Það sem þú vissir ekki um Bítlana

  Þessir fróðleiksmolar um Bítlana hér fyrir neðan eru flestir sóttir í samantekt breska poppblaðsins New Musical Express,  www.nme.com.  Þetta er söluhæsta breska poppblaðið.  Á undanförnum árum búið að hrista af sér önnur vikublöð á borð við Melody Makers,  Sound og Record Mirror.  Það er nokkuð merkilegt að breskt músíkblað skuli hafa haldið sjó sem vikulegt músíkblað á meðan helsti keppinauturinn,  bandaríska Rolling Stone,  er hálfsmánaðarblað. 

  Hér eru molarnir:

 - Paul og John djömmuðu síðast saman í svakalegu kókaínpartýi 1974.  Þetta var eftir að John og Paul höfðu skipst á eitruðum sendingum á plötum.  John með níðsöngnum "How Do You Sleep?" og Paul í laginu "Let Me Roll It".  Í millitíðinni sagði John að níðið í framangreindu lagi sínu hafi í raun verið um sig sjálfan.  Þeir hittust nokkrum sinnum eftir kókaínpartýið og spjölluðu stundum saman í síma.  En ekki alltaf í vinsemd.  Samt stundum.

.

.

 - 1967 keyptu allir Bítlarnir sitthverja eyjuna við Grikkland.  Þeir seldu þær nokkrum mánuðum síðar. 

 -  Bítlarnir sömdu fyrsta smell The Rolling Stone,  "I Wanna Be Your Man". 

 - George Harrison kom The Rolling Stones á plötusamning hjá Decca í upphafi ferils The Rolling Stones.

 - Bob Dylan hélt að Bítlarnir væru dópistar.  Þeir voru það reyndar.  En Dylan kynnti þeim fyrir hassi.  Hann hélt að viðlagið "I Can´t Hide" væri "I Get High".

.

  - John þoldi aldrei "strípaða" söngrödd sína.  Hann vildi alltaf láta breyta henni með söng"effectum".

  - Þegar Brian Wilson,  forsprakki The Beach Boys,  heyrði Bítlalagið "A Day In A Life" taldi hann daga The Beach Boys vera liðna og hljómsveitin ætti að hætta.

  - 2009 fyrirgáfu formlega páfinn og Vatikanið Bítlunum yfirlýsingu Lennons um að Bítlarnir væru vinsælli en Jesú.

 - Vinnutitill plötunnar "Abbey Road" var "Everest".

  - Bítlarnir þrættu á sínum tíma fyrir að lagið "Lucy In The Sky With Diamonds" væri LSD dópsöngur.  John þrætti alla tíð fyrir það.  Paul hefur hinsvegar viðurkennt að svo hafi verið.

  - John, Paul og George voru allir yfir meðalhæð.  Ringo var lítillega undir meðalhæð.

 -  Helmingur Bítlanna var örvhentur:  Ringo og Paul.

.

  -  Little Richard hélt framan af Bítlarnir væru svertingjar.  Honum þótti músík þeirra vera blökkumannamúsík.

  -  Plötufyrirtæki Decca hafnaði Bítlunum á sínum tíma með þeim rökum að tími gítarhljómsveita væri liðinn.  Bókun ráðamanna Decca um þetta hefur alla tíð síðan verið Decca til háðungar.

  - Áður en Bítlarnir slógu í gegn undir nafninu The Beatles hét hljómsveitin The Quarrymen, The Beatals,   Johnny & The Moondogs,  Long John & The Beetles,  The Silver Beats,  The Silver Beatles og The Beat Brothers.

.

  -  Lennon og McCartney bundust á sínum tíma í fóstbræðralag um að öll þeirra lög yrðu skráð á þá báða.  Óháð því hver væri höfundur lags.  Höfundarnafn væri skráð Lennon-McCartney.  Fyrir nokkrum árum fór Paul fram á að fá að breyta höfundarskráningu á laginu "Yesterday" í McCartney-Lennon.  Yoko,  ekkja Lennons,  hafnaði því á þeirri forsendu að einungis John gæti samið um endurskoðun á þessum fóstbræðrasamningi.  John var dáinn (myrtur) og ekki í ásigkomulagi til að breyta þessu.  Paul var og er ósáttur við Yoko.

  -  Eina Bítlalagið sem John gerði án annarra Bítla var "Julia".  Þar syngur hann til mömmu sinnar við undirleik frábærs gítarpikks.  Gítarpikks sem Paul einsetti sér síðar að ná tökum á og tókst - að eigin sögn.  Og eflaust með réttu.  Þannig var stemmningin á milli Pauls og Johns.  Ef annar gerði eitthvað flott hætti hinn ekki fyrr en honum tókst að gera eitthvað álíka flott.  

  -  Paul og John hittust fyrst 6.  júlí 1957 þegar John var blindfullur að spila með The Quarrymens.  Paul sagði að allir í Liverpool hafi vitað af John.  Hann var "the rebel" svæðisins.  Kjaftfori slagsmálahundurinn.  Síðar viðurkenndi John að hafa ekki verið sá "töffari" sem hann gaf sig út fyrir að vera.  Hann hafi alltaf verið skíthræddur þegar hann var að efna til slagsmála.  Var hálf sjónlaus en uppfullur af reiði út í allt og alla.  Einkum vegna þess að fullur lögreglumaður ók yfir og drap mömmu hans.  Hann vissi ekkert hvernig hann átti að vinna úr þeirri reiði.  Hún braust út í að efna til slagsmála.

  -  Í upphafi ferils Bítlanna í Hamborg í Þýskalandi ánetjuðust þeir eiturlyfjum.  Álagið var gríðarlegt.  Lítið um svefn.  Mikil vinna.  Lítið um mat.  En þeim mun meira framboð á pillum til að standa langar vaktir í spilamennsku.

  -  Síðasta skipti sem Bítlarnir unnu saman sem hljómsveit var 20.  ágúst 1969.  Þá hljóðrituðu þeir lagið frábær "I Want You (She´s So Heavy".  Það fjallar um ást Johns á Yoko.

  -  John hélt því fram að lagið "Ticket To Ride" væri eitt af fyrstu heavy metal lögum rokksögunnar.  Rangt. 

  -  Allir liðsmenn Bítlanna voru flughræddir. 

  -  Ringo var með annan fót á sjúkrahúsi alla sína barnæsku.

  -  Enginn Bítlanna var framhaldsskólagenginn.  Lennon var að vísu í myndlistanámi en lauk þar engri gráðu.

  -  John var alinn upp af móðursystur sinni,  Aunt Mimi.  Þegar hann fór að spila rokkmúsík sagði hún:  "