctorE,  ég tek undir áskorun þína um að Þórhallur spreyti sig hjá Randi.  Reyndar veit ég að hann veit upp á sig skömmina og þorir ekki.  Enda myndi hann kolfalla á prófinu eins og hinir 150 sem hafa spreytt sig.

[Jens Guð, 2.10.2009 kl. 13:58]

  Birna Dís,  ég hef séð þann þátt.  Þar er gengið ansi langt í að gera fólk að fíflum.

[Hannes, 2.10.2009 kl. 18:05]

Á kommenti númer eitt Jens og ég skal setja hann aftur inn. Má bjóða þér að fá númer hjá geðlækni líka?

[Jens Guð, 2.10.2009 kl. 18:19]

  Hannes,  ég biðst afsökunar.  Ég fattaði ekki að þú værir með hlekk á 11.  Sá það bara ekki.  Bæði er ég mjög sjóndapur en einnig er í tölvunni minni lítill blæbrigðamunur á svörtu letri og brúnu.  Einhverra hluta vegna yfirsást mér líka þetta komment þitt #11.  Ég hélt að ég væri búinn að svara öllum kommentum.  Kannski ætti ég að þiggja númer hjá geðlækni?

[Hannes, 2.10.2009 kl. 18:40]

Farðu á Já.is þú finnur marga þar inni.

[Jens Guð, 2.10.2009 kl. 20:17]

  Hannes,  mér dettur í hug einfaldari aðferð:  Að skera mataræði dagsins niður um 1 bjór.

[Hannes, 2.10.2009 kl. 20:48]

Jens ég mæli með að þú bætir einni flösku af vískí og einum vindli við mataræði dagsins.

[Jens Guð, 2.10.2009 kl. 21:12]

  Hannes,  vegna skorpulifrar má ég ekki drekka neitt sterkara en bjór.  Vindill hljómar vel þó ég hafi ekki reykt vindil í 15 eða tuttugu ár.  Þykir hinsvegar lykt af vindlum rosalega góð.

[Gunnhildur Ólafsdóttir, 3.10.2009 kl. 00:27]

Þegar ég var í fjölbraut þá fór sálfræðikennarinn einmitt með okkur bekkinn á miðilsfund til transmiðils eins. Hann féll fljótt í sitt trans og umbreyttist allir. Svo birtust allskonar liðnir menn í honum. Allir löngu dánir og töluðu hver með sinni röddinni og sögðu sögur að drykkju og hetjuskap. Enginn þessara manna sagði þó neitt merkilegt frekar en fyrri daginn. Þessi svokallaði miðill var samt asskoti góður leikari. Svo góðir að megnið að bekknum trúði öllu og voru annaðhvort skíthrædd eða ætlaðu að hella sér á fullt í miðlastörf eftir babblið! Skil bara ekki hve margir trúa enn á miðla þrátt fyrir að flestar rannsóknir á þeim hafa ekki sýnt fram á annað en lygar og bullshit. Aldrei staðfestingu!?

[Jens Guð, 3.10.2009 kl. 13:43]

  Gunnhildur,  það er svo furðulegt að miðlarnir virðast aldrei koma með neitt merkilegt frá draugunum.  Annað furðulegt er að miðill þarf ekki að vera góður leikari til að trúgjörn hjörðin kaupir bullið.  Og sannaðu til:  Þó að þessi Lára sem gerði sig að fífli með spá um jarðskjálfta á dögunum þá hefur áreiðanlega ekkert fækkað fíflunum sem trúa á hæfileika hennar sem miðils.  Ekki vantaði hópinn sem trúði jarðskjálftaspánni og flýði frá Suðurlandi með börn og brothætta hluti.

  Önnur Lára var á síðustu öld dæmd sek fyrir að plata fólk með miðilsfundum.  Sönnunargögn fundust heima hjá henni og hún og dóttir hennar upplýstu fúslega hvernig platið fór fram.  Engu að síður dró hvergi úr trú fólks á miðilshæfileika hennar.