Bestu lög síðustu 6 áratuga

  Breska popptónlistarblaðið New Musical Express er sextíu ára.  Til hamingju með það.  Þetta er vikublað.  Það hefur náð að hrista af sér alla keppinauta í áranna rás.  Um hríð atti það kappi við fjölda annarra popptónlistarvikublaða (Melody Maker,  Sounds, Record Mirror...) sem öll lognuðust út af, hægt og bítandi. 

  New Musical Express er næst söluhæsta popptónlistarblað heims (á eftir bandaríska Rolling Stone).  Það mokselst í Bandaríkjunum og út um alla Evrópu.  Í Bandaríkjunum er NME selt í öllum blaðsölustöndum úti á gangstéttum.  Bandarísk poppblöð,  önnur en Rolling Stone, eru ekki til sölu í þessum blaðsölustöndum.  Þau fást aðeins í bókabúðum.  NME hefur mikil áhrif í popptónlistarbransanum og er breskri popptónlist ómetanlegur sendiherra.

  Í tilefni afmælisins hefur New Musical Express leitað til fjölda rokkstjarna til að setja saman lista yfir bestu lög sem komið hafa á markað á líftíma New Musical Express.  Ég er sjaldan verulega óánægður með svona lista.  En þeir eru samt aldrei alveg eftir mínu höfði.  Þessi listi er meira á skjön við mín viðhorf en flestir aðrir listar.  Engu að síður er ég sáttur við toppsætið.  Þar fyrir utan lít ég svo á að eiginleg sætaröð skipti ekki miklu máli.  Mikilvægara er að viðkomandi lag sé á listanum.  Svo er þetta nú bara léttur samkvæmisleikur.  Engin ástæða til að taka hann of alvarlega.  Þetta er líka góð ástæða til að rifja upp kynni við mörg frábær lög.

1. Joy Division – 'Love Will Tear Us Apart'
2. Pulp – 'Common People'

3. David Bowie – '"Heroes"'
4. The Beach Boys – 'Good Vibratons'
5. New Order – 'Blue Monday'
6. The Stone Roses – 'She Bangs The Drums'
7. The Smiths – 'There Is A Light That Never Goes Out'

8. The Specials – 'Ghost Town'
9. Dizzee Rascal – 'Fix Up, Look Sharp'
10. Oasis – 'Wonderwall'
11. The Rolling Stones – 'Sympathy For The Devil'
12. The Ronettes – 'Be My Baby'
13. Michael Jackson – 'Billie Jean'

14. Sex Pistols – 'God Save The Queen'

15. The Beatles – 'A Day In The Life'
16. The Cure – 'Boys Don't Cry'
17. Bob Dylan – 'Like A Rolling Stone'
18. The Beach Boys – 'God Only Knows'
19. Madonna – 'Like A Prayer'
20. The Stone Roses – 'I Am The Resurrection'

  Lesendum var boðið upp á að setja saman samskonar lista.  Hann er glettilega líkur.  Svo kannski er þetta bara dálítið eins og staðan er.

1. Joy Division - Love Will Tear Us Apart

Einkunn: 8.18

2. The Cure - Boys Don't Cry

Einkunn: 8.02

3. Nirvana - Teen Spirit

Einkunn: 7.90

4. The Smiths - There Is A Light That Never Goes Out

Einkunn: 7.68

5. Oasis - Wonderwall

Einkunn: 7.62

6. Arctic Monkeys - I Bet You Look Good On The Dancefloor

Einkunn: 7.60

 

7. The Clash - London Calling

Einkunn: 7.58

8. The Strokes - Last Night

Einkunn: 7.51

9. The Killers - Mr Brightside

Einkunn: 7.50

10. The Kinks - You Really Got Me

Einkunn: 7.50

11. Pulp - Common People

Einkunn: 7.46

12. The Smiths - How Soon Is Now?

Einkunn: 7.42

13. The Rolling Stones - Paint It Black

Einkunn: 7.31

14. The Who - My Generation

Einkunn: 7.29

15. The White Stripes - Seven Nation Army

Einkunn: 7.23

16. Sex Pistols - God Save The Queen

Einkunn: 7.21

 

17. Bob Dylan - Like A Rolling Stone

Einkunn: 7.18

18. The Beatles - Eleanor Rigby

Einkunn: 7.13

19. The Verve - Bittersweet Symphony

Einkunn: 7.12

20. David Bowie - Heroes

Einkunn:  7,12

Bestu hljómsveitanöfnin

  Spin er næst söluhæsta bandaríska tónlistarblaðið á eftir Rolling Stone.  Í nýjasta heftinu hafa Spin-verjar tekið saman áhugaverðan lista yfir bestu hljómsveitarnöfnin.  Listinn er unninn út frá mörgum sjónarhornum.  Meðal annars hvað nafnið gerir fyrir ímynd hljómsveitarinnar,  hvernig samspil nafnsins og hönnun vörumerkisins (logo) virkar,  hvernig nafnið hljómar á alþjóðamarkaði og sitthvað fleira.  Vægi hvers þáttar varðandi nafnið fær tiltekin stig og samtalan raðar nöfnunum í sæti á listanum.  Niðurstaðan er þessi:

1  Motorhead

  Nafnið var upphaflega heiti á sönglagi um spítthausa (dópista).  Lagi sem Lemmy,  forsprakki ensku Motorhead,  samdi og gaf út með hljómsveitinni Hawkwind.  Motorhead-tríóið spilar hrátt,  hart og "röff" 3ja mín rokk.  Lemmy var rekinn úr Hawkwind vegna dópneyslu.  Nafnið hljómar eins og yfirlýsing á einhverju vondu.  Sú er einmitt ástæðan fyrir því að embættismenn ÁTVR (vínsölu á Íslandi) settu bjór með samnefndu heiti á bannlista.  Í forsjárhyggju sinni telja þeir vera hættu á að þeir sem komist í tæri við mjöðinn verði dópistar og glæpamenn.  Með því að banna drykkinn á Íslandi er Íslendingum forðað frá slíkum örlögum.   

2  MC5

  Nafnið hljómar eins og raðnúmer fyrir eitthvað sem hefur verið stimplað út úr bílaiðnaði í bílaiðnaðarborginni Detroit (Motor City).  Númerið 1 stendur þar fyrir sportbíla og vopn.  Númerið 2 stendur fyrir kraftmikla bíla.  Og svo framvegis.  Númer 5 er tilvísun í lag blúsjöfursins Johns Less Hookers  Motor City is Burning.  Það fjallar um mannréttindabaráttu blökkumanna.  Talan 5 hefur skírskotun til margra annarra hluta.  Til að mynda bresku hljómsveitina Dave Clark Five,  hljómsveitar sem liðsmenn MC5 skilgreindu sem Bítla-wanna-be.  Já,  hlómsveitin MC5 er frá Detroit.  Herská hljómsveit sem spilaði pönk mörgum árum áður en pönkið varð til sem skilgreindur músíkstíll.  Þekktasta lag MC5,  Kick Out The Jams, hefur verið krákað (cover song) af ótal seinni tíma spámönnum, allt frá Rage Against the Machine til ótal pönksveita.

3  NWA

  Skammstöfun fyrir Niggaz With Attitude (Negrar með afstöðu).  Bandarísk rapp hipp-hopp hljómsveit sem reif kjaft og gerði grín.  Einstakir liðsmenn NWA áttu síðar farsælan sólóferil.  Frægastur þeirra er Ice Cube.         

4  Big Star

  Táningapoppsveit sem ég veit fátt um annað en að hún var leiðinleg.  En nafnið er öflugt fyrir þannig hljómsveit.

5  Joy Division

  All svakalegt og óhugnanlegt nafn á enskri nýrokkssveit.  Nafnið er sótt í fangabúðir þýskra nasista sem hýstu kynlífsþræla. 

6  Dead Kenndys

  Bandarísk pönksveit sem hélt á lofti dauðaslysi er þingmaðurinn Ted Kenndy ók blindfullur út af brú.  Kærasta hans drukknaði og hann flúði af vettvangi.  Nafnið vísaði jafnframt til þess að fleiri úr Kennedy-fjölskyldunni féllu frá langt fyrir aldur fram.  John F. Kennedy,  forseti Bandaríkjanna, var myrtur.  Einnig dómsmálaráðherrann Robert Kennedy.  Afar ósmekklegt nafn á hljómsveit en þetta var, jú,  ruddaleg pönkhljómsveit.

