Fróðleiksmolar um Blondie og Debbie Harry

  Ég er ekki sérlegur aðdáandi bandarísku hljómsveitarinnar Blondie.  Hún er aðeins of poppuð fyrir minn smekk.  En þessi hljómsveit var hluti af stemmningu pönkbyltingarinnar,  reggí- og nýbylgjunni sem fylgdi með.  Jafnframt tengdist Blondie bandarísku pönksenunni sem einskorðaðist ekki við músíkstíl.  Bandaríska pönkið fyrir daga bresku pönkbyltingarinnar samanstóð af hópi tónlistarfólks sem stóð fyrir utan hippasenu fyrri hluta áttunda áratugarins og keppti ekki í tæknilegri færni hljóðfæraleikara né langdregnum gítar- eða trommusólóum.  Þessi hópur átti athvarf í fyrrum djassklúbbi í New York,  CBGB´s (Ramones,  Patti Smith,  Television,  Talking Heads,  Dead Boys...).

  Áður en Blondie sló í gegn starfaði söngkonan,  Debbie Harry,  meðal annars sem dansari og Playboy kanína.  Hún var einnig áður í þjóðlagahljómsveit og stelpnatríói.

.

  2007 var Debbie Harry á lista People Magazine yfir 100 fegurstu manneskjur yfir sextugt.

  1999 var Debbie Harry elsti kvensöngvari sem átt hafði lag í 1.  sæti breska vinsældalistans.  Þá 53j ára.  Hún er 64 ára í dag.  Vera Lynn trompaði þetta met 2009,  92ja ára.  Debbie á aðeins 3 ár í að verða löggilt gamalmenni.

  Bandaríski myndlistamaðurinn frægi Andy Warhol gerði frægt tölvuunnið grafíkmyndverk af Debbie 1985.  Þau voru nánir vinir.  Nei,  ekki kærustupar.  Debbie var gift gítarleikaranum og lagahöfundinum Chris Stein.

  Annar góður vinur Debbiar er Iggy Pop.  Hún söng lag eftir hann inn á plötu og dúettaði með honum í kráku (cover song) eftir Cole Porter. 

  Náin vinkona Debbiar,  Nancy Spungen,  var myrt af laglausum bassaleikara ensku pönksveitarinnar Sex Pistols,  Sid Vicious.  Áður stakk hann auga úr bróðir annarrar vinkonu Debbiar,  bandaríska ljóðskáldinu Patti Smith.  Þær deildu um tíma sama gítarleikara.  Sid lést úr óþarflega stórum skammti af dópi.  Fólk verður að kunna sér hóf í dópinu.  Líka kók-ólfar íslenska bankaræningjakerfisins.  Annars fer illa.  Allt fer í klessu.

 

  Á árlegum pönkhátíðum Fræbbblanna hefur lag Blondie,  Denise,  verið á dagskrá.  Ég finn það ekki á þútúpunni í flutningi þeirra. En margt annað skemmtilegt með Fræbbblunum.  Reyndar er allt skemmtilegt með Fræbbblunum.  Hljómsveitinni sem eldist betur en bestu vín.

    

Athugasemdir

[Wim Van Hooste (IP-tala skráð) 26.6.2010 kl. 13:41]

Fraebbblarnir cover of Blondie's

"Denis" @ Pönk 2010: <a href="http://www.youtube.com/watch?v=fFAWgq5HMaw">http://www.youtube.com/watch?v=fFAWgq5HMaw</a>

[Einar Steinsson, 26.6.2010 kl. 18:24]

Ég var aðdáandi Blondie en ég var náttúrulega engin pönkari þannig að hún var mátulega poppuð fyrir mig. Ja... eða var það bara það að maður var skotin í Debbie Harry hver veit, kannski hefði maður ekkert tekið eftir þessari hljómsveit hefði hún ekki verið svona asskoti myndarleg

[Jens Guð, 26.6.2010 kl. 21:14]

  Wim Van,  takk fyrir þetta.

  Einar,  kynþokki Debbiar hafði klárlega töluvert að segja varðandi vinsældir Blondie. 

[Ragnar (IP-tala skráð) 14.7.2010 kl. 00:01]

Denis er svo kynbreytt cover af lagi þeirra  Randy and the Rainbows, Denise.

Franski kaflinn í útgáfu Blondie, er ekki "alvöru" franska.

En þetta vissirðu líklega.

[Jens Guð, 14.7.2010 kl. 00:36]

  Ragnar,  ég vissi að Denis er gamalt dú-vúbb lag.  En ekki kunni ég nafnið á upphaflega flytjandanum.  Takk fyrir fróðleiksmolann.