Færeysk hljómsveit slær í gegn í Þýskalandi

  Fyrir nokkrum árum kom fram á sjónarsviðið í Færeyjum pönkuð rokksveit,  The Dreams,  sem spilaði gömul færeysk lög í nútímalegum búningi.  Svo tók hljómsveitin þátt í dönsku Músíktilraunum.  Þar náði hún 2.  sæti en stal senunni í dönskum fjölmiðlum.   Sigurhljómsveitin er gleymd og tröllum gefin.  The Dreams fór hinsvegar að raða lögum í 1.  sæti danska vinsældalistans,  eins og fylgjast hefur mátt með í sjónvarpsstöðinni DR1.

  Nýverið fékk The Dreams tilboð frá umboðsmanni bandarísku rokksveitarinnar Linkin Park.  Hann vill gerast umboðsmaður The Dreams og telur sig geta auðveldlega markaðssett hljómsveitina í Bandaríkjum Norður-Ameríku.

  Síðast þegar ég vissi voru liðsmenn The Dreams að lesa - ásamt lögfræðingum - yfir tilboðið.  Eins og algengt er með bandarísk tilboð og samninga er um að ræða lesefni sem slagar í rannsóknarskýrslu Alþingis að umfangi.

  Þá gerðist það á dögunum að nýjasta lag The Dreams,  Revolt,  sló skyndilega í gegn í Þýskalandi.  Það situr nú í 2.  sæti vinsældalista MTV, Rockzone.  Vinsældunum í Þýskalandi fylgja The Dreams eftir með því að fara í hljómleikaferð til stærstu borga Þjóðverja.  Með því er næsta víst að þessi spræka færeyska hljómsveit innsigli vinsældir sínar í Þýskalandi til lengri tíma.  Hljómsveitin er vel undir það búin að leggja Þýskaland að fótum sér eftir að hafa verið ein allra vinsælasta hljómsveitin í Danmörku og Færeyjum í tvö ár eða svo.   

Athugasemdir

[Bjarni (IP-tala skráð) 8.7.2010 kl. 17:40]

Minnir soldið á Green Day!!

[Gsss (IP-tala skráð) 8.7.2010 kl. 20:22]

Úff í þínum bænum ekki falla í þá gryfju að kalla mjög poppað rokk "pönkað" það er ekkert til í böndum eins og þessum sem að er í áttina að teljast til pönksins. Hvar er hráleikinn t.d.?

[Jens Guð, 8.7.2010 kl. 20:35]

  Bjarni,  það er töluverður Green Day blær á The Dreams.  Því verður ekki neitað. 

[Jens Guð, 8.7.2010 kl. 20:48]

  Gsss,  pönkið nær yfir stærra svið en harðkjarnapönk.  Poppað pönk er stór hluti af sögu pönksins.  Þetta er til að mynda ein af stærstu klassísku pönkperlunum:  http://www.youtube.com/watch?v=-EEPvXlTUnU .

  Þar fyrir utan:  Eitt er pönkrokk.  Annað er pönkað rokk.  

  Einnig:  Eitt er að hljómsveit komi fram á sjónarsvið sem pönkuð.  Annað hvort hún er pönkuð allan feril á enda.  U2 byrjaði sem pönksveit.  Líka Blondie.

[Auðjón (IP-tala skráð) 8.7.2010 kl. 21:53]

Þeir á tonlist.is lofuðu mér að útvega diskinn með The Dreams, það hefur greinilega ekki alveg gengið hjá þeim, allavega fæst platan ekki ennþá.

[Jens Guð, 8.7.2010 kl. 23:36]

  Auðjón,  skýringin gæti verið þessi:  Tónlist.is er með samning við færeyska plötuútgefendur.  Þess vegna eru allar helstu færeyskar plötur á tonlist.is.  Lög og plötur The Dreams eru ekki gefin út af færeysku plötufyrirtæki heldur dönsku dótturfyrirtæki Sony.  Tonlist.is er sennilega ekki með samning við það fyrirtæki (kannski er músík The Dreams það eina sem fyrirtækið gæti selt hérlendis í gegnum tonlist.is).  Ég hef ekki heldur orðið var við að plötur The Dreams fáist í íslenskum plötubúðum.