  Þegar ég gerði út pönkplötubúðina Stuð á Laugavegi fór meðeigandi minn í innkaupaferð til New York.  Hann mætti á plötuheildsölu og hugðist kaupa plötur með Dead Kennedys.  Afgreiðslumaðurinn þekkti ekki hljómsveitina og trylltist.  Reiddi hnefa til höggs og spurði hvaða ósmekklegi brandari þetta væri um dauðsföll Kennedy-manna.

  Nokkru síðar var ég staddur í Florida og keypti þá nýútkomna plötu með Dead Kenndys.  Afgreiðslumaðurinn lagði hart að mér að vera á varðbergi gagnvart þessari hljómsveit.  Hún væri klámfengin og orðljót.  Það væri alfarið á mína ábyrgð að kaupa plötu með svo óforskammaðri hljómsveit.  Ég yrði að taka ábyrgð á þeim gjörðum sjálfur.  Nokkru síðar var unglingur dæmdur í fangelsi í Florida fyrir að kaupa dónaplötu með rapphljómsveitinni 2 Live Crew.

  Sumir halda því fram að Jello Biafra, söngvari Dead Kenndys, sé samkynhneigður.  Það skiptir svo sem engu máli.  Ég tel þó líklegra að ef svo væri þá myndi hann vera opinskár um það.  Hann er þannig náungi. 

7  Brian Jonestown Massacre

  Mig rámar í að þessi hljómsveit sé Íslandsvinir.  Ég átta mig ekki á nafninu.  Það er einhver tilvísun í dópneyslu og öfga-Jesú-trúaruppátæki. 

8  Devo

  Nafnið er stytting á de-evolution (þróunarkenningu).  Stutt og töff nafn fyrir bandaríska nýbylgjuhljómsveit nýbylgjuáranna.  Söngvahöfundar The Rolling Stones,  Richards/jagger hafa ströng skilyrði fyrir höfundarrétti sínum.  Það má ekki flytja söngva þeirra nema í þeirra útsetningum og það má ekki þýða texta þeirra yfir á annað tungumál.  Til að mynda leyfðu þeir ekki að gefinn yrði út á plötu flutningur Bjarkar og PJ Harvey á þessu lagi.  En þeir lögðu blessun sína yfir þessa kráku (cover song) Devo. 

  Í óleyfi The Rolling Stones gáfu Sniglarnir út í sinni útgáfu lagið Honky Tonk Woman (Himpi gimpi gella) og Megas um Jonna Sig.  Uss, látum Stónsarana ekki vita af því. 

9  AC/DC

  Skammstöfun fyrir háspennu rafmagn.  Einnig slangur yfir bi-sexual.  Nafnið vísar þó frekar til þess að þetta sé ástölsk harð-rokk metal hljómsveit. 

10 Slayer

  Ég átta mig ekki á nafninu.  Það hefur eitthvað að gera með blóðþyrst ungmenni sem leiðist.  Nafnið er stytting á orðinu dragonslayer.  Það hefur einnig eitthvað að gera með Jesú-börn. 

  Fyrir nokkrum árum stóð ég á þessum vettvangi fyrir vali á besta íslenska hljómsveitarnafninu.  Spilverk þjóðanna sigraði með yfirburðum.  Síðar stóð - að mig minnir Fréttablaðið - fyrir samskonar skoðanakönnun og fékk sömu niðurstöðu. 

Grænlenski þjóðhátíðardagurinn

  Nú, 21. júní, er þjóðhátíðardagur Grænlands haldinn hátíðlegur um allt Grænland.  Jafnframt halda Grænlendingar búsettir utan Grænlands upp á daginn þar sem þeir eru staddir.  Einmitt líka í dag, 21. júní.  Af því tilefni syngur og spilar margur góður Grænlendingurinn óðinn um sólina,  Seqineq.  Magnað sönglag úr smiðju þungarokkssveitarinnar Piitsukkut.  Það var hljóðritað "live" í hljóðveri í einu rennsli.  Ég setti það á v-norræna safnplötu,  Rock from the Cold Seas, sem ég tók saman á tíunda áratugnum.  Það er um að gera að syngja hraustlega með.  Textinn er einfaldur:

Takuat seqineq nuisoq,

takuat aput aattoq,

takuat siku peeruttoq, takuat aasalersoruna.

Isivit takuai ilulissat immami,

isivit takuai imaq qillarissoq,

tassa illit nammineq

aamma uanga nunarput,

allanit tamanit kusanarnerusoq,

asanarnerusoq.

