Plötuumsögn

- Titill:  Tree of Life / Lífsins tré

- Flytjandi:  Herbertson

- Einkunn:  ****

  Herbertson er dúett feðganna Herberts Guðmundssonar og Svans Herbertssonar.  Herbert sér að mestu um söng.  Svanur útsetur og spilar á margvísleg hljómborð.  Báðir taka þátt í röddun,  ásamt fóstbræðrunum Magnúsi & Jóhanni.  Glæsilegar raddanir einkenna plötuna.  Svanur syngur aðalrödd í tveimur lögum og í einu til á móti föður sínum. 

  Svanur er dúndur góður söngvari.  Hann syngur af innlifun og beitir röddinni af öryggi og smekkvísi.  Hljómur raddar hans er glettilega líkur söngrödd föðurins.  Herbert hefur verið í hópi flottustu íslenskra söngvara í meira en fjóra áratugi.  Líflegur og blæbrigðaríkur.  Hann nýtur sín vel á þessari plötu.  Það ríkir afslöppuð og notaleg sköpunar- og spilagleði hjá feðgunum.  Hluti af tónlistinni var hljóðritaður heima í stofu hjá þeim.  Það hefur áreiðanlega haft eitthvað að segja um þægilegt andrúmsloftið sem leikur um plötuna. 

  Flest lögin semja feðgarnir saman.  Innan um eru þó lög sem þeir sömdu hvor í sínu lagi.  Herbert er höfundur texta utan 3ja eftir Svan.  Einn til viðbótar yrkja þeir saman.  Tveir texta Herberts eru á íslensku.  Aðrir á ensku.  Það skarast ekkert.  Þetta rennur allt lipurlega, eins og platan öll.  Að sumu leyti hljómar hún eins og "Greatest Hits/Best of".  Þarna eru þekktir smellir á borð við  Time,  Vestfjarðaróð  og  Wanna Know Why.  Þeir skera sig ekkert frá.  Önnur lög hljóma einnig eins og smellir.  Hebbi er lunkinn við að hrista fram úr erminni svokölluð "syngjum-endalaust" viðlög (sing a long) sem söngla í höfðinu á manni löngu eftir að lagið hefur verið spilað.

  Til samanburðar við fyrri plötur Herberts er þessi hljómborðslegri.  Mörg laganna eru auðheyranlega samin á píanó.  Gítarleikur Tryggva Hübner og Stefáns Magnússonar setur svip á plötuna.  Það er nettur The Edge (U2) keimur í gítarleik Stefáns í nokkrum lögum.  Þegar plötunni er rennt í gegn koma líka upp í hugann hljómsveitir á borð við Coldplay og Keane. 

  Herbert hefur alltaf verið opinn og áhugasamur um nýja strauma í tónlist.  Þess vegna hljómar hver ný plata frá honum jafnan fersk þó að persónuleg sérkenni hans haldi sér jafnframt.  Til að mynda má iðulega greina inn á milli smá Lennon og Bítla á plötum hans.  Hér er það mest áberandi í laginu  My Love.  Þar spila inn í hugleiðingar Herberts um ást,  kærleika,  fögnuð og von um fagurt mannlíf.

  Auk þeirra sem áður er getið spilar Gulli Briem á trommur og Haraldur Þorsteinsson á bassa.  Einvalalið í hverju hlutverki.  Þetta er áheyrileg og góð plata í alla staði.  Hún er í flokki með bestu plötum Herberts,  sem á langa og veglega ferilsskrá að baki og er í toppformi.  Það er gaman að Svanur sonur hans sé orðinn þátttakandi í þeirri ferilsskrá.  Hann hefur sína ferilsskrá með glans á þessari fínu plötu.   

 

Jólarokk

  Fyrir nokkrum dögum leyfði ég ykkur að heyra bráðskemmtilegt jólalag,  Pakkaþukl,  með nettum þungarokkskeim.  Það vakti gríðar mikla lukku og kom mörgum í rétta jólagírinn.  Sem var afar heppilegt á þessum árstíma.  Þeir sem misstu af því eða vilja rifja dæmið upp geta smellt á þessa slóð:  http://www.jensgud.blog.is/blog/jensgud/entry/1210619/  Þar er einnig hægt að komast í upplýsingar um flytjendur.

