Skagfirskri söngkonu vel tekið í Færeyjum

  Ein af stærstu árlegu tónlistarhátíðum í Færeyjum heitir Summarfestivalurin(n).  Færeyingar skrifa ekki ákveðinn greini með tveimur ennum.  Summarfestivalurin(n) er haldinn í Klaksvík á Borðey,  höfuðborg Norðureyjanna.  Klaksvík er Akureyri þeirra Færeyinga.  Summarfestivalurin(n) er meiri popphátíð en G!Festivalið í Götu sem er rokkhátíð.  Gestir á Sumarfestivalinu fyrir viku voru um 10 þúsund.  Það er góð tala þegar tekið er með í reikninginn að Færeyingar eru 49 þúsund.  Og meira að segja góð tala þó það sé ekki tekið með í reikninginn.

  Íslenskir fjölmiðlar töluðu um metfjölda á þjóðhátíð í Vestmannaeyjum um verslunarmannahelgina.  Þar voru gestir um 16 þúsund.  Miðað við höfðatölu hefðu þeir þurft að vera 45 þúsund til að jafna metaðsóknina á Summarfestivalinu í Klaksvík í ár. Samt var þetta ævintýralega góð aðsókn á þjóðhátíð í Eyjum.

  Um þrjátíu hljómsveitir komu fram á Summarfestivalinum að þessu sinni.  Þar á meðal voru Westlife (heimsfrægt strákaband),  The Dreams (heimsfrægasta færeyska hljómsveitin),  Brandur Enni og hljómsveit,  Maríus (rokkhljómsveit sem spilar á Airwaves í október) og rokksveitin Páll Finnur Páll (nafnið er samsett úr fornöfnum liðsmanna).

  Ein af hljómsveitunum kallaðist Ingunn & Herborg.  Þar var um að ræða skagfirsku söngkonuna Ingunni Kristjánsdóttur,  færeyska gítarleikarann og söngvahöfundinn Herborgu Hansen og færeyska trommu- og gítarleikarann Pætur Gerðalið.

  Ingunn og Herborg hófu samstarf á tónlistarsviðinu þegar þær voru skólasystur í Rauða kross skóla úti í Noregi 2008.  Síðan hafa þær haft atvinnu af tónlistinni.  Í bland við frumsamda söngva flytur tríóið útlenda slagara með íslenskum textum.  Þetta eru lög á borð við  Blue Suede Shoes  eftir Carl Perkins og  Alone úr smiðju Heart.  Í myndbandinu hér fyrir ofan syngur Ingunn lag eftir Herborgu. Þetta er ekki mitt pönkrokk en læt það liggja á milli hleina.

  Ingunn & Herborg fengu afskaplega lofsamlega dóma í færeyskum fjölmiðlum fyrir frammistöðuna á Summarfestivalinu.  Þess er getið að Færeyingar séu sérlega ánægðir með að Ingunn syngi á íslensku.  Það gefi músík tríósins heillandi þokka (sjarma).

 

  10 þúsund Færeyingar gerðu góðan róm að íslensku söngkonunni Ingunni Kristjánsdóttur. 

  Af færeysku pönksveitinni The Dreams er það að frétta að lag hennar Revolt  hefur trónað að undanförnu í efstu sætum þýsku MTV sjónvarpsrásarinnar og fleiri þýskra vinsældalista.  Áður hefur The Dreams farið mikinn á dönskum vinsældalistum.  Telst vera í hópi alvinsælustu hljómsveita í Danmörku.  Bandarískur umboðsmaður Linkin´ Park og þar áður Pantera hefur í sumar gengið með grasið í skónum á eftir The Dreams.  Boðið þeim Draumliðum gull og græna skóga og er ólmur í að stimpla þá inn á bandaríska markaðinn.  Drengirnir hafa ekki farið sér að neinu óðslega.  Enda heilmikið mál að fylgja eftir óvæntum vinsældum í Þýskalandi,  fjölmennasta ríki Evrópu,  90 milljón manna þjóð.  Og þýski markaðurinn nær að auki yfir til Austuríkis,  Swiss og víðar.  Þar fyrir utan er bandarískur umboðssamningur flókinn og þarfnast yfirlesturs snjallra lögfræðinga.  Samningurinn er á stærð við þykka bók.  Samningsstaða The Dreams er að auki gjörbreytt eftir að hljómsveitin hefur slegið í gegn í Þýskalandi og stefnir í að verða ófurvinsæl á þeim vettvangi.  The Dreams er þegar orðin heimsfrægasta færeyska hljómsveitin.    

Athugasemdir

[Ómar Ingi, 17.8.2010 kl. 21:15]

Takk fyrir þetta

[Jens Guð, 17.8.2010 kl. 21:57]

  Ómar Ingi,  þekkir þú til Ingunnar?  Ég veit ekkert um hana annað en það sem kom fram í færeyskum fjölmiðlum eftir Summarfestivalið.

[Jens Guð, 17.8.2010 kl. 22:34]

  Á fésbókinni fékk ég núna upplýsingar um Ingunn sé skagfirsk.  Ég var snöggur að setja það í fyrirsögnina.

[Árni Gunnarsson, 17.8.2010 kl. 23:18]

Já, Ingunn er af afar sterkri rót skagfirskra söngmanna eins og þeir gerast bestir. Í móðurætt tengist hún Eyþóri Stefánssyni tónskáldi, Stefáni Íslandi og svo var langafi hennar Svavar Guðmundsson þekktur tenórsöngvari og langafi Sverris Bergmanns söngvara.

Móðurafi Ingunnar er Ingimar Pálsson frá Starrastöðum, einn þróttmesti tenór sem ég hef heyrt til og hefur að ég hygg verið efni í stórtenór á heimsvísu. Það standa hvarvetna miklar og góðar söngraddir að Ingunni litlu Kristjánsdóttur.

[Jens Guð, 17.8.2010 kl. 23:42]

  Árni,  bestu þakkir fyrir þessar upplýsingar.  Ég sé á myspace síðu Ingunnar að hún skráir sig Sauðkræking.  Mér segir þó hugur að hún sé búsett erlendis.  Sennilega í Færeyjum.  Það er gaman að heyra hvernig hún afgreiðir færeyskuna:  Hermir ekki beinlínis eftir færeysku sérhljóðunum heldur fer í humátt að þeim.  Færeyingar eru hrifnir af færeyskum framburði hennar.

[Hannes, 18.8.2010 kl. 00:08]

Áhugaverð færsla hjá þér.

[Jens Guð, 18.8.2010 kl. 00:18]

  Hannes,  takk fyrir það.  Kannski er Ingunn skagfirsk frænka þín.  Eða okkar.

[Hannes, 18.8.2010 kl. 00:32]

Jens það er aldrei að vita.