  Hægt er að hlusta á fleiri spennandi lög (fyrstu 30 sek af hverju lagi) á Rock from the Cold Seas með því að smella á þessa slóð:  http://www.emusic.com/listen/#/album/various-artists/rock-from-the-cold-seas/10825291/  (eða:  http://music.ovi.com/in/en/pc/Product/Various-Artist-TUTL/Rock-from-the-Cold-Seas/3284076 ).

Stórfenglegir færeyskir hljómleikar í Hörpu

  Færeyska álfadrottningin,  Eivör,  og færeyska heimspoppshljómsveitin Yggdrasil héldu óvænt hljómleika í kyrrþey í Hörpu í kvöld.  Í kyrrþey segi ég vegna þess að hljómleikarnir voru ekki auglýstir.  Ég held að miðasala hafi ekki einu sinni verið á midi.is.  Færeyingarnir sáu enga ástæðu til að gera eitthvað mál úr þessu.  Þetta var aðeins til gamans gert.   

  Hljómleikunum var "riggað" upp með hraði.  Eivör og Yggdrasil hefja nefnilega hljómleikaferð um Bandaríkin og Kanada á morgun.  Það er ekki beint flug frá Færeyjum til Ameríku.  Þess vegna fljúga þau frá Færeyjum til Íslands og héðan til Ameríku.  Komu til Íslands í dag og fara á morgun.  Þeim þótti upplagt að nota kvöldið til að spila í Hörpu, frekar en að gera ekki neitt.

  Hljómleikarnir spurðust út.  Mæting var góð.  Svo gott sem fullur salur.

  Yggdrasil er rösklega fertug heimspoppshljómsveit (world music) með sterkum djasskeim.  Músík hennar mætti einnig kalla frjálsan þjóðlegan djass (ethno-jazz).  Píanóleikarinn og tónskáldið Kristian Blak er forsprakki Yggdrasil.  Hugmynd hans var sú að Yggdrasil yrði sam-norræn hljómsveit.  Þannig skipuð var hljómsveitin framan af ferli.  Með tímanum hafa Færeyingar þó orðið ráðandi í henni.  En jafnan þó einhver útlendingur með.  Að þessu sinni er það sænski blásarinn Anders Hagberg.

  Eivör var söngkona Yggdrasil um 2ja ára skeið á fyrri hluta þessarar aldar.  Þetta var í fyrsta skipti sem hún syngur aftur með Yggdrasil.  Það var rosalega gaman á að hlýða.  Það var eins og Eivör og sextettinn hefðu ekki tekið sér svo mikið sem dags hlé,  svo vel smullu þau saman. 

  Að tveimur lögum afgreiddum hvarf sextettinn af sviði.  Eivör söng þá og spilaði við eigin undirleik,  m.a. nokkur splunkuný lög sem verða á plötu með henni er kemur út í lok ágúst.  Í þeim lögum naut Eivör aðstoðar bassa- og hljómborðsleikarans Mikaels Blaks.  Þetta var frumflutningur á þessum lögum á sviði.  Þau eru ljúf, falleg og gefa góð fyrirheit um plötuna. 

  Liðsmenn Yggdrasil fjölmenntu aftur á svið.  Eivör söng þá með þeim nokkur gömul færeysk lög.  Áheyrendur kunnu svo vel að meta að hljómsveitin var klöppuð ákaft upp.  Er hljómleikunum lauk tróðust gestir að söluborði með færeyskum plötum.  Þeir toguðust á um plötur með lögunum sem Eivör og Yggdrasil höfðu flutt.  Það staðfesti hversu mjög gestir höfðu heillast upp úr skóm.   

Vel heppnaðir afmælishljómleikar til heiðurs Paul McCartney

 

 - Viðburður:  Paul McCartney 70 ára afmælistónleikar

 - Flytjendur:  Ýmsir

 - Staðsetning:  Eldborg, Hörpu

 - Einkunn:  ****1/2 (af 5)

  Það var tími til kominn að settir væru upp hérlendis alvöru stórhljómleikar til heiðurs bítlinum Paul McCartney, farsælasta tónlistarmanni sögunnar.  Enda tengsl Bítlanna við Ísland margháttuð og náin.  Gunnar Þórðarson á til að mynda jakka af Paul McCartney,  bara svo eitt dæmi sé tekið.

