Lagalistinn í Sunnudagshugvekjunni í dag

   

.

  Sunnudagshugvekjan á Nálinni fm 101,5 var í loftinu á milli klukkan 19.00 til 21.00 í kvöld við dúndurgóðar undirtektir áheyrenda.  Það er ekki einleikið hvað þessi þáttur leggst vel í hlustendur.  Þeir kumra af ánægju undir honum.  Sigvaldi Búi Þórarinsson sá um hugvekjuna á móti mér.  Þannig verður það í framtíðinni.  Við vissum ekkert af lagavali hvors annars fyrir útsendingu.  Það fléttaðist ljúflega saman.  Þessi lög voru afgreidd í þættinum:  

.

1   Kynningarlag þáttarins:  The Clash:  Time is Tight 

2   Led Zeppelin:  Living Loving Maid (She´s Just A Woman)

3   Jimi Hendrix:  Crosstown Traffic

4   Hindu Love Gods: Battleship Chaines

5   The Byrds:  Mr. Tambourine Man

6   Flying Burrito Brothers:  Lazy Days 

7  The Beach Boys:  Sloop John B

8  101ers:  Lets a get a bit a rockin´

9   Soul-lag dagsins:  Percy Sledge:  Try A Little Tenderness

10  Pönk-klassíkin:  The Skids:  Into The Valley

11  Neil Young:  Harvest Moon 

12  Reggí-lag þáttarins:  Johnny Clarke: Freedom Blues

13  Eric Clapton:  Layla 

14  Óðmenn:  Það kallast að koma sér áfram

15  Dikta:  Warnings

16  Eddy Mitchell frá Frakklandi:  C´est un rocker

17  Bubbi:  Jón pönkari  

18  Áge Aleksandersen frá Noregi:  Levva Livet

19  Bjartmar og Bergrisarnir:  Sagan

20  Gildran:  Nútímakonan

21  Dikta:  Let´s Go

22  Das Kapital:  Lili Marlene

23  Megas:  Ég á mig sjálf

24  Högni Lisberg frá Færeyjum:  Learn to Ride on Waves 

.

  Þátturinn er endurfluttur næsta föstudag klukkan 19.00 á Nálinni fm 101,5.  Einnig á netinu:   http://media.vortex.is/nalinfm 

.

  Lagalisti þáttarins fyrir viku er hér:  http://www.jensgud.blog.is/blog/jensgud/entry/1083677/

.

  Gaman væri að heyra frá ykkur "komment" á þáttinn;  ábendingar um það sem betur má fara,  kvitt fyrir það sem vel hefur tekist,  uppástungur um lög eða annað sem ykkur dettur í hug.  Uppástungur um lög þurfa helst að falla að þeim ramma sem þættinum er settur:  Klassískt rokk frá sjöunda og áttunda áratugnum (60´s og 70´s),  íslenskt rokk og heimspopp (helst sungið á móðurmáli flytjandans).

.

Rómantíski hálftíminn

  Í kvöld,  nánar tiltekið klukkan 22.00,  fer í loftið þátturinn  Rómantíski hálftíminn.  Það er þáttur með búfræðingnum Jóhanni Kristjánssyni á Nálinni fm 101,5.  Þrátt fyrir nafnið á þættinum,  Rómantíski hálftíminn,  verður hann í loftinu til klukkan 1.00 eftir miðnætti.  Í það minnsta. 

  Mánaðarlega verður Jóhann með gest í þættinum,  fræga rokkstjörnu,  sem kemur með uppáhaldslögin sín undir hendinni og leyfir hlustendum Nálarinnar að heyra.  Að öðru leyti hef ég ekki hugmynd um hvað annað verður undir nálinni hjá Jóhanni. 

  Svo ég skjóti blint út í loftið þá giska ég á eitthvað ljúft með Iron Maiden,  Black Sabbath og / eða The Prodigy.  Hægt er að hlusta á þáttinn á netinu:   http://media.vortex.is/nalinfm 

Lagalistinn í Sunnudagshugvekjunni á Nálinni

  Gríðarleg stemmning var fyrir Sunnudagshugvekjunni á Nálinni 101,5 í gær (á milli klukkan 19.00 og 21.00).  Eftir þáttinn rigndi yfir mig úr öllum áttum spurningum um flytjendur hinna ýmsu laga.  Til að einfalda málin og gera mönnum tilveruna auðveldari birti ég hér heildarlista yfir lögin sem voru kynnt og spiluð í þættinum.  Eins og sést á lagalistanum var þátturinn tvískiptur:  Í fyrri hlutanum voru spiluð þekkt lög úr klassísku rokkdeildinni.  Í seinni hlutanum voru spiluð lög frá flytjendum utan engilsaxneska málsvæðisins.  Rík áhersla var lögð á að þeir flytjendur syngi á móðurmáli sínu,  hvort sem þeir eru íslenskir eða tyrkneskir.  Óvíst er að sú regla standi til frambúðar fremur en margt annað varðandi þáttinn. 

  Þannig var lagalistinn:

1   Kynningarlag þáttarins:  The Clash:  Time is Tight

2   Gerogia Satallites:  Hippy Hippy Shake

3   Uriah Heep:  Easy Livin´

4   Deep Purple:  Black Night

5   John Lennon:  Peggy Sue

6   Paul McCartney:  Run Devil Run 

7   The Byrds:  Fido 

8   Spencer Davis Group:  Keep on Running

9   Richard & Linda Thompson:  I Want To See The Bright Light Tonight

10  Dave Edmunds:  I Hear you Knocking

11  The Animals:  Bring it on Home to Me

12  Pönk-klassíkin:  Buzzcocks:  What Do I Get

13  Reggílag dagsins: U-Roy:  Rivers of Babylon

14  Trúbrot:  Þú skalt mig fá

15  Týr frá Færeyjum:  Ormurinn langi

16  Utangarðsmenn:  Sigurður var sjómaður

17  Iris frá Portúgal:  Oh Máe!

18  Þursaflokkurinn:  Jón var kræfur karl og hraustur

19  Kim Larsen frá Danmörku:  Jakob den glade

20  Megas:  Klörukviða

21  Mariina frá Grænlandi:  Issumaangaa

22 Flowers:  Slappaðu af

23  Nina Hagen frá Þýskalandi:  My Way

24  Kamarorghestar:  Samviskubit

25  Pentagram frá Tyrklandi:  oo

26  Maggi Mix:  Snabby í Krókódílalandi

27  Afkynningarlag þáttarins:  The Clash:  Time is Tight

 

  Þátturinn lagðist vel í þá sem hafa tjáð sig um hann við mig.  Örfáir hnökrar voru á honum.  Eins og gengur.  Við þáttastjórnendurnir,  ég og Sigvaldi Búi Þórarinsson,  hittumst í fyrsta skipti 2 mínútum fyrir útsendingu.  Við lærðum nöfn hvors annars í beinni útsendingu og gekk það misvel.  Sigvaldi er vanur tæknimaður af Aðalstöðinni en var að sjá tækjabúnaðinn á Nálinni í fyrsta skipti.  Hann tók að sér tæknimálin.  Tækniborð á svona útvarpsstöð er hlaðið tugum takka,  sleða og allskonar.  Það var mesta furða hvað fátt var um mistök.  Engin stórvægileg.  Aðeins örfá smáatriði sem fæstir hafa tekið eftir.

  Lagavalið í þessum fyrsta þætti var í mínum höndum.  Í næstu þáttum velur Sigvaldi helming laga á móti mér.  Af föstum liðum sé ég áfram um pönk-klassíkina og reggílag dagsins.  Sigvaldi mun sjá um nýjan fastan lið;  soul-lag þáttarins. 

  Mér heyrist á Sigvalda að hann sé meira fyrir rólegri og mýkri músík en ég.  Reyndar sæki ég heima hjá mér yfirleitt í þyngri og harðari rokkmúsík en þá sem er á lagalistanum.  Ég verð dáldið að gæta mín á að vera ekki með of brútal músík í þættinum.  Sigvaldi kemur til með að veita mér aðhald varðandi það og "ballansera" þetta með mér.  Þegar ég var á Radíó Reykjavík í gamla daga var slegið á puttana á mér þegar ég missti mig í Amon Amarth.  Á Nálinni er viðmiðið í svona almennri dagskrá að ganga ekki mikið lengra í hörðu rokki en Black Sabbath.  Sem er fínt.  Nálin er flott útvarpsstöð og hefur farið glæsilega af stað.  

  Mér varð á að segja í kynningu á  Hippy Hippy Shake  með Georgie Satallites að Dave Clark Five hafi gert lagið frægt.  Hið rétta er að það voru Swinging Blue Jeans.  Smá fljótfærnisvilla sem ég fattaði um leið og ég ók af stað frá Nálinni eftir þáttinn.  Þessar hljómsveitir voru á líku róli og spiluðu sum sömu lög.  En rétt skal vera rétt.

  Hægt er að hlusta á Nálina hvar í heimi sem er á netinu: http://media.vortex.is/nalinfm 

  Ég veit þegar af hlustendum í Bandaríkjunum og Færeyjum.  Svo bætast Bretland og meginland Evrópu við.  Því næst Asía, Afríka og Grímsey.  Og svo framvegis.  Fjörið er rétt að byrja.

  Gaman væri að fá viðbrögð hér við þættinum og ábendingar,  bæði um lagaval og það sem betur má fara.  Og klapp á bakið fyrir það sem vel tekst til.  Já,  eiginlega aðallega það.

Sunnudagshugvekjan

 

  Nýja útvarpsstöðin,  Nálin fm 101,5,  hefur slegið rækilega í gegn.  Þó er stöðin ekki vikugömul.  Þar er spilað klassískt rokk (classic rock) eins og enginn sé morgundagurinn.  Eða þannig.  Jú...eða...sko...annað kvöld er Sunnudagshugvekja.  Nánar tiltekið á milli klukkan 19.00 og 21.00.  Það er tvískiptur þáttur.  Fyrri klukkutímann spila ég valin rómantísk og væmin vel þekkt klassísk rokklög.  Það kemur ekki til greina að lögin verði óvalin.  Ég á eftir að taka þau til.  Mér þykir líklegt að það verði eitthvað á línunni Led Zeppelin-Deep Purple-Black Sabbath.  Ekki endilega með þessum hljómsveitum.  En eitthvað í svipuðum stíl.  Ég reyni að spila lög sem ég hef ekki þegar heyrð spiluð á Nálinni.  Ég reyni. 

  Í seinni hluta þáttarins spila ég íslensk lög í bland við "heimspopp".  Ég hallast frekar að íslenskum lögum sungnum á íslensku.  Það er asnalegt að heyra Íslendinga syngja á útlensku fyrir Íslendinga.  Á þessu augnabliki veit ég ekki hvort lögin verða með Trúbroti,  Mánum,  Óðmönnum eða öðrum úr þeirri deild.

  "Heimspoppið" verður ekki bundið við það sem kallast "World Music".  Það verða öllu frekar lög með alþjóðlegu yfirbragði en sungin á móðurmáli flytjandans.  Þetta geta verið lög sungin á tyrknesku,  japönsku,  frönsku,  portúgölsku,  grænlensku,  pólsku eða hvaða tungumáli sem er.  Flott lög.  Það er málið á Nálinni fm 101,5.

  Kannski getur verið gaman að vera með fasta liði í hverjum þætti.  Til að mynda pönkklassík vikunnar,  reggílag þáttarins og skrítna lagið.  Pönkklassíkin er þá sótt í smiðju þekktustu laga pönkbyltingar áttunda áratugarins.  Reggílagið er þá ekta jamaískt (ekki Eric Clapton eða UB40 að spila Bob Marley né annað enskt reggí-popp).  Skrítna lagið getur verið eitthvað þar sem flytjandinn tekur músíkina öðrum tökum en venja er með hefðbundin popplög.  Það ræðst af viðbrögðum hlustenda hversu langlífir þessir föstu dagskrárliðir verða.  Þar fyrir utan verð ég ekki einn með þáttinn í framtíðinni.  Sigvaldi heitir maður sem deilir þættinum með mér eftir þennan fyrsta þátt.  Ég veit ekki hverjar hans pælingar eru með þáttinn.  

 

  Hægt er að hlusta á Nálina á netinu:  .http://media.vortex.is/nalinfm

.

       

Æðislega flottur útvarpsþáttur

  Gunni "Byrds" fór á kostum í útvarpsþættinum  Fram og til baka og allt í kring  á Nálinni fm 101,5 á milli klukkan 11.00 til 13.00 í dag (sjá: http://www.jensgud.blog.is/blog/jensgud/entry/1082979/) .  Lagavalið var fjölbreytt og spennandi.  Í bland voru lög sem hafa sjaldan eða aldrei heyrst í útvarpi og önnur sem langt er síðan ómuðu í útvarpinu.  Þátturinn verður endurspilaður, ja,  vonandi sem oftast.  Ég er ekki klár á hvenær.  Sennilega í kvölddagskrá næstu daga.

  Gunni byrjaði bratt á hörðum blúslögum með Eric Clapton og John Mayall.  Síðan tóku við kántrý-skotin lög með Gram Parsons og fleirum.  Blondie og Jethro Tull fylgdu í kjölfarið;  Tom Petty,  Bob Dylan,  Gene Clarke,  Elvis Costello og Manfred Mann.  Áhugaverður samanburður var gerður á flutningi The Byrds og senegalska tónlistarmanninum Yousso N´Dour á lagi Bobs Dylans  Chimes of Freedom.  Gullmolinn var fyrsta The Clash lagið,  Rock and Roll Time  af meistaraverkinu  Cardiff Rose  með Roger McGuinn.   Þetta magnaða rokklag sömdu þeir Roger og Kris Kristofferson saman.  Því miður er lagið ekki að finna á þútúpunni. 

  Í kynningum á milli laga fylgdu ýmsir fróðleiksmolar.  Það verður spennandi að fylgjast með næstu þáttum Gunna "Byrds" á milli klukkan 11.00 og 13.00 á laugardögum á Nálinni fm 101,5.  Eftir þáttinn brugðum við Gunni okkur á Bar 46 á Hverfisgötu.  Þá brá svo við að ýmsir gestir staðarins höfðu hlustað á þáttinn.  Nálin virðist því vera strax með ágæta hlustun.

  Einn gestur,  Ólafur Haukur (ekki Símonarson en Dylan-fan og skólagenginn í Varmahlíð í Skagafirði),  sagðist hafa náð Nálinni illa á útvarpstæki sitt.  Hann skellti sér þá á netið,  http://media.vortex.is/nalinfm,  og hlustaði á hreina og tæra útsendingu þar. 

 

Nálin komin á flug

  Splunkuný útvarpsstöð fór í loftið um helgina.  Stöðin heitir Nálin og er í eigu Útvarps Sögu.  Útvarpsstjóri Nálarinnar er Einar Karl,  sonur Arnþrúðar Karlsdóttur útvarpsstjóra Útvarps Sögu.  Nafnið Nálin er tilvísun í algengt orðatiltæki þeirra sem spiluðu (og spila ennþá) vinylplötur.  Sagt er að þessi eða hin platan sé undir nálinni.  Nafnið Nálin vísar þannig til daga vinylplötunnar áður en geisladiskurinn kom til sögunnar.  Músíklína Nálarinnar spannar einmitt klassíska rokkið frá gullaldarárum Lp-vinylplötunnar. 

  Hugtakið "klassískt rokk" er notað yfir rokk hippaáranna (´67-´72) og skylda músík.  Eldri rokklög á borð við  You Really Got Me  með The Kinks (1965),  Like a Rolling Stone  með Bob Dylan (1965) og  Wild Thing  með The Troggs (1966) eru dæmigerð "klassík rokk" lög. 

  Þungarokk hljómsveita eins og Deep Purple og Black Sabbath er "klassík rokk".  Einnig fyrstu vinsælu pönkslagararnir (Sex Pistols,  The Clash...).  Harðara og þyngra rokk (death metal,  svartmálmur,  harðkjarni,  speed-metal,  þrass-metall) telst aftur á móti ekki til "klassík rokks".  Heldur ekki grugg (grunge) tíunda áratugarins.  Né heldur gamla rokk og ról sjötta áratugarins.  Nema þegar gömlu rokk og ról lögin eru krákuð (cover) af yngri rokkurum með "fössuðum" gítarhljóm og þess háttar.

  Það sem ég hef heyrt á Nálinni lofar afskaplega góðu.  Þar á bæ eru engir talibanar sem rígbinda lagavalið við Hendrix,  Joplin og Doors.  Lagavalið er kryddað með gömlum blús,  afrískri sveiflu og ýmsu öðru áhugaverðu.

  Á morgun,  laugardag,  á milli klukkan 11.00 og 13.00 verður spennandi þáttur á Nálinni.  Hann er í umsjón snillingsins Gunna "Byrds" (Gunnar Gunnarsson).  Gunni var lengi kenndur við verslunina Faco.  Þar var hann verslunarstjóri hljómplötu- og hljómtækjadeildar.  Hann vann líka í Japis og fleiri slíkum búðum. 

  Gunni er hafsjór af fróðleik um músík og segir lifandi og skemmtilega frá.  Hann sá í gamla daga um músíkskrif í Tímanum og síðar í Dagskrá vikunnar.  Það sem gerir þáttinn hans á Nálinni einnig forvitnilegan er að kappinn á risastórt plötusafn sem hefur að geyma fjölda sjaldgæfra platna.  Næsta víst er að hlustendur eiga eftir að heyra hjá honum ýmsar perlur sem þeir hafa aldrei heyrt áður.  Lög með þekktum flytjendum í öðruvísi útsetningu en maður á að venjast;  allskonar "rare" og "out takes" og "alternative versions"...

  Mig minnir að þátturinn hans Gunna heiti  Fram og til baka.  Eða eitthvað svoleiðis,  sem gefur til kynna að hann fari um víðan völl.  Ég ætla að kíkja inn í þáttinn og spjalla um annan þátt á Nálinni.  Sá er á dagskrá á sunnudagskvöldum á milli klukkan 19.00 og 21.00.

   Nálin sendir út á fm 101.5.

    

Íslenskt lag á færeyskri plötu

 

  Fyrir nokkrum dögum kom út platan  Syng ein góðan  með færeyska stuðboltanum Jens Lisberg.  Þar flytur hann lagið  Litli tónlistarmaðurinn  eftir Freymóð Jóhannesson.  Það er þekktast í flutningi Bjarkar Guðmundsdóttur á plötunni  Gling gló.  Í flutningi Jens Lisbergs heitir lagið  Mamma.   Jens Lisberg er í hópi vinsælustu tónlistarmanna Færeyja.  Hann hefur sent frá sér á annan tug platna.  Fjöldi laga hans hafa skorað hátt á færeyskum vinsældalistum.

  Sex manna hljómsveit Jens Lisbergs leikur fyrir dansi á Færeyskum fjölskyldudögum á Stokkseyri núna um verslunarmannahelgina.  Það verður mikið hopp og hí.  Fjörlegir dansleikir eru sérsvið Jens Lisbergs og félaga.  Í bland við frumsamin lög og önnur vinsæl færeysk lög flytur Jens Lisberg þekkt bandarísk kántrý-stuðlög á borð við  Hello Mary Lou  og  Diggi,  Liggy,  Lo.   Þau syngur Jens við færeyska texta eftir Karl Eli.  Það verður heldur betur líf og fjör á dansgólfinu á Stokkseyri um helgina.

  Hér má heyra sýnishorn af lögunum á plötunni  Syng ein góðan.  Lagið  Mamma  er nr. 10: 

 http://www.tonlist.is/Music/Album/536897/jens_lisberg/syng_ein_godan/

  Hér má lesa meira um plötuna:

http://www.tutl.com/webshop/index.php?productID=477&PHPSESSID=2472besnacl4d2kc81g2n0itv3

  Hér er hægt að heyra fjögur lög sem Jens Lisberg syngur á ensku fyrir alþjóðamarkað:

http://www.myspace.com/jenslisberg

  Meira um Færeyska fjölskyldudaga á Stokkseyri:

http://www.facebook.com/event.php?eid=140751525953424&ref=search#!/pages/Faereyskir-fjolskyldudagar/140770739276188?ref=ts

http://www.stokkseyri.is/web/news.php?nid=4934&view=one

Missið ekki af Rokklandi!

  Rokkland á rás 2 er þáttur sem helst má ekki missa af.  Síst af öllu í dag.  Þó þetta sé jafnan eðalflottur þáttur undir styrkri stjórn snillingsins Óla Palla þá verður þátturinn í dag extra eðalflottur og toppar flesta eða jafnvel alla fyrri þætti Rokklands.  Það er næsta víst.  Um síðustu helgi var Óli Palli nefnilega - ásamt fjölda annarra Íslendinga - staddur á G!Festivali í Götu í Færeyjum.  Þátturinn ber þess sterk merki.  Ljósmyndin í "haus" þessa bloggs er frá G!Festivali fyrir örfáum árum.

  Meðal viðmælenda Óla Palla í Rokklandi í dag verða: Jón Tyril,  forsprakki G!Festivals og gítarleikari Clickhaze;  Eivör;  hljómsveitin Páll Finnur Páll (sjá myndband hér fyrir neðan);  Sigvör Laksá,  umboðsmaður Eivarar;  Kristian Blak,  hljómborðsleikari og aðalsprauta færeysks tónlistarlífs (sjá myndband hér fyrir neðan);  íslensku hljómsveitirnar FM Belfast og Bárujárn;  færeyska þungarokkssveitin Heljareyga sem er hliðarverkefni Hera,  söngvara og gítarleikara Týs (sjá myndband neðsta myndbandið);  hljómsveitin Áfenginn;  Synarchy,  danska hljómsveitin Nephew (sjá myndband hér efst) og margt fleira spennandi.  Þvílíkt fjör. 

  Rokkland er á dagskrá rásar 2 á milli klukkan 16.00 og 18.00.  Eivör og Kristian Blak fara síðan á kostum á Færeyskum fjölskyldudögum á Stokkseyri um næstu helgi - ásamt hátt í tveimur tugum annarra færeyskra tónlistarmanna.  Það verður meiriháttar gaman. 

Bassaleikari The Kinks fallinn frá

  Í fyrradag lést Pete Quaife,  bassaleikari einnar þekktustu hljómsveitar rokksögunnar,  The Kinks.  Pési spilaði í öllum vinsælustu lögum hljómsveitarinnar.  Hinsvegar hætti hann tvívegis í hljómsveitinni.  Fyrst í nokkra mánuði 1966 og aftur í lok áratugarins.  Hann spilaði síðast með The Kinks 1990 er hljómsveitin var vígð inn í Frægðarhöll rokksins (Rock and Roll Hall of Fame) í Bandaríkjunum.

  Pési stofnaði The Kinks 1961 með Davis-bræðrunum,  Ray og Dave.  Framan af var æskuvinur Pésa á trommunum.  Síðar leysti trommuleikari The Rolling Stones,  Mike Avory,  hann af. 

  Fyrstu árin var hljómsveitin iðulega bókuð undir nafninu The Pete Quaife Quintet.  1963 var nafnið The Kinks tekið í gagnið.  Það er stundum ranglega þýtt í íslensku útvarpi sem Kóngarnir.  Nafnið er dregið af afbrigðilegu kynlífi (kinký) jafnframt því að vera stafaleikur að hætti Bítlanna,  The Beatles.

  Pési spilaði á 8 hljómleikum með The Kinks á Íslandi 1965.  Þá var hljómsveitin á hápunkti frægðar sinnar.

  Pésa leiddist að vera í The Kinks utan sviðs.  Hann upplýsti að þó liðsmenn hljómsveitarinnar hafi virst góðir vinir á sviði hafi þeir utan sviðs rifist og slegist eins og hundar og kettir.  Ekki einstaka sinnum heldur alltaf.  Illkvitni, kvikindisskapur og ofbeldishneigð réðu ríkjum.  Jafnframt var ofríki Rays sem söngvahöfundar og útsetjara algjört.  Ef undan er skilinn slaki hvað þetta varðar á plötunni Village Green Preservation Society.  Hún kom út 1968.

  Síðustu áratugi bjó Pési í Kanada og starfaði þar sem teiknari.

Ný og spennandi plata frá Hebba

  Herbert Guðmundsson er í hljóðveri þessa dagana að taka upp nýja plötu.  Plötuna vinnur hann með Svani syni sínum.  Sá var nýverið kosinn besti söngvarinn í Músíktilraunum.  Þeir feðgar semja lögin þannig að Svanur leggur til hljómagang,  kaflaskipti og þess háttar og Hebbi bregður laglínum ofan á.  Í bland semur Hebbi einnig upp á gamla mátann á kassagítarinn sinn.

  Þegar hafa 5 af 10 lögum plötunnar verið hljóðrituð.  Gulli Briem sér um trommuleikinn;  Tryggvi Hübbner og Stefán Magnússon (Eiríkssonar) spila á gítara;  Haraldur Þorsteinsson plokkar bassann;  Og Magnús og Jóhann syngja bakraddir. 

  Dr.  Gunni heyrði upptökurnar á dögunum og skrifar á bloggsíðu sína:  "Ég heyrði ekki betur en þetta væru allt meira og minna súperhittarar."

  Doktorinn hefur gott nef fyrir "hitturum".  Ég held ég fari rétt með að hann eigi vinsælasta lagið á rás 2 um þessar mundir,   Vinsæll  með Hvanndalsbræðrum.

  Hebbi hefur sent frá ótal öfluga smelli í áranna rás.  Sumir eru orðnir sívinsælir,  svo sem  Can´t Walk Away,  Hollywood  og  Svaraðu kallinu.  Síðasta plata hans,  Spegill sálarinnar,  kom út 2008 og var hans besta.  Um hana má lesa hér:  http://jensgud.blog.is/blog/jensgud/entry/737633/

  Fyrir helgi var viðtal við Hebba á visir.is.  Þar getur að heyra upphaf lagsins  Time.  Sjá:  http://www.visir.is/atti-erfitt-med-ad-vidurkenna-fraegdina---myndband/article/201045375416

  Time  verður fyrsta lagið af plötunni sem fer í útvarpsspilun.  Ég ætla að hlusta á það í vikunni og læt ykkur vita hvernig það hljómar.  Þangað til er gaman að rifja upp: