Frábærlega fyndinn hrekkur

 

  Litla hafmeyjan  á rás 2 er einn allra skemmtilegasti þáttur í íslensku útvarpi (ég þekki ekki nógu vel til útlendra útvarpsstöðva upp á samanburð að gera).  Að venju fóru félagarnir á kostum í þættinum í dag.  Mestu munaði þar um nettan hrekk þeirra við trommusnillinginn og plötusnúðinn DJ Viðar,  vinsælasta plötusnúð austan Eyjafjallajökuls.

  Forsagan er sú að sonur Viðars,  Andri Freyr,  er annar tveggja umsjónarmanna  Hafmeyjunnar.  Viðar lætur það ekki hindra sig í að hringja inn í þáttinn og taka þátt í spurningakeppni þegar vinningur er hvítlauksristaður humarhali.  Viðar kann betur flestum öðrum að meta svoleiðis lostæti.

  Hinn umsjónarmaður  Hafmeyjarinnar,  Doddi litli,  bregður á leik.  Lætur vinninginn ekki skila sér til Viðars.  Viðar,  kominn með litla fingur á humarbitann,  sættir sig ekki við að bitinn sé rífinn frá sér þegjandi og hljóðalaust heldur sækir málið af fullum þunga.  En reynir að sýna kurteisi og næstum því skilning á vandamálinu til að byrja með.  Að því kemur þó að kurteisin virðist ekki ætla að skila árangri og kappinn fer að byrsta sig.  Viðar er ekki vanur að sætta sig við að menn séu með múður.  Hann er vanari að taka í hnakkadrambið á þeim sem eru með stæla og kynna þeim reyðfirska sjóarahnefa.  Dodda litla til happs var að í samtali þeirra skildu landshlutar þá að.  

  Hér má heyra þáttinn: 

http://dagskra.ruv.is/ras2/4522439/2010/05/22/ 

  Hrekkurinn við Viðar er í síðasta þriðjungi þáttarins.  Annars er þátturinn það skemmtilegur að ástæða er til að hlusta á hann allan.  Andri Freyr á afmæli í dag og er að mestu fjarri góðu gamni.  Helgi Seljan hleypur í skarðið.  Til hamingju með afmælið,  Andri!

  Ljósmyndin hér fyrir ofan var tekin fyrir næstum fjórum áratugum af súpergrúppunni Frostmarki.  Viðar stendur þarna í röndóttri peysu,  einbeittur á svip og ákveðinn.  Við hlið hans er hljómborðsleikarinn Leifur Leifs,  sonur Jóns Leifs.  Lengst til vinstri með bassann er Guðmundur Einarsson,  síðar aflahæsti skipstjóri Vestfjarða til margra ára.  Fyrir miðju er,  nú gamli maðurinn ég.  Þarna ætti líka að vera gítarsnillingurinn Villi Guðjóns.  Og líka gítarleikari frá Þorlákshöfn sem heitir Gunnar (að mig minnir).  Gott ef gítarleikarinn þarna heitir ekki Andrés eða eitthvað svoleiðis og var frá Blönduósi.  Við vorum allir á Laugarvatni.  Hann var rekinn úr skólanum (man ekki fyrir hvað).  Við Viðar stálum einhverjum plötum frá honum af því tilefni (og frá fleirum í bland).  Svo vorum við reknir fyrir fyllerí.  Eins og gengur.  Þá rændum við plötubúðir í Reykjavík í staðinn.  Það var ódýrara en kaupa plöturnar.  Svo er hneykslast á ólöglegu niðurhali í dag.  Tímarnir líða og breytast.

 

Athugasemdir

[Axel Jóhann Hallgrímsson, 22.5.2010 kl. 23:11]

Skemmtileg mynd Jens. Gunnar hét hann og var Herbertsson held ég endilega.

[Jens Guð, 22.5.2010 kl. 23:22]

  Axel,  takk fyrir að rifja það upp.  Það er mín skömm að eiga erfitt með að muna nöfn þessara ágætu skólafélaga okkar.  Gunnar var ljúfur og frábær náungi sem spilaði síðar með einhverri þekktri hljómsveit sem ég enn og aftur man ekki nafnið á.

[Axel Jóhann Hallgrímsson, 23.5.2010 kl. 00:05]

Skömm frá að segja, en ég man ekki hvað Blönduósingurinn heitir, þó ég ætti að gera það. Nafnið Andrés er ekki heitt í mínum huga. Ég legg höfuðið í bleyti.

[Sverrir Einarsson, 23.5.2010 kl. 06:55]

Takk fyrir þetta Jens, að neita ekki uppruna sínum er gott, því þar  sem ég er orðinn "rúmlega miðaldra" leiðist mér að hlusta á "jafnaldra" mína vera að rifja upp unglingsárin og þá í einhverjum KFUM drengja stíl, eins og þeir hafi alist upp með stafla af geislabaugum á hausnum.

Aldrei "gert neitt ljótt", ekki svo mikið sem svindlað sér í strætó (þeir sem bjuggu á malbikinu).

Auðvitað voru þið reknir úr þessum virðulega skóla, það er nóg að líta á myndina,  síðhærðir, tónlistarsinnaðir og þar með hlutuð þið að vera ramm þjófóttir í þokkabót (viðhorf föður míns sáluga til þeirra sem voru að fylgja tískunni á þessum  tíma he he) . Takk fyrir að skjóta mér aftur í tímann til áranna í kringum 1970 á leiftur hraða. En hvort börunum okkar sé hollt að vita af öllum "skammarstrikunum" skal ósagt látið.

[Jens Guð, 23.5.2010 kl. 11:44]

  Axel,  getur verið að hann heiti Alexander?

[Jens Guð, 23.5.2010 kl. 11:45]

  Sverrir,  takk sömuleiðis.

[Ómar Ingi, 23.5.2010 kl. 12:03]

Já snilldarþáttur hjá Dodda littla og Andra.

[Axel Jóhann Hallgrímsson, 23.5.2010 kl. 12:29]

Jens, af einhverjum ástæðum sækir nafnið Ari á mig en ég er ekki viss.

[Jens Guð, 23.5.2010 kl. 12:41]

  Ómar Ingi,  þessir snillingar láta mann alltaf hlakka til laugardags alla vikuna.

[Jens Guð, 23.5.2010 kl. 12:43]

  Axel,  þegar þú nefnir það þá hljómar Ara nafnið kunnuglegt í þessu samhengi.  Þetta er sennilega rétt til getið hjá þér.

[Ómar Ingi, 23.5.2010 kl. 15:18]

http://ommi.blog.is/blog/ommi/entry/1058664/

Hlustaðu á þessa snilld , er nokkuð viss um að þú átt eftir að fýla þetta.

[Jens Guð, 23.5.2010 kl. 19:57]

  Ómar Ingi,  takk fyrir ábendinguna.  Það er virkilega gaman að sjá þessar gömlu myndir frá Klaksvík.

[P.Valdimar Guðjónsson, 24.5.2010 kl. 11:16]

Heyrði þetta í traktornum við að plægja akurinn. Ég hló mig máttlausan þegar Doddi hringdi í kappann.

Þetta er svona "orginal" hress  þáttur .    Ekki með uppskrúfuðum tilgerðar húmor. Sá húmor þjónar oft aðeins einni stétt  sem er yfirleitt leikarastéttin í þáttum sem þessum á RÚV.

[Jens Guð, 24.5.2010 kl. 15:45]

  P.  Valdimar,  þetta er rétt lýsing hjá þér.