  Hljómleikarnir hófust á því að Björgvin Gíslason spilaði á sítar við undirleik ásláttarhljóðfæra.  Það gaf tóninn aftur til ársins 1965 er indverska hljóðfærið sítar var fyrst brúkað í tveimur lögum á Bítlaplötunni  Rubber Soul.   Það þótti framandi, spennandi og sýrt.  Sítar setti svip á fleiri Bítlaplötur og hippaárin. 

  Næst gekk barnung stúlka á svið.  Hún settist við píanó og söng afmælissöng fyrir Pál McCartney,  eða Palla eins og hún kallaði hann.  Undirleikinn afgreiddi hún með einum putta.  Þetta var krúttlegt,  skapaði skemmtilega stemmningu og gaf tóninn fyrir það að menn voru ekki í of hátíðlegum stellingum heldur að skemmta sér og öðrum á léttu nótunum.

  Svo fór hljómsveitin að tínast inn.  Magnús R. Einarsson (gítar, söngur) hafði orð fyrir henni.  Kynningar hans voru launfyndnar.  Aðrir gítarleikarar voru Gunnar Þórðarson,  Eðvarð Lárusson og Þórður Árnason,  auk Björgvins Gíslasonar.  Ásgeir Óskarsson og Karl (ég náði ekki eftirnafni hans) trommuðu.  Pálmi Sigurhjartarson og Jakob Frímann Magnússon sáu um hljómborð.  Tómas M. Tómason var á bassa og Gísli Helgason blés í flautu.

  Fyrir utan Magnús R. Einarsson skiptu á milli sín söngnum þau Labbi í Mánum,  Baddi í Jeff Who,  Gunnar Þórðarson,  Andrea Gylfadóttir,  Egill Ólafsson,  Eyþór Ingi og nafni hans Kristjánsson. 

  Iðulega voru 10 - 12 manns á sviði í einu.  Stundum færri og allt niður í það að Gunnar Þórðarson flutti Blackbird  einn og óstuddur (söngur, kassagítar).  Að óreyndu hefði ég haldið að vanur öskursöngvari fengi það hlutverk að syngja  Oh Darling.  En Gunnar Þórðarson afgreiddi það með sóma.  Hann beitti öskursöngstílnum aðeins til spari en söng kröftuglega að öðru leyti. 

  Valið á Gunnari í sönghlutverkið í  Oh Darling  er ágætt dæmi um það að enginn reyndi að herma eftir Paul,  hvorki í söng né hljóðfæraleik hans eða meðspilara hans.  Það var besti kostur.  Öll tónlistin var lausbeislaðri, hrárri, líflegri og kraftmeiri fyrir bragðið.  Jafnvel djammstemmning á köflum.  Oftast fékk samt upprunastemmning lagsins að halda sér að einhverju leyti.  En það var einnig brugðið á leik.  I Wanna Be Your Man,  lagið sem Paul McCartney og John Lennon sömdu fyrir The Rolling Stones 1963,  var hér afgreitt í léttri kántrýblússveiflu.  Rokklag Johns Lennons,  Help,  var flutt í hægagangi og verulega frábrugðið Bítlaútgáfunni.  Þannig uppátæki krydduðu dagskrána og juku á fjölbreytileikann,  sem er ærinn í lagasafni Pauls McCartneys. 

  Það kom vel út að lauma með í pakkann nokkrum Lennon-lögum.  Þeir Paul og John fluttu á sólóferli sínum á hljómleikum lög hvors annars og Paul er enn að syngja Lennon-lög.  Þar fyrir utan sömdu þeir fjölda laga í sameiningu.

  Lagavalið á afmælishljómleikunum spannaði allan feril Pauls frá fyrstu Bítlaplötu til nýjustu sólóplötu.  Ég fékk að heyra öll mín uppáhalds McCartney-lög:  Helter Skelter,  Let Me Roll It,  Live And Let Die,  Birthday,  Why Don´t We Do It In The Road...  Að ógleymdu því þrekvirki að taka löngu lagasyrpuna af B-hlið  Abbey Road  plötunnar.  Það þarf virkilega góða hljómsveit og góða söngvara til að gera henni eins góð skil og þessi hópur,  glæsilegt úrval afburðarfólks. 

  Lokalag hljómleikanna (eftir uppklapp) var  Hey Jude.  Þá stóð salurinn upp og klappaði og söng með.  Ljós voru kveikt og allir gengu yfir sig ánægðir út í nóttina.  Þetta var frábært.  Hafi Davíð Steingrímsson bestu þakkir fyrir að standa fyrir þessari góðu skemmtun.  Hann rekur Bítlabarinn Ob-La-Di Ob-La-Da á Frakkastíg.  Þar er spiluð lifandi Bítlamúsík á fimmtudögum og Andrea Jónsdóttir er plötusnúður á sunnudögum.  Um þessar mundir standa yfir sérstakir Bítladagar á Ob-La-Di Ob-La-Da.   

Hvað var Marilyn Monroe með margar tær?

  Norma Jeane hét fögur dökkhærð bandarísk söng- og leikkona.  Hún gegndi sviðsnafninu Marilyn Monroe og litaði hárið ljóst.  Hugsanlega er hún þekktust í dag fyrir að hafa átt í ástarsambandi við Kennedy-bræður.  Þeir gegndu um tíma hátt settum stöðum á borð við forsetaembætti,  dómsmálaráðherraembætti,  sátu á Bandaríkjaþingi og eitthvað svoleiðis.  Sögusagnir eru um að þeir hafi látið drepa stelpuna.  Pabbi þeirra var sprúttsali.

   Áratugum saman hafa menn og konur deilt heiftúðlega um fjölda af tám á Marilyn.  Sumir fullyrða að hún hafi verið með 11 tær.  Aðrir telja að þær hafi slagað í 12.  Sjálf vissi Marilyn það aldrei.  Hún kunni aðeins að telja upp að 10.

Annar áhugaverður útvarpsþáttur

  Það eru margir skemmtilegir og fróðlegir þættir á Útvarpi Sögu.  Útvarp Saga er þjóðarútvarp.  Þjóðin fær að tjá sig þar í símatímum og þjóðin hlustar.  Einn af mörgum fróðlegum og áhugaverðum þáttum á Útvarpi Sögu heitir  Fegurð og heilsa.  Þar fara þeir Torfi Geirmundsson,  hárskeri,  og Ljóða-Valdi á kostum.  Í síðasta þætti var Bjartmar Guðlaugsson gestur.  Ég slæddist með.  Bjartmar er gullmoli og hvarvetna skemmtilegur viðmælandi.  Þáttinn má heyra á:  http://utvarpsaga.is/index.php?option=com_content&view=article&id=755&Itemid=60

Skemmtilegur og fróðlegur útvarpsþáttur

 

  Ég veit ekki hvers vegna það er að dagskrá rásar 1 fer meira og minna framhjá mér.  Kannski er ástæðan sú að dagskráin er ólík frá degi til dags.  Á rás 2,  X-inu og Útvarpi Sögu er dagskráin í fastari skorðum.  Maður kann hana utan að og gengur að áhugaverðum föstum þáttum þar sem vísum. 

  Fyrir tilviljun datt ég í dag inn á skemmtilegan og fróðlegan þátt á rás 1.  Hann kallast  Albúmið  og er í umsjá Jóns Ólafssonar og Kristjáns Freys Halldórssonar.   Í þættinum tóku þeir fyrir plötuna  London Calling  með bresku hljómsveitinni The Clash.  Spiluðu öll 19 lög plötunnar og fjölluðu um þau hvert fyrir sig. 

  London Calling  er iðulega á listum yfir 10 bestu plötur rokksögunnar.  Mikla athygli vakti þegar söluhæsta poppblað heims,  bandaríska Rolling Stone,  útnefndi þetta bestu plötu níunda áratugarins.  Útnefningin var ekki umdeild nema fyrir þær sakir að platan kom út á áttunda áratugnum (1979).  Kaninn hefur aldrei stressað sig á nákvæmum ártölum þegar músík er til umfjöllunar.  Ótal spaugileg dæmi um það má finna í sögu Grammy verðlauna. 

  Fyrir þá sem misstu af þættinum á rás 1 í dag þá má hlusta á hann með því að smella á þessa slóð:  http://www.ruv.is/sarpurinn/albumid/09062012

  Ég er töluvert eldri en Jón og Kristján Freyr.  Fylgdist þess vegna sem rígfullorðinn maður náið með pönkbyltingunni 1976/77 á rauntíma á meðan Jón og Kristján Freyr sóttu fermingarfræðslu.  Fyrir bragðið var góð skemmtun að hlusta á vangaveltur tvímenninganna um það hvernig pönkarar tóku  London Calling.  Platan kom pönkurum í opna skjöldu.  Hún var það stórt skref frá frumpönkinu en samt nógu sterk til að menn heilluðust.  En margir þurftu að velta vöngum tvístígandi á meðan þeir voru að melta þetta uppátæki.  Nokkru munaði um að platan byrjaði bratt á öflugu titillaginu.  Lagi sem í dag tilheyrir "klassísku rokki".  Er spilað á Bylgjunni jafnt sem X-inu og Brúsi frændi syngur á hljómleikum.

