Ég er kominn heim í heiðardalinn

7.4.2010 | 23:49

Ég er kominn heim í heiðardalinn

Ég er búinn að stunda á fullu Götu í Færeyjum undanfarna daga. Hef farið þangað á hverjum degi og heilsað upp á Færeyinga. Svo skemmtilega vildi til að ég átti brýnt erindi við þetta fólk. Með í för var ljósmyndarinn knái Ingólfur Júlíusson, gítarleikari Q4U. Í dag er Ingólfur þekktastur fyrir ljósmyndir í nýútkominni bók Evu "nornar" Hauksdóttur, Ekki lita út fyrir - sjálfshjálparbók handa sjálfri mér og öðrum ýlandi dræsum. Dúndur bók. Ég mæli með henni fyrir aðra en teprur.

Færeyingarnir sem ég heimsótti í Götu eru allir gamlir kunningjar og vinir mínir. Þess vegna var gaman að eiga erindi við þá vegna bókar sem ég hef verið ráðinn til að skrifa. Meira um bókina síðar. Hún er skemmtilegt verkefni.

Meðal þeirra sem ég heilsaði upp á var styttan af Þrándi í Götu. Vegna þess hvað Þrándur var þver fyrir og stóð fast á sínu er styttan af honum lárétt.

Þessi túlkun á Þrándi er snilld. Hverjum öðrum en Færeyingum dytti í hug að heiðra frumkvöðul í menntun og baráttu gegn skattgreiðslum til Noregs og kristnitöku á þennan hátt?

Það var frekar rólegt í Götu og nágrannabyggðum á Austurey undanfarna daga. Verslanir meira og minna lokaðar. Einnig veitingastaðir, pöbbar og svo framvegis. Kannski hafði þetta eitthvað með frjósemishátíðina Páska að gera. Eða extra langa föstudaginn, skyrdaginn og hvað þeir heita þessir skrítnu dagar. Hitt veit ég að Færeyingar fjölmenntu í kirkju dag eftir dag. Ekki veit ég hvað þeir voru að gera þar. Ég hafði öðrum hnöppum að hneppa en fylgjast með því.

Að venju var rosalega gaman í Færeyjum. Það þarf ekki að nefna það. Þó ég geri það. Gestrisni slík að í heimsókn á sitthvort heimilið vorum við Ingólfur nestaðir er við kvöddum. Verra var að í flugvélinni á leiðinni heim lentum við í einelti af hálfu flugfreyjanna. Sem annars voru frábærar.

Þannig var að við sátum aftast í troðfullri vél. Drykkir, samlokur og sælgæti var borið í farþega. Það var byrjað að dekstra við þá sem fremstir sátu. Síðan þeir sem næst fremst sátu. Og þannig koll af kolli. Þegar röðin var komin að okkur Ingólfi var bakkað aftur fremst í vélina og fyllt á glös hjá þeim sem fremstir sátu. Þannig gekk það um hríð. Loks þegar kom að okkur í annarri atrennu lentu flugfreyjurnar á kjaftatörn við þá sem sátu í næstu sætaröð fyrir framan okkur. Liðið er svo skemmtilega afslappað og ljúft. Áður en yfir lauk var samt ekki hjá því komist að eineltinu linnti. Allir voru glaðir þegar upp var staðið.

Við hlið mér í flugvélinni sat "næstum" 10 ára strákur (eins og hann orðaði það). Hann var hjá færeyskum föður sínum yfir páskana og á íslenska mömmu á Akureyri. Í klifri upp í heiðloftið blátt var ókyrrð. Nokkuð hressileg. Stráksi varð verulega hræddur. Fullyrti að flugvélin myndi hrapa. Hann bar færeyska ömmu sína fyrir því. Hún hafði kvatt hann sérlega hlýlega vegna þess að illa veðraði og flugvél hrapaði í Danmörku nokkrum dögum áður. Rifjaðist þá upp vögguvísa eftir Halldór Laxness:

Sofnaðu svínið þitt

svartur í augum.

Farðu í fúlan pytt

fullan af draugum.

Meginflokkur: Tónlist | Aukaflokkar: Ferðalög, Ljóð, Menning og listir | Facebook

Athugasemdir

Izz...

Mér er alveg zama hvað þú zegir, gamli göndull.

Ztöndum, & oftar en ekki, ertu znillíngur.

Steingrímur Helgason, 8.4.2010 kl. 00:10

Steingrímur, ég vildi að satt sé. Svo er þó ekki. Fjarri því.

Jens Guð, 8.4.2010 kl. 00:17

Er þessi mynd alvöru? Ekki fótosjoppuð? Er styttan út á hlið? Velkominn heim

Jóna Kolbrún Garðarsdóttir, 8.4.2010 kl. 00:27

Jóna Kolbrún, styttan er svona. Þetta er ekki fótósjoppað. Þetta er yndisleg útfærsla á frægasta syni Götu. Merkum manni sem var svokallaður "höfðingi" fyrir röskum 1000 árum í Götu í Færeyjum. Hörkutól sem bauð norska yfirvaldinu byrginn. Færeyingar eru aðdáunarvert djarfir í öllu sem snýr að myndlist og arkítektúr. Ég get ekki ímyndað mér að hugmynd að svona styttu kæmi upp á Íslandi. Hvað þá að hugmyndin yrði samþykkt og framkvæmd. Þetta er yndislegt. Norræna húsið í Þórshöfn í Færeyjum er annað dæmið. http://www.facebook.com/people/Nordurlandahusid-I-Foroyum/694901929#!/profile.php?id=694901929

Jens Guð, 8.4.2010 kl. 01:03

Meiriháttar flott, Norræna húsið í Þórshöfn.

Jens Guð, 8.4.2010 kl. 01:04