Brandari í íslenskri auglýsingu orðinn að veruleika

  Munið þið eftir Lottó-auglýsingunum með Jóni Gnarr?  Þar lék hann Lýð Oddsson.  Sá hafði margt fróðlegt að segja um líf sitt sem auðmanns í kjölfar þess að vinna í Lottói.  Fyndnasta sjónvarpsauglýsingin gekk út á það að Lýður hefði fjárfest í hurð.  Hurðin var áður í eigu söngvarans Barrys Manilows.

  Fyndni brandarans lá í langsóttri veruleikafirringu tengdri fræga (Séð og heyrt) fólkinu.  Eða hvað?  Fyrir helgi var sett í sölu hurð úr húsi sem hýsti bítilinn Paul McCartney á unglingsárum hans.  Paul bjó í húsinu í örfá ár frá 13 ára aldri.  Síðar gekk Paul til liðs við skólahljómsveit Johns Lennons,  Quarrymen.  Hún breyttist í The Beatles og starfaði í Þýskalandi áður en heimsfrægðin bankaði á dyr.  Ekki samt sömu dyr og voru nú til sölu.  Ási heitinn vinur minn (bróðir Röggu Gísla) sá The Beatles skemmta í Þýskalandi á sínum tíma.  Það er önnur saga.

  Um er að ræða hrörlega gulgræna útihurð.  Uppsett verð fyrir hurðina var um milljón ísl. kr.  (5000 sterlingspund).  1970 var hurðin tekin úr umferð og sett í geymslu.  Þegar á reyndi var togast á um hurðina og hún að lokum seld á 1,5 millj. ísl. kr. (7500 sterlingspund). Kaupandinn hyggst leyfa Bítlaaðdáendum að taka ljósmynd af sér gegn greiðslu við hurðina.  Á hurðinni er póstlúga sem þeir geta smeygt í gegn umslagi merktu sér.  Þetta fjárfesting til lengri tíma. 

Ísland í 1. sæti yfir þau lönd sem best er að sækja heim

  Í sunnudagshefti breska dagblaðsins Daily Mail er að finna áhugaverðan lista yfir þau lönd heims sem best er að sækja heim.  Listinn er einkar áhugaverður fyrir okkur Íslendinga.  Við elskum að ferðast.  Svona listi hjálpar okkur að velja næsta áfangastað.  Ennþá áhugaverðara fyrir okkur er að Ísland trónir í 1. sæti á listanum. 

  Fyrirsögn greinarinnar er:  "Vinalegustu lönd heims?  Nýtt heimskort leiðir í ljós að Ísland er svalasti staðurinn til að heimsækja í fríi (en reynið forðast Bólivíu)" 

  Í meginmálstextanum eru Íslendingar sagðir vera vingjarnlegasta fólk heims,  samkvæmt WEF (The World Economy Forum).  Verstu lönd að heimsækja eru:

140. sæti:  Bólivía

139.  Venesúela

138.  Rússland

137.  Kúveit

136.  Lettland

135.  Íran

134.  Pakistan

133.  Slóvakía

132.  Búlgaría

131.  Mongólía

Það sem skiptir mestu máli

  Einu sinni voru tveir menn að eltast við sömu dömuna.  Þetta var fyrir meira en hálfri öld eða eitthvað álíka.  Kröfur sem konur gerðu til karlmanna á þeim tíma voru ekki nákvæmlega þær sömu og á þessari öld.  Mennirnir tveir stóðu jafnt að vígi til að byrja.  Skyndilega átti annar þeirra ekki möguleika.  Ástæðan var sú að hinn komst yfir símtæki.  Daman þurfti ekki að hugsa sig um tvisvar við þau tímamót.  Maður sem átti síma var ómótstæðilegur.  Nokkrum dögum síðar leiddi símaeigandinn dömuna upp að altari.

  Sagan endaði reyndar ekki þarna.  Símtækið reyndist vera bilað og komst aldrei í lag þegar á reyndi.   Hjónabandið stóð af sér það áfall.  Enda var konan orðin ólétt þegar fullreynt var með símtækið.

 

Bóndi óskast

Byltingarkennd hönnun

  Fréttir frá umheiminum berast seint og illa til íbúa í Norður-Kóreu.  Jafnvel þeir hæst settu í Norður-Kóreu - sem búa ekki við eins harða ritskoðun og almenningur - sitja uppi með allskonar brenglaðar hugmyndir af veruleikanum.  Upplýsingaflæðið er svo takmarkað og misvísandi. 

  Nýverið barst - eftir krókaleiðum - leiðtoga Norður-Kóreu,  Kim Jong Un,  til eyrna óljóst slúður um að Hussein,  forseti Bandaríkja Norður-Ameríku,  ætti vatnsrúm.   Kim vildi eðlilega ekki vera eftirbátur Husseins.  Báðir leiðtogar norður-ríkis sem á kjarnorkuvopn og samstíga um margt fleira.

  Kim setti færustu verkfræðinga og hönnuði Norður-Kóreu umsvifalaust í það verkefni að hanna fyrir sig vatnsrúm.  Til að trompa kollegann í Norður-Ameríku bað Kim um að sitt vatnsrúm væri með áföstu lesljósi - svo að hann geti lesið ljóð eftir föður sinn undir svefninn. 

  Útkoman fór fram úr björtustu vonum.  Vatnsrúmið þykir einstaklega smart.

 

 

Sprenging talin í undirbúningi

Íslensk plata fer á flug á ebay

 

  Ég kann ekkert á ebay og veit harla lítið um það fyrirbæri.  Þetta er einhverskonar uppboðsvefur.  Hlutir eru boðnir til sölu á vefnum og áhugasamir notendur bjóða í gripinn.  Þegar seljandinn er orðinn sáttur við hæsta boð gerir hann sér lítið fyrir og samþykkir boðið.  Þá verður kaupandinn glaður. 

  Íslenskar plötur eru sjaldgæfir hvítir hrafnar á ebay - að mér skilst.  Enda kannski ekki margir í heiminum sem þekkja til íslenskra platna - ef frá eru taldar plötur Bjarkar og Sigur Rósar. 

  Nú bregður svo við að byrjað er að togast á um plötuna  Dawn Of The Human Revolution  með Herberti Guðmundssyni.  Platan inniheldur ofursmellinn  Can´t Walk Away.  Um er að ræða vinyl-útgáfuna.  Hæsta boð er 29 dollarar, eins og er (x 125 íslenskar kr. = 3625 krónur).  Næsta víst er að það á eftir að hækka.

  http://www.ebay.com/itm/Herbert-G-Dawn-Of-The-Human-Revolution-LP-Iceland-pop-/110731885844?pt=Music_on_Vinyl&hash=item19c8227d14 

Auðvelt að verjast bílaflakki

  Algengt er að bílar fari á flakk.  Þeir renna burt.  Þeir fjúka burt.  Þeir fljúga burt.  Þeim er stolið.  Það er til einföld aðferð sem kemur í veg fyrir öll slík óhöpp.  Aðferðin felst í því að leggja við ljósastaur eða aðra jarðfasta hluti og tjóðra bílinn rækilega við þá.  Til að mynda með því að kaupa ódýran reiðhjólalás.  Einhverjum kann að finnast það vera haldlítil vörn gegn bílaþjófum.  Auðvelt er að klippa reiðhjólalás í sundur.  Málið er að bílaþjófar eru heimskir.  Þeir fatta þetta ekki og sniðganga tjóðraða bíla.

  Það er líka hægt að bora með steinbor í malbikið og festa bílinn með böndum.

Bíll flaug á hús

Kvikmyndarumsögn

 

 - Titill:  Identity Thief

 - Leikstjóri:  Seth Gordon

 - Leikarar:  Jason Bateman,  Melissa McCarthy o.fl.

 - Kvikmyndahús:  Háskólabíó

 - Einkunn: *** (af 5)

   Upphaf myndarinnar lofar ekki góðu.  Hún hefst á barnalegum aulahúmor og fyrirsjáanlegum klisjum.  En svo braggast myndin þegar á líður,  Úr verður þokkaleg skemmtun.  Þar á meðal æsilegur bílaleikur og af og til dálítil spenna. 

  Myndin fjallar um starfsmann hjá fjárfestingafyrirtæki í Colorado.  Hann verður fyrir því að greiðslukort hans er klónað.  Gerandinn er siðblind kona í Flórída.  Hún tæmir inneign mannsins.  Við það fer tilvera hans á haus.  Hann leitar konuna uppi og reynir að semja við hana um að leysa málið í góðu.  Hún þráast við til að byrja með en verður samvinnuþýðari þegar harðsvíraðir leigumorðingjar fara að herja á þau.  

  Sagan er óttalegt bull.  Það má brosa og hlæja af ýmsum uppákomum.  Hollywood væmni kryddar framvinduna af og til. Þær senur eru leiðinlegar.  Samt.  Væmnin brýtur upp grínsenurnar.  Þegar upp er staðið er Identity Thief ágæt grínmynd með spennuívafi sem skilur lítið eftir. Kannski má með vilja lesa út úr sögunni gagnrýni á ríflega sjálftökubónusa toppanna hjá fjármálafyrirtækjum á meðan launataxta þeirra lægra settu er haldið niðri.

 

  Þetta er ekki "verður-að-sjá" mynd.  En upplögð til að kíkja á,  svona til að gera sér eitthvað til gamans eina kvöldstund. 

.

  Umsögn um kvikmyndina Jagten:  http://www.jensgud.blog.is/blog/jensgud/entry/1288355/

 

Veitingaumsögn

- Réttur:  Morgunverður 

 - Veitingastaður:  Prikið,  Bankastræti 12

 - Verð:  1690 kr.

 - Einkunn:  *** (af 5)

.

  Morgunverðardiskurinn á Prikinu er kallaður Vörubíll.  Hugsanlega er nafnið tilvísun í bandarískan morgunverð sem þarlendir vörubílstjórar sækja í.  Einkenni hans eru stórar nýbakaðar lummur (í Bandaríkjunum kallaðar pönnukökur), bornar fram með smjörstykki sem bráðnar ofan á þeim.  Þeim er drekkt í dísætu sýrópi.

  Hver svona lumma er tvöfalt stærri en íslensk lumma.  Þegar smjörið og sýrópið bætast við eru tvær þannig lummur nægilega matmiklar til að standa sem heil máltíð.  En ekki í Bandaríkjum Norður-Ameríku.  Þar eru nokkrar lummur í beit aðeins upphitun fyrir enskan morgunverð. 

  Morgunverðardiskurinn á Prikinu samanstendur af tveimur lummum með smjöri og sýrópi,  beikoni,  steiktum kartöflum,  tveimur spældum eggjum og ristuðum franskbrauðssneiðum.

  Fyrir minn smekk passa dísætar lummur með sýrópi engan veginn við beikon og egg.  Ekki fremur en karamelluhúð á poppkorni.  Hvorutveggja nýtur engu að síður gríðarmikilla vinsælda í Bandaríkjum Norður-Ameríku.  Eftir að ég hafði snætt beikonið,  eggin og kartöflurnar nartaði ég í lummurnar.  En var orðinn saddur og hryllti við sætubragðinu af sýrópinu. 

  Lummur með smjöri og sýrópi séu áreiðanlega ljúffengar einar og sér með kaffi í kaffitíma síðdegis.

  Steiktu kartöflurnar á Prikinu eru alvöru kartöflur með hýði.  Þær eru vel djúpsteiktar, dökkbrúnar að utan og ágætar.  Ég held að beikonsneiðarnar hafi verið sex.  Kannski voru þær sjö.  Þær mættu vera örlítið fleiri.  En allt í lagi. 

  Prikið er dálítið "sjabbí" staður.  Veggir,  innréttingar og gólfefni hafa látið verulega á sjá.  Samt er þetta hlýlegur staður og vel sóttur. 

  Frá því að ég pantaði liðu 25 mín þangað til maturinn var borinn á borð.  Kokkurinn baðst afsökunar á biðinni.  Það bendir til þess að afgreiðsla sé oftast styttri.  Mér leiddist þó ekki.  Músíkin var svo skemmtileg.  Notalegt jamaískt reggae.  Meðal annars flott dub-remix af Get Up Stand Up með Bob Marley.  Ég hefði ekki viljað missa af því.  Glæsilega flott.  Ég verð að leita þá útgáfu uppi til að eignast.  Og vegna fleiri flottra reggae-laga flýtti ég mér ekki að snæða Vörubílinn heldur dundaði mér.   

     

Ráð til að fá börn til að borða pizzu

  Pizza er þekkt flatbaka og vinsæl meðal fátæklinga á Ítalíu.  Svo vinsæl að hún einskonar vörumerki fyrir Ítalíu.  Reyndar á hún ættir að rekja aftur til Forngrikka en barst eftir krókaleiðum til Ítalíu fyrir þremur öldum eða svo.  Ástæðan fyrir gríðarlegum vinsældum pizzunnar meðal ítalskra fátæklinga er fyrst og fremst sú að hráefniskostnaður er lægri en við flestan annan mat.  Einungis þarf hveiti,  vatn,  ger og matarolíu.  Kannski örlítið salt.  Þessum hráefnum er hnoðað saman og rúllað út í þunnan brauðbotn.  Ofan á hann er dreift matarafgöngum úr ísskápnum sem annars væri hent í ruslið.  Galdurinn er að saxa alla bita í smátt.  Ef harður ostbiti finnst í ísskápnum er ágætt að raspa hann niður og strá yfir.  Flatbakan er síðan bökuð í ofni.  Eftir bankahrunið er pizza heppilegur kostur á fátækum heimilum.

  Vandamálið er að börn fúlsa jafnan við þessum fátækramat.  Þau vilja frekar siginn fisk og grænmetisbuff.  Það eru til ráð við því vandamáli.  Eitt ráðið felst í svokallaðri kolkrabbapizzu.  Hún er útfærð á þennan hátt og börnunum talin trú um að þetta sé ekki pizza heldur kolkrabbi:

  Sama hátt má hafa á með kisupizzu.  Börnum þykir spennandi að halda að þau séu að borða kisu.

  Í desember og janúar er upplagt að bjóða upp á jólasveinspizzu.  Börn elska að halda að þau séu að borða jólasvein.

  Þegar börn læra á klukku er upplagt að segja því að vekjaraklukkan hafi bilað.  Þess vegna sé best að snæða hana. 

  Þegar barn á afmæli er kannski hægt að spandera hamborgurum,  kjúklinganöggum og frönskum á pizzuna. 

Veitingaumsögn

 

 - Réttur:  Núðlusúpa með nautakjöti

 - Veitingahús:  Noddle Station,  Skólavörðustíg 21 

 - Verð:  1140 kr.

 - Einkunn: **** (af 5)

.

  Súpa þarf að vera rosalega bragðgóð til að vera 1140 kr. virði.  Núðlusúpa Noodle Station slagar í að vera þess virði.  En ekki alveg fyrir minn gamaldags,  íhaldssama smekk á súpum.  Samt næstum því og það er gaman að smakka hana.  Hún er ólík íslensku kjötsúpunni,  baunasúpunni og humarsúpunni. 

  Núðlusúpumatseðillinn er alltof flókinn (djók!):  Það þarf að velja á milli núðlusúpa með nautakjöti,  núðlusúpa með kjúklingi eða grænmetisnúðlusúpa.  Eftir miklar vangaveltur í valkvíðakasti fékk ég mér núðlusúpu með nautakjöti. 

   Það er gaman að fylgjast með afgreiðslunni.  Núðlur eru teknar úr einum potti,  nautakjöt úr öðrum,  krydd úr hinum ýmsu kirnum og svo framvegis.  Þegar krydd eru sett út í er viðskiptavinurinn spurður:  "Viltu chili-pipar?".  Viðbrögð við jákvæðu svari:  "Mikið eða lítið?  Svona eða minna?"  Viðskiptavinurinn fær að ráða töluverðu um bragðið.  Það er áreiðanlega ennþá hentugra fyrir fastakúnna sem læra að þekkja kryddið en fyrir óvana.  

  Það er austurlenskur (tælenskur) keimur af núðlusúpunni.  Ég veit ekki hvað skammturinn,  afgreiddur í frauðplastsmáli (til að taka með sér),  er stór.  Giska á 750 ml.  Skammturinn er matmikill og saðsamur.  Hann er ekki kláraður í einni atrennu.  Ég borðaði helminginn til að byrja með og átti seinni hlutann til góða síðar um daginn.  Það þýðir að frekar hátt verðið,  1140 kr.,  er svo gott sem réttlætanlegt.  Það er hægt að borða súpuna á staðnum.  Ég nýtti mér ekki þann möguleika. 

  Á síðunni www.tripadvisor gefa viðskiptavinir núðlusúpum Noddle Station meðaleinkunn 4,5 af 5.