Hötuðustu poppstjörnurnar

  Í bandaríska poppmúsíkblaðinu Spin hefur verið tekinn saman og birtur listi yfir þær poppstjörnur og hljómsveitir sem almennt þykja ómerkilegastar.  Eða réttara sagt eru vinsælustu boxpúðarnir.  Það er ekki átt við Justin Bieber eða Britney Spears heldur þá sem gefa sig út fyrir að vera eitthvað merkilegra en þeir eru.  Listinn er studdur ágætum og sannfærandi rökum.  Hvað finnst þér?  Þannig er listinn:

  1  Milli Vanilli

  Aularnir í þessum dúett komu ekki nálægt sínum eigin plötum!  Þeir sömdu ekkert, spiluðu ekkert og sungu ekkert.  Á hljómleikum hreyfðu þeir varirnar en sungu ekki.  Það voru aðrir sem sungu og söngurinn var spilaður af bandi.  Áður en þetta varð á allra vitorði útnefndi bandaríska poppmúsíkblaðið Rolling Stone dúettinn "Verstu hljómsveit ársins 1989".

  2  Limp Bizkit

  Í lok síðustu aldar náði hljómsveitin Limp Bizkit upp á sitt einsdæmi að slátra trúverðugleika tilfinninganæms framsækins þungs rokks sem Nirvana og Nine Inch Nails höfðu innleitt.  Courtney Love (ekkja Curts Kobains í Nirvana) sagði Fred Dust (forsprakka Limp Bizkit) hafa fært okkur verstu ár í sögu rokksins.   

  3  Kenny G

  Hefur látið lyftur virðast öruggan stöð síðan 1982.  Hefur á 20 plötum afgreitt öll jólalög og kvikmyndaballöður sem þú getur nefnt.  Hefur að auki spilað ofan á gamlar upptökur með Louis heitnum Armstrong og kallað það samstarfsverkefni.  Gítarleikarinn Pat Methany sakar Kenny um að spila falskt rugl.

  4 Creed

  Útvatnað grugg (grunge).  Nickelback áður en Nickelback kom til sögunnar.  Vikublaðið Philadelphia Weekly birti forsíðugrein um Creed 2002.  Þar var hljómsveitin Creed kölluð krabbmein í rokkinu.

  5  Insane Clown Posse

  Liðsmenn ICP hafa sjálfir kallað sig "Hötuðustu hljómsveit heims".  Breska dagblaðið The Gardian hefur sagt ICP vera "segul á útskúfun".

Vissir þú...?

  

   ...að Tína Turner er sköllótt.  Það var snemma á sjöunda áratugnum að hún var að lita á sér hárið;  eitthvað fór úrskeiðis og hárið brann af henni.  Síðan er aðeins einhverjar smávægilegar lufsur á höfði hennar.  Þess vegna er hún með hárkollu.

  ...að Dolly Parton er snoðklippt.  Það er aðeins þegar hún kemur fram opinberlega sem hún setur upp þessa líka ljómandi fínu hárkollu.  Hún er með eitthvað plast drasl eða gel í brjóstunum.  Þau eru ekki svona stór frá náttúrunnar hendi.  Vegna þessara ónáttúrulegu og þungu brjósta þjáist hún af stöðugum bakverkjum.  En metur dæmið þannig að stóru brjóstin og hárkollan séu vörumerki og hafi sem slík öflugt auglýsingagildi fyrir sig.  Áreiðanlega var það þannig.  Í dag gæti hún aftur á móti slakað á án þess að það kæmi niður á vinsældum hennar.

  ...að Axl Rose (Guns N´ Roses) er hálf sköllóttur.  Hann hefur látið flétta í sitt litla hár allskonar hárlengjum og "dread" lokkum.

   ...að Axl er tannlaus ef frá er talið að hann er með gervitanngóma.

   ...að Paul McCartney og Mick Jagger eru í raun hvíthærðir.  Þeir láta hins vegar reglulega lita hárið á sér brúnt. 

  Pjatt.