  Það er ekki hægt að láta staðar numið þarna.  Hér fyrir ofan er meira Pakkaþuklsrokk.  Að þessu sinni er sungið um raunir jólasveinsins Stúfs.  Svo er bara að taka undir í viðlaginu:  "Við viljum gjöf!"  Það er rífandi stemmning.

Þrjú börn villtust í jólaskóginum

Eivör, Kór Langholtskirkju, Graduelakórinn...

.

- Viðburður:  Jólasöngvar í Langholtskirkju

- Flytjendur:  Kór Langholtskirkju,  Graduelakór Langholtskirkju,  einsöngvarar,  hljóðfæraleikarar og Táknmálskórinn

- Stjórnandi:  Jón Stefánsson

- Einkunn:  ****

.

  Það eru þrennir hljómleikar eftir:  Tveir í kvöld og lokahljómleikarnir á sunnudag.

  Dagskráin er fjölbreytt og spannar hátt í hálfan annan tíma (með hléi).  Á efnisskrá eru allt frá laufléttum þekktum jólapoppssöngvum (Ljósadýrð loftin fyllir,  Jólasnjór - Meiri snjó!  og fleiri) til hátíðlegustu jólasálma.  Þar á milli er m.a. boðið upp á bandarískan negrasálm (Go, Tell It On The Mountain  með íslenskum texta),  samsöng með áheyrendum á þekktum jólalögum,  djössuð lög (m.a.  Hvít jól) og frumsamda jólasöngva eftir Eivöru.  Flytjendur eru hátt í hundrað.  Þar af þrír kórar:  Kór Langholtskirkju,  Graduelakór Langholtskirkju og Táknmálskórinn.

  Sérviskulegur músíksmekkur minn og lauflétt popplög eiga sjaldan samleið en skemmta öðrum þeim mun meira.  Fyrir mig bættu hinsvegar hátíðlegri jólasálmarnir um betur.

  Einn af hápunktum hljómleikanna er magnþrunginn flutningur Ólafar Kolbrúnar Harðardóttur,  hljómsveitar og kóra á  Ó, helga nótt.  

  Andri Björn Róbertsson er eini karlkyns einsöngvarinn.  Hann syngur hljómfagran bassa-barítón.  Kvenkyns einsöngvararnir eru 7.

  Á engan er hallað þó að Eivör sé sögð stjarna hljómleikanna.  Jólasöngvar hennar tveir eru í flokki með hennar best sömdu.  Er þó af nógu að taka í þeim efnum.  Hátíðleg umgjörðin í Langholtskirkju spilar inn í og liðsinni kóranna.  Þar fyrir utan hefur Eivör einstaklega góðan og sterkan sviðsljóma.  Svo ekki sé minnst á blæbrigðaríka,  stóra og fagra söngröddina.  

  Auk frumsömdu söngvanna syngur Eivör  Pie Jesu  eftir Andrew Lloyd Webber.  

  7 manna hljómsveitin er sparlega notuð. Yfirleitt er ekki spilað á nema 2 - 3 hljóðfæri í hverju lagi.  Það undirstrikar fjölbreytileikann í tónlistinni.  Orgel er stundum í aðalhlutverki.  Í öðrum tilfellum eru það tvær flautur eða harpa eða píanó og Eivör spilar á kassagítarinn sinn.  

  Táknmálskórinn setur svip á hljómleikana og minnir okkur á þau forréttindi að heyra.   

  Einu atriði þarf að kippa í lag:  Það snýr að heitu súkkulaði sem boðið er upp á í hléi og piparkökum.  Þannig háttar til að veitingarnar standa á þremur langborðum í hliðarsal.  Fyrstir hrúgast að borðum þeir sem sitja niðri.  Það er þröngt á þingi.  Þegar þeir sem sátu á svölum komust að voru allir súkkulaðikönnurnar tómar.  Þær voru þó fjöldamargar.  En dugðu ekki fyrir fulla kirkju (560 sæti).  Heyra mátti grát og gnístan tanna þegar svalagestir gerðu örvæntingafulla en árangurslausa leit að könnu með heitu súkkulaði.  Þessi lýsing er kannski full yfirdrifin hjá mér og seinni hluti hljómleikanna varð áreiðanlega til þess að þeir súkkulaðilausu tóku gleði sína á ný.  Allir fóru sælir og glaðir heim af hljómleikunum.  Það þarf samt að gera ráðstafandir til að allir fái heitt súkkulaði í hléi.    

  Það er ekki hægt að pósta hér inn myndbandi af Eivöru og Gradúelakórnum flytja  Jólaminningu.  Engu að síður er mögulegt að sjá og heyra það með því að smella á þennan hlekk:  http://www.youtube.com/watch?feature=player_embedded&v=YDrGYqc_eMw

Íslenskt jólarokk

  Frumsamin íslensk jólarokklög eru ekki á hverju strái.  Reyndar ótrúlega sjaldgæf með hliðsjón af því að jólin njóta vinsælda og margir Íslendingar hafa unun af rokkmúsík.  Hér er skemmtilegt dæmi um íslenskt jólarokk.  Flytjendur eru:  Þórður Bogason (söngvari Foringjanna,  Þreks,  Skyttnanna,  Rickshow),  Gústi (trommari Start og EC),  Guðmundur Höskuldsson (gítarleikari EC og Álbandsins),  Vignir Ólafsson (gítar) og Kjartan Guðnason (bassi).  Reyndar er þetta frekar rólegt rokklag.  Enda engin ástæða til að vera með mikinn æsing um jólin.

Frábær útvarpsþáttur: Plötuskápurinn á rás 2

  Rás 2 hefur lengi búið að þeirri gæfu að þar hafa safnast saman dagskrárgerðarmenn með góða þekkingu á tónlist og hæfileika til að miðla sínum fróðleiksmolum til hlustenda.  Nægir að nefna Óla Palla,  Guðna Má,  Andreu Jónsdóttur,  Magnús Einarsson,  Frey Eyjólfs,  Kristján Pálsson,  Matta,  Þossa,  Ásgeir Eyþórs,  Arnar Eggert og marga sem ég er að gleyma í augnablikinu.  Nema þó ekki snillingnum Andra Frey og Gunnu Dís.  Móðir mín á níræðisaldri sagði mér að hún sé alveg "hooked" á Þessum morgunþætti.  Andri Freyr sé svo fyndinn og konan hafi sig alla að halda aftur af honum.  "Það er ævintýralega líflegt og yndislegt að hlusta á þau," sagði mamma sem vill alltaf hafa hasar í öllu.  Og ekki lýgur hún.  Né heldur vissi hún að ég hef þekkt Andra Frey frá því að sá grallari fæddist,  son eins  besta vinar míns.  Trommuleikara Frostmarks,  Jarla og fleiri hljómsveita.  Viðars Júlí Ingólfssonar á Reyðarfirði,  vinsælasta plötusnúðar (DJ) á Austurlandi.

  Nú hefur hafið göngu sína á rás 2 meiriháttar góður þáttur sem heitir Plötuskápurinn.  Þar fara þeir Gunnlaugur Sigfússon,  Sigurður Sverrisson og Halldór Ingi Andrésson á kostum.  Hver um sig er alfræðiorðabók í músík.  Þátturinn er á dagskrá á föstudagskvöldum.  En það er einnig hægt að hlusta á hann hlaðvarpi.  Jafnvel aftur og aftur.

  Í kvöld fjallaði Halldór Ingi Andrésson um forvera Bobs Dylans,  Dylan sjálfan og sporgöngumenn hans.  Frábær þáttur.  Hægt er að hlusta með því að smella á http://www.ruv.is/frett/plotuskapurinn/ahrif-dylans-og-ahrifavalda

  Hér fyrir ofan flytur Bob Dylan lag sitt  Like A Rolling Stone.  Ég ætla að mér yngra fólk átti sig ekki á því hvað þetta var nýstárlegur og framandi hljóðheimur á sínum tíma.  Þetta var sleggjuhögg.  Algjört dúndur.

Bestu plöturnar 2011

  Nú eru að skella á áramótauppgjör músíkpressunnar yfir bestu plötur ársins 2011.  Það er alltaf kapphlaup um það hjá helstu poppmúsíkblöðum hver ríður á vaðið og birtir fyrst sitt áramótauppgjör.  Enn eru þó plötur að streyma á markað.  Ég óttast að frábær plata Bjarkar,  Biophilia,  sé helst til seint útgefin til að ná flugi.  Alveg eins og plata Skálmaldar,  Baldur,  í fyrra.  Ég var sá eini sem náði að setja hana á minn lista yfir bestu plöturnar vegna góðra tengsla við útgefandann,  færeyska plötufyrirtækið Tutl.  Aðrir voru ekki komnir með þá góðu plötu í hús í tæka tíð fyrir áramótauppgjör.

  Breska músíkblaðið New Musical Express tekur forskot á sæluna með því að leita álits lesenda sinna á bestu plötum ársins 2011.  Lesendur gefa plötunum einkunnir frá 1 upp í 10.  Þetta er niðurstaðan:

1. PJ Harvey - 'Let England Shake'

Einkunn: 10.00

  Ég er alsáttur við að þessi plata sé í 1. sæti.  Aldeilis mögnuð plata.  Verra er með píkupoppið í nokkrum næstu sætum og klisjupopp The Strokes.  Hvað finnst þér?

2. Anna Calvi - 'Anna Calvi'

Einkunn: 9.00

3. Beyoncé - '4'

Einkunn: 8.48

4. Lady Gaga - 'Born This Way'

Einkunn: 8.36

5. The Strokes - 'Angles'

Einkunn: 8.33

6. The Streets - 'Computers And Blues'

Einkunn: 8.00

7. Lykke Li - 'Wounded Rhymes'

Einkunn: 8.00

8. White Lies - 'Ritual'

Einkunn: 7.00

9. Katy B – ‘On A Mission’

Einkunn: 7.00

10. Elbow - 'Build A Rocket Boys!'

Einkunn: 6.50

11. Gorillaz - 'The Fall'

Einkunn: 6.00

12. The Pains Of Being Pure At Heart - 'Belong'

Einkunn: 6.00

13. Acrtic Monkeys - 'Suck It And See'

Einkunn: 5.90

14. Adele - '21'

Einkunn: 5.61

15. James Blake - 'James Blake'

Einkunn: 5.50

16. Frankie And The Heartstrings - 'Hunger'

Einkunn: 5.50

17. Foo Fighters - 'Wasting Light'

Einkunn: 5.50

18. Florence And The Machine - 'Ceremonials'

Einkunn: 5.46

19. Glasvegas - 'Euphoric///Heartbreak\\\'

Einkunn: 5.33

20. Bright Eyes - 'The People's Key'

Einkunn: 5.00

  Annað breskt músíkblað,  Uncut,  var að birta sitt áramótauppgjör.  Það byggir á niðurstöðu blaðamanna blaðsins.  Það er ekki tilviljun að sama plata er í toppsæti beggja listanna:

35 My Morning Jacket – Circuital
34 Fatoumata Diawara – Fatou
33 Low – C’Mon
32 Gil Scott Heron & Jamie XX – We’re New Here
31 Destroyer – Kaputt
30 Tim Hecker – Ravendeath, 1972
29 Paul Simon – So Beautiful Or So What
28 King Creosote & Jon Hopkins – Diamond Mine
27 Björk – Biophilia
26 The Decemberists – The King Is Dead
25 Bill Callahan – Apocolypse
24 Real Estate – Days
23 Thurston Moore – Demolished Thoughts
22 Gang Gang Dance – Eye Contact
21 James Blake – James Blake
20 Ry Cooder – Pull Up Some Dust And Sit Down
19 Drive-By Truckers – Go-Go Boots
18 Tinariwen – Tassili
17 Feist – Metals
16 Jonathan Wilson – Gentle Spirit
15 Wilco – The Whole Love
14 Kurt Vile – Smoke Ring For My Halo
13 Tom Waits – Bad As Me
12 Fleet Foxes – Helplessness Blues
11 Laura Marling – A Creature I Don’t Know
10 The War On Drugs – Slave Ambient
09 Bon Iver – Bon Iver
08 Wild Beasts – Smother
07 Radiohead – The King Of Limbs
06 The Horrors – Skying
05 Josh T. Pearson – Last Of The Country Gentlemen
04 White Denim – D
03 Metronomy – The English Riviera
02 Gillian Welch – The Harrow & The Harvest
01 PJ Harvey – Let England Shake

Eivör með rosalega spennandi dæmi

   Stóra fréttin í dönsku músíkpressunni í dag er nýjasta skref á tónlistarferli Eivarar.  Hún hefur stofnað dúett með finnska kontrabassaleikaranum Ginman (búsettur í Danmörku).

  Dúettinn kallast EIVÖR & GINMAN After Dark. 

  Þó að þetta sé dúett þá er samt um fullskipaða hljómsveit að ræða með trommuleikara,  hljómborðsleikara og blásara.  Hljóðfæraleikararnir eru hátt skrifaðir í dönsku djasssenunni.

.

  Ginman er stórt nafn í þeirri senu.  Hann hefur spilað með heimsþekktum nöfnum á borð við Randy Brecker,  Clark Terry,  Scott Hamilton og Lee Konitz.  Hann hefur unnið með flestum stærstu dönsku djassnöfnunum og unnið til fjölda verðlauna.  Dúett hans og söngvara rokkhljómsveitarinnar Sort Sol,  Jörgensen,  hlaut á sínum tíma margar tilnefningar til Grammy verðlauna og landaði tvennum.  Bandaríska gítarhetjan (frumherji þvergripa) Link Wray spilaði um tíma með Sort Sol.  Sú hljómsveit var upphaflega pönksveit en þróaðist yfir í nýbylgjudeildina (new wave).

.

  Ginman hefur meðal spilað inn á plötur með Sigurði Flosasyni.

  Ginman er á sextugsaldri.  Hann samdi tónlistina í söngleiknum Snædrottningunni og hefur samið músík fyrir allskonar sjónvarpsþætti, kvikmyndir og þess háttar.

.

  Tónlist Eivarar og Ginmans er órafmagnaður dökkur nútímadjass og spuni.  Gríðarlegur spenningur er í Danmörku fyrir samstarfi þeirra.  Í febrúar á næsta ári leggjast þau í hljómleikaferð undir yfirskrftinni Vetrardjass:

.

8. feb. Aalborg, Huset
9. feb. Aarhus, Musikhuset, Lille Sal

10. feb. Sønderborghus
11. feb. Vanløse, Kulturstationen Vanløse
15. feb. Óðinsvé, Dexter
16. feb. Kaupmannahöfn, Koncerthuset, Studie 2

.

 

Flott og ofurvinsæl norsk vísnapoppshljómsveit með frábærri söngkonu

  Í útlöndum forðast ég verslanir eins og heitan eld.  Nema plötubúðir.  Ég þefa þær uppi og fer rækilega í gegnum plötuúrvalið.  Iðulega endar það með því að plötusafn mitt fitnar um 20 - 30 plötur.  Verra er að það hefur orðið veruleg breyting á plötumarkaðnum á síðustu árum.  Plötubúðum hefur fækkað svo um munar.  Þær fáu sem eftir lifa bjóða upp á miklu fátæklegra og einhæfara úrval en áður.  Aðeins plötur allra heitustu flytjenda fá hillupláss í dag.

  Ég fann tvær plötubúðir í Ósló.  Einu íslensku plöturnar þar eru með Björk,  Sigur Rós og Jónsa.  Það kom mér á óvart að þar væru ekki plötur með Mezzoforte.  Sú hljómsveit á öflugan aðdáendahóp í Noregi. 

  Vinsælasta vísnapoppshljómsveit Noregs heitir Vamp.  Hún selur upp í 600.000 eintök af plötu.  Vinsælustu myndbönd hennar hafa verið spiluð yfir 1,3 milljón sinnum á þútúpunni.  Söngkona Vamp er færeysk.  Hún heitir Eivör.  Sólóplötur hennar fást einnig í norskum plötubúðum.

 

 

Jón Þorleifs III

 

 

  Fyrir nokkrum dögum hóf ég að blogga um Jón Þorleifsson,  verkamann og rithöfund.  Hann féll frá fyrir nokkrum árum,  þá 96 ára.  Mig langar til að halda minningu þessa merka manns á lofti.  Áður en lengra er haldið bið ég ykkur um að smella á http://jensgud.blog.is/blog/jensgud/entry/1197159/ til að fá forsöguna.  

  Í ofur styttu máli slasaðist Jón við vinnu.  Hann fór á örorkubætur.  Honum mislíkaði það.  Vildi halda áfram að vinna.  Hann lét færa sig yfir á atvinnuleysisskrá og óskaði eftir að fá létta vinnu þar sem bakmeiðsli væru honum ekki fjötur um fót.

  Einn daginn fékk hann boð um að Guðmundur Jaki væri búinn að útvega honum vinnu.  Jóni kom það á óvart.  Þeir höfðu eldað grátt silfur saman.  Þegar Jón mætti til vinnu reyndist um að vera vinna á loftbor.  Þá vinnu gat maður með skemmt bak ekki unnið.  Þetta var óþokkalegur hrekkur af hálfu Gvendar Jaka. 

  Í kjölfar var Jón skilgreindur þannig að hann hefði hafnað vinnu.  Hann var tekinn af atvinnuleysisskrá.  Þá reyndi hann að fá sig aftur skráðan sem öryrkja en var hafnað.  Hann hafði sjálfur tekið sig af þeirri skrá.  Það var ekki hægt að skrá sig út og inn af öryrkjaskrá að eigin geðþótta.  Jón var bótalaus til margra ára.  Honum til lífs varð að hann átti gott og dýrmætt bókasafn.  Fyrstu útgáfur af ýmsum verðmætum bókum,  sumar með eiginhandaráritun og svo framvegis.  Þessar bækur seldi Jón hægt og bítandi fyrir gott verð.  Salan á þeim var Jóni verulega þungbær svo bókelskur sem hann var.

  Sumir segja að Jón hafi sjálfur sett sig í stöðu píslarvotts vegna þrákelni og stolts.  Sennilega var eitthvað til í því.  Jón var ekki tilbúinn að krjúpa á hnjám með betlistaf í hendi.  Smjaður var ekki hans samskiptamáti við embættismenn né aðra.  Hann krafðist réttar síns og barði í borðið.  Stutt viðtöl hans við embættismenn breyttust iðulega á skammri stundu í harkalegt rifrildi.

  Jón var alltaf fínn til fara og snyrtilegur.  Jakkafataklæddur í stífpressuðum buxum.  Hann sagðist ekki vera áhugasamur um fín föt.  Hinsvegar væri ekki tekið mark á manni í gallabuxum.  Honum væri nauðugur einn kostur að koma vel fyrir í klæðnaði til að mark væri á sér tekið.

  1976 fór Júlía systir mín í ferð til Írlands,  ung stelpa.  Hún lenti í flugsæti við hlið Jóns.  Hinu megin við hana í 3ja sæta röð sat ritstjóri Þjóðviljans.  Á flugleiðinni út til Írlands dundaði Jón sér við að yrkja níðvísur um ritstjórann.  Vísurnar fór hann með hátt og snjallt en ritstjórinn lét þær sem vind um eyru þjóta.  Júlíu þótti þetta fyndið.  Ritstjórinn hafði skömmu áður skrifað dóm um ljóðabók eftir Jón.  Fyrirsögnin var "Heiftarvísur".  Það lagðist illa í Jón.  Hann kannaðist ekki við neinar heiftarvísur.  Hann hafði aðeins ort vísur um menn og málefni og taldi sig vera lausan við heift.  Ein vísan var um gamlan vinnuveitanda Jóns:

  Hornstrandar-Hallvarður,

heimskur og kjöftugur.

  Frekur og fláráður.

  Fari hann bölvaður.

  Þegar ljóðabókin kom út gerði Jón sér langa gönguferð til Hallvarðar og færði honum að gjöf eintak af bókinni.  Jón benti Hallvarði á að það væri vísa um hann í bókinni.  Hallvarður svaraði:  "Þakka þér fyrir það,  Jón minn."  Jón hló vel og lengi er hann sagði frá þessu og var þess fullviss að Hallvarði hefði brugðið illilega þegar hann fór að lesa bókina.

  Júlíu þótti öryggi í því,  unglingi,  að vera samferða Jóni í Írlandsferðinni.  Þó að Jón kynni ekkert erlent tungumál ferðaðist hann mikið og var sjálfbjarga í þeim ferðum.  Talaði bara íslensku erlendis og þótti sem útlendingum væri ekki of gott að reyna að skilja þetta eitt af elstu varðveittum tungumálum heims,  íslensku.  Eitt sinn eftir utanlandsferð varð Jóni að orði:  "Mikið er ég feginn að hafa fæðst á Íslandi því íslenska er eina tungumálið sem ég skil."

   

Bestu lög síðustu 15 ára

  Breska poppblaðið New Musical Express er líklega næst áhrifamesta poppblað heims á eftir bandaríska poppblaðinu Rolling Stone.  Það er dálítið skrítið að í Bandaríkjunum,  stærsta/áhrifamesta poppmúsíkmarkaði heims,  er bandaríska poppmúsíkblaðið Rolling Stone hvarvetna til sölu.  Það er svo sem ekki skrítið út af fyrir sig.  Rolling Stone selst í 2 milljónum eintaka og er til sölu á þýsku í Þýskalandi og á frönsku í Frakklandi.  Það skrítna er að breska poppmúsíkblaðið New Musical Express er til sölu í öllum helstu blaðsölustöndum í Bandaríkjunum en ekki næst söluhæsta bandaríska poppblaðið,  Spin.  Hvað þá önnur bandarísk poppblöð á borð við Under the Radar og CMJ, sem eru einungis seld í stóru bandarísku bókaverslunum (Borders,  sem mér skilst að séu á fallandi fæti.  Jafnvel í New York).

  Fyrir bragðið eru bandaríska Rolling Stone og breska NME ráðandi á alþjóðamarkaði.  Nú hefur ritstjórn NME tekið saman lista yfir bestu lög síðustu 15 ára.  Þar tróna efst:

1   Radiohead:    Paranoid Andriot

2   Arcade Fire:  Rebellion (Lies)

3   Outkast:  Hey Ya!

4  The Strokes:  The Nite

5   The Killers:  The Brightside

  Ég er ekki að kvitta undir þennan lista.  Satt að segja þykir mér hann frekar þunnur þrettándi.  Einkum er The Strokes vont dæmi.  En listinn lagast töluvert við næsta lag:

6   The White Stripes:  Fell In Love With A Girl

7   Hot Chips:  Over and Over

8   Amy Winehouse:  Rehab

9  The Verve:  Bitter Sweet Symphony (stolið frá The Rolling Stones).

10   The Libertines:  Time For Heroes.  Þetta er ekki þeirra flottasta lag en þeir áttu stundum góða spretti.

15  MIA:  Paper Planes.  Þetta lag er margverðlaunað sem einkennislag myndarinnar Slumdog Millioner.  Færri vita að það er byggt á laginu frábæra  Straight To Hell  með The Clash.

  Síðar varð þetta lag frægt í flutningi Lily Allen.  Söluhagnaður af þeirri kráku (cover song) rann óskiptur til fórnarlamba stríðs í Írak og gott ef ekki fleiri.  Elvis Costello var með þetta lag um tíma á sinni hljómleikaskrá.  Einnig Jacob Dylan (sonur Bobs Dylans).  

  Ekki má heldur gleyma kráku New York ska-döbb-hljómsveitarinnar Skinnerbox á þessu lagi: