Veitingahússumsögn

 

 - Réttur:  Þorrahlaðborð

 - Staður:  Fljótt og Gott,  Umferðarmiðstöðinni

 - Verð:  2900 kr.

 - Einkunn:  ***1/2 (af 5)

  Það er reisn yfir því hjá Fljótt og Gott að bjóða upp á þorrahlaðborð allan daginn alla daga í þorramánuði.  Á boðstólum er flest það helsta sem einkennir alvöru þorrahlaðborð:  Hrútspungar,  lundabaggar,  bringukollar,  lifrarpylsa,  blóðmör,  sviðakjammar,  sviðasulta,  grísasulta,  hangikjöt,  hvalur,  hákarl,  heitt saltkjöt og fjórir síldarréttir.  Margt af þessu annarsvegar súrt og hinsvegar nýtt (ósúrt).  Meðlæti er hrásalat,  grænar baunir,  rauðrófur,  heitar kartöflur með eða án jafnings,  heit rófustappa og heit kartöflumús,  svo og flatkökur, rúgbrauð og soðbrauð.  

  Ástæðan fyrir því að hlaðborðið fær ekki fullt hús stiga er eftirfarandi:  Saltkjötið var þurrt og helst til feitt (ég veit að margir kjósa bitana sem feitasta.  Það má líka föndra við að skera fituna af).  Sennilega hafði það staðið lengi á hitaborðinu þegar mig bar að garði (um kvöldmatarleyti).  Sama á við um jafninginn.  Hann rétt huldi botn skálarinnar og var orðinn hnausþykkur og hlaupkenndur.  Aðeins ein lítil og þunn sneið lá í skál undir súran hval.  Hún hafði legið þar í vökva nógu lengi til að vera orðin lin og hálf slepjuleg.  

  Áreiðanlega eru þessir hlutir í góðu lagi þegar nýbúið er að fylla á skálarnar og bakkana.  En að sjálfsögðu get ég aðeins gefið einkunn fyrir hlaðborðið eins og það stóð mér til boða.  Að auki saknaði ég pínulítið magáls og harðfisks.  Engu að síður hrósa ég veitingastaðnum á BSÍ fyrir framtakið.  Ég mæti þangað aftur.  Og aftur.    

  Viðbót sett inn 1. febrúar:  

  Í gær var búið að bæta harðfisk við á þorrahlaðborðið.  Jafnframt var búið að strengja plastfilmu yfir saltkjötið þannig að það þornaði ekki.  Var safaríkt og gott.  Ég læt samt einkunnina standa því að hún á við um hlaðborðið eins og það var þá.   

Athugasemdir

[Ásthildur Cesil Þórðardóttir, 27.1.2013 kl. 22:24]

Þorramatur er góður, ég var á þorrablóti í gær hjá Frjályndaflokknum, og í dag hjá fjölskyldu unnusta dóttur minnar á Hellu, og ég er alveg uppfull af góðum þorramat í kvöld.

Var að vona að þú mættir í gær Jens minn.

[Jóhann Kristinsson, 28.1.2013 kl. 03:33]

Gott að fá uppástungur um góða veitingastaði og hvað mætti gera til það staðirnir væru 100%.

Gefur fólki hugmynd um hvort það ætti að líta yfir vankantana og fara á staðinn eða kanski bara gleyma þessum stað.

Kveðja frá Las Vegas

[Stefán (IP-tala skráð) 28.1.2013 kl. 08:33]

Hmmm, er Frjálslyndi-flokkurinn enn til, hver er starfsemin Ásthildur ?  En gott að vita af því að við losnum við Árna Johnsen og Herbert Þór af þingi og þótt fyrr hefði verið.   Alltaf eitthvað til að gleðjast yfir í öllu volæðinu, bara að þjóðin myndi nú losna við Bjarna margvafna Ben líka.  Og Vinstri-grænir að hverfa, farið hefur fé betra en þeir grænu fúlu, sundurlausu afturhaldsseggir.

[Númi (IP-tala skráð) 28.1.2013 kl. 08:49]

Jens,þessi veitingastaður er þú þarna nefnir,finnst mér vera farin að dala ansi mikið,ég er nýbúin að taka þá ákvörðun að fara þarna  aldrei  aftur. Ástæðan er sú að maturinn er farin að þorna um of líkt og þú ritar þarna ofar,hann er látin standa klukkutímum saman á hitaplötum,eftir að hann hefur verið eldaður,og biximaturinn þarna er eitur í mínum huga þvílíkt jukk sem sett er í hann.Sé eftir þessum stað,en þetta er mín reynsla.

[Stefán (IP-tala skráð) 28.1.2013 kl. 09:21]

Ekki er nú Tryggvi Þór Herbertsson mér eftirminnilegri þingmaður en svo að ég kalla hann óvart Herbert Þór hér að ofan.

[Ásthildur Cesil Þórðardóttir, 28.1.2013 kl. 13:18]

Stefán flokkurinn er ennþá til og í starfsemi, reyndar núna undir merkjum Dögunar, en við höldum hópinn eins og stór samlynd fjölskylda eftir hörmungar undanfarinna ára.  Gott fólk og heilbrigt í hugsun og stefnan sem fyrr fólkinu til handa.

[Stefán (IP-tala skráð) 28.1.2013 kl. 13:36]

Takk fyrir svarið Ásthildur, hef heldur ekki nokkuð út á þennan flokk að setja nema það að einn fyrrum borgarstjóri í nafni flokksins kom mér eitthvað undarlega fyrir sjónir.  Til hamingju allir með málalokin í Icesave málinu.   Hef ekki heyrt neitt um þetta frá Svavari Gestssyni ???

[Ásthildur Cesil Þórðardóttir, 28.1.2013 kl. 13:39]

Takk Stefán minn, já Svavar skrýtið að fjölmiðlar hafa ekki reynt að ná í hann til að spyrja um málið.  Ætli hann liggi ekki undir feldi og skammist sín.  Enda var hann sendur til að koma með samning bara einhverskonar samning því það lá á að senda inn ESB umsóknina.

[Stefán (IP-tala skráð) 28.1.2013 kl. 13:52]

Já, megi þeir sem fengu Svavar í verkefnið bara leggjast með honum undir feldinn og skammast sín með honum !

[Ásthildur Cesil Þórðardóttir, 28.1.2013 kl. 14:03]

Já einmitt, þetta er örugglega frekar stór feldur eða bara nautshúð.. eða þannig.

[Jens Guð, 28.1.2013 kl. 21:08]

  Ásthildur Cesil,  það stóð til að mæta á Þorrablót Frjálslynda flokksins.  En ég kvefaðist.  Þá fannst mér sem það væri ónærgætið að mæta og smita aðra af kvefi.  Jafnframt nýtur maður sín ekki á mannamótum hóstandi með stíflað nef og vanlíðan.  

[Jens Guð, 28.1.2013 kl. 21:28]

  Jóhann,  ég er einmitt að vonast til þess að svona veitingahússumsögn geti gefið lesendum hugmynd um hvað í boði er á viðkomandi stað og hversu vel tekst til.  Fólk veit þá að hverju það gengur.  Sjálfur hafa umsagnir annarra af viðskiptum og heimsóknum á matsölustaði oft verið mér hjálpleg.  Ég elda ekki sjálfur heldur borða á matsölustöðum.  Það er alltaf gott að uppgötva nýja kosti - eða forðast staði sem að sögn viðskiptavina er ekki þess virði að sækja.

  Ég er reyndar alltof latur við að skrifa veitingahússumsagnir.  Geri það alltof sjaldan.  Engu að síður hef ég margoft orðið var við að kokkar á þessum stöðum hafa lesið umsögn mína.  Væntanlega sér til gagns.  Einhverjir hafa sett inn á heimasíðu veitingastaðarins tilvitnanir í umsögn mína.  Einn veitingastaður rammaði umsögn mína inn og hafði uppi á vegg.  Fyrir röskum mánuði var ég staddur í vínbúð.  Þá vatt sér að mér kokkur - mér ókunnugur - kynnti sig og útskýrði fyrir mér aðstæður og ástæður fyrir því hvers vegna hlutir voru eins og þeir voru á veitingastað sem ég hafði skrifað um.

  Í enn eitt skiptið skrifaði ég um veitingastað í verslunarkjarna úti á landi.  Ári síðar eða eitthvað átti ég leið þar um aftur.  Eigandinn,  sem jafnframt er kokkurinn,  bar kennsl á mig.  Hann þakkaði mér fyrir jákvæða umsögn og bauð mér upp á kaffi og meðlæti.  

  Ég gæti þulið upp fleiri dæmi.   

[Jens Guð, 28.1.2013 kl. 21:47]

  Stefán,  Ásthildur Cesil er búin að svara fyrir Frjálslynda flokkinn.  Ég veit ekki hvort að í gangi var eitthvað miðstýrt vel hannað prógramm hjá sjöllum til að kasta Árna og Tryggva Þór út í kuldann,  flokknum til framdráttar.  

  Ég varð var við það á facebook að ólíklegustu menn beittu sér í smölun fyrir Kristján Þór Júlíusson.  Þegar þeir voru spurðir að því hvers vegna í ósköpum þeir væru að standa í slíku - Kristján Þór væri ekki þess virði að berjast fyrir hann í prófkjöri - var svarið:  "Hann er skárri kosturinn.  Tryggva Þór verður að fella."

  Þetta viðhorf sá ég á fleiri en einum og fleiri en tveimur facebókarspjallþráðum.  En ég sá enga umræðu um Árna Johnsen - fyrr en eftir úrslit prófkjörsins.  Þá var almennur fögnuður með úrslitin.  

[Jens Guð, 28.1.2013 kl. 21:59]

  Númi,  ég snæði oft á BSÍ.  Kosturinn er sá að það er hægt að velja úr mörgum réttum og salatbarinn er ágætur.  Verðið hefur verið að þokast dálítið upp.  Þumalputtaregla - sem á við um alla veitingastaði - er að biximatur er ekki besti kostur. 

[Jens Guð, 28.1.2013 kl. 22:00]

  Stefán (#5),  það er svo broslegt að ég hef rekist á fleiri ruglast á nafni hans á sama hátt. 

[Jens Guð, 28.1.2013 kl. 22:05]

  Ásthildur Cesil (#6),  ég er verulega ánægður með að okkur í Frjálslynda flokknum tókst að ná saman þessari breiðfylkingu með Hreyfingunni,  Borgarahreyfingunni og stjórnlagaráðsfólki undir merkjum Dögunar.  Núna þegar Lilja Mósesdóttir hefur yfirgefið Samstöðu eru vonandi einhverjar líkur á að þeir sem þar eru taki höndum saman við Dögun. 

[Ásthildur Cesil Þórðardóttir, 29.1.2013 kl. 00:48]

Já svo sannarlega vona ég það líka Jens minn.