Góður nágranni

  Næsta hús við hliðina á mér er skemmtilega afgirt með steyptum vegg.  Ofan á honum er trérimlagirðing.  Í gær og fyrradag stóð eldri kona í ströngu við að sparsla upp í vegginn,  mála hann og trérimlagirðinguna.  Konan á heima í húsinu.  Steypta vegginn málaði hún hvítan en trérimlagirðinguna brúna.  Þarnæsta hús er afgirt með samskonar vegg og trérimlagirðingu.  Í morgun brá svo við að konan var kófsveitt við að sparsla upp í vegg nágrannans.  Er ég gekk framhjá spurði ég konuna hvort hún ætlaði að fara að mála fyrir nágrannana.

  Jú,  hún sagðist ætla að gera það.  

  "Þegar ég var búin að mála hjá mér átti ég eftir nóg af málningu,"  útskýrði hún.  "Ég bankaði upp hjá nágrönnunum og spurði hvort ég mætti ekki mála hjá þeim líka.  Það er skemmtilegt að hafa báðar girðingarnar málaðar í sömu litum.  Nágrannarnir tóku vel í þetta.  Enda ekki vanþörf á að flikka upp á þetta hjá þeim."

  "Það er kraftur í þér,"  varð mér að orði.

  "Mig munar ekkert um þetta,"  svaraði konan.  "Veðrið er svo gott og mér þykir þetta ekkert leiðinlegt." 

  Ljósmyndirnar sem fylgja þessari færslu eru útlenskar.  Ef vel er að gáð sýnir efri myndin mann detta ásamt málningarfötu og annar á jörðu niðri flýja.  Hann virðist ekki vilja fá málningarfötuna yfir sig.  Ég veit ekki af hverju.  Það er hressandi að fá málningarfötu yfir sig.

Athugasemdir

[Hannes, 4.8.2010 kl. 23:22]

Skemmtileg saga af gamalli konu.

[Jens Guð, 5.8.2010 kl. 01:23]

  Fátt er verra en iðjuleysi.  Ég held að konan beri einnig út Fréttablaðið á morgnana. 

[Grefill (IP-tala skráð) 5.8.2010 kl. 04:14]

Af hverju á ég ekki svona nágranna? Ég mæli með því að allir fari að fordæmi þessarar konu og lagi til hjá nágrönnunum. Það myndi gera lífið betra. Alla vega hjá nágrönnunum. Af hverju ekki að stofna alþjóðlegan "Lagaðu til hjá nágrannanum"-dag? Hugsa að það kæmi vel út og yrði vinsælt.

Fólk er miklu betra í að laga til hjá öðrum en sjálfum sér.

[Jens Guð, 5.8.2010 kl. 12:05]

  Grefill,  þetta er góð hugmynd hjá þér. 

[Ásdís Sigurðardóttir, 5.8.2010 kl. 12:37]

[Jens Guð, 5.8.2010 kl. 14:41]

  Ásdís,  takk fyrir innlitið.

[Sveinn Elías Hansson, 5.8.2010 kl. 18:12]

Heldur maðurinn sér í pensilinn?

[Gsss (IP-tala skráð) 5.8.2010 kl. 18:35]

Ég er ekki alveg að sjá þennan "lagaðu til hjá nágrannanum dag" ganga upp. T.d. hjá fólkinu í Garðabæ - nágranninn myndi láta rífa niður bílskúrinn og segja að hann væri að taka til í innkeyrslunni, til að laga til hjá nágrannanum

[Margrét Sig (IP-tala skráð) 5.8.2010 kl. 21:10]

Mig hefur lengi langað til að klippa hekkið,úr sér sprottið,hjá nágrannanum.

[Jens Guð, 6.8.2010 kl. 14:30]

  Sveinn,  ég held að maðurinn hangi í penslinum.

[Jens Guð, 6.8.2010 kl. 14:31]

  Gsss,  það gengur ekkert svoleiðis í Garðabæ.  Það er ekki einu sinni hægt að halda úti pöbb þar vegna nágrannadeilna.

[Jens Guð, 6.8.2010 kl. 14:31]

  Margrét,  láttu það eftir þér.