Útúrsteiktur lax

  Byrjið á að veiða í Elliðaánum 4 væna laxa eða 8 titti.  Komið við í Húsasmiðjunni og Melabúðinni (eða Fjarðarkaupum) á leiðinni heim.  Í þessum verslunum skal kaupa 2 steikarpönnur,  10 lítra pott,  smjörstykki,  kryddið Best á lambið  (ef það er ekki til má með hálfum huga nota salt og pipar í staðinn),  16 litla lauka og 3 kíló af kartöflum.  Þegar heim er komið skal kasta glaðlega kveðju á heimilisfólkið.  Síðan eru kartöflurnar settar í pottinn og soðnar.  Laukurinn er saxaður fantalega en laxinn flakaður snyrtilega og skorinn í nett stykki.

  Laukurinn er smjörsteiktur lítillega á báðum pönnunum áður en laxinn er kryddaður og steiktur með.  Best er að hafa hitann á hæsta styrk til að laxinn brúnist án þess að steikjast um of.

  Rétt áður en kartöflurnar eru fullsoðnar skal flysja þær og skera í þunnar flögur.  Því næst er laxinn og laukurinn færður á fat.  Kartöflurnar eru settar á pönnuna og látnar malla á meðan heimilisfólkinu er smalað eins og köttum inn í borðstofu.

  Með laxinum er best að drekka ískalt klakavatn með sítrónusneið á glasbrúninni.  Eftir matinn er boðið upp á vindla og viskí með klaka.  

 

Borgarstjóri veiddi lax

Athugasemdir

[Svíni Þór Svínason. (IP-tala skráð) 20.6.2010 kl. 17:15]

Mmmmm ... mjög girnilegt. Ég stökk strax af stað en BANG ... beint á vegg: Það er uppselt í Elliðaánum í allt sumar

Takk fyrir samt ... en næst skaltu gá hvort hægt sé að nálgast öll hráefnin áður en þú birtir uppskriftina.

Voðalega leiðinlegt að lenda í þessu.

[Jens Guð, 20.6.2010 kl. 17:38]

  Svíni Þór,  það hlýtur að vera hægt að stelast í Elliðaárnar.  Til dæmis seint á nóttunni.  Vera dulbúinn sem hundur.  Til öryggis.

[Eyrnastór (IP-tala skráð) 20.6.2010 kl. 18:23]

Ágæti Jens.

Samkvæmt lögum 14/1912, 4. gr. 3. mgr., og viðauka b13/1955, 3.gr. 6. mgr. og A29/1979 í heild sinni er bannað að hvetja aðra til lögbrota að viðlagðri sekt og allt að 16 ára fangelsisvist eftir eðli brotsins.

Við höfum ákveðið að láta þetta tiltekna mál liggja milli hluta að sinni en munum grípa til viðeigandi ráðstafana endurtaki það sig enn á ný að þú birtir hér beina og skýlausa hvatningu til glæpsamlegra athafna í skjóli nætur.

Virðingarfyllst.

[Eyrnastór (IP-tala skráð) 20.6.2010 kl. 18:26]

... ps. Það er allt of mikið af lauk í þessari uppskrift.

[Ómar Ingi, 20.6.2010 kl. 19:56]

Víský og vindlar

[Ottó Marvin Gunnarsson, 20.6.2010 kl. 20:55]

mjólkin er best með laxinum og alls ekki flysja kartöflurnar! flusið er uppáhladið mitt :) myndi frekar skera þær í báta í stað þess að skera í flögur.

*Skrifað með 10L af slefi í munninum

[Jens Guð, 20.6.2010 kl. 21:09]

  Eyrnastór,  það er líka bannað að fólk undir 19 ára aldri fari í sólbað.  Það er að segja ef slíkt er gert í fegurðarskini,  vel að merkja.

  Það á aldrei að spara laukinn.  Hann er ódýr,  hollur,  góður og skreppur saman þegar hann brúnast.  Ef við erum að tala um 4 átta til tíu punda laxa þá gerir þetta 8 flök.  Hvert um sig er skorið í 8 vænar sneiðar.  Það smellpassar að hafa fjórðung úr nettum lauk með hverri sneið.    

[Doktor blóð (IP-tala skráð) 20.6.2010 kl. 21:36]

Ekki fyrir Vampírur. Sá hvíti er langverstur en vondur er einnig sá gulbrúni. Sýður okkur að innan ef hann kemst þangað. Vinsamlega fjarlægðu laukinn úr uppskriftinni.

[Gjagg (IP-tala skráð) 20.6.2010 kl. 21:47]

Fyrir 4 vaena laxa tharf minnst 12 kg af kartöflum.   Líst vel á thetta.

[Jens Guð, 20.6.2010 kl. 22:01]

  Ómar Ingi,  það er toppurinn á eftir svona veislumat.

[Jens Guð, 20.6.2010 kl. 22:05]

  O.Marwin,  það er í góðu lagi að snæða hýðið á nýuppteknum kartöflum.  En ekki á gömlum kartöflum.  Nema þær séu djúpsteiktar.  Mjólk er óþverri.  Nema út í White Russian.

[Jens Guð, 20.6.2010 kl. 22:07]

  Doktor blóð,  laukurinn er ómissandi með steiktum laxi.  Hvítlaukinn er óþarfi að setja í mat.  Hann er bara bruddur einn og sér eins og hvert annað snakk.

[Jens Guð, 20.6.2010 kl. 22:08]

  Gjagg,  eru 12 kíló af kartöflum ekki of mikið?  Það eru 3 kíló á hvern lax.

[Gsss (IP-tala skráð) 21.6.2010 kl. 10:45]

Mig langar að benda ykkur fjölmörgu sem að eru að fara að skera niður 16 lauka, að gera það með vel beittum hnífi, þá tárist þið síður.

[Jens Guð, 21.6.2010 kl. 10:56]

  Gsss,  vanir menn setja upp sundgleraugu þegar þeir skera niður 16 lauka.

[Gsss (IP-tala skráð) 21.6.2010 kl. 11:50]

Það á víst ekki að virka

[Jens Guð, 21.6.2010 kl. 12:08]

  Gsss,  það virkar.  Og ennþá betur ef köfunarbúnaður er notaður með.

[Jón bóndi (IP-tala skráð) 21.6.2010 kl. 14:50]

Gnarr er rauður ljóturl lax,
leiða max við guldum,
Seinna meir við fáum fax,
fyrir taxa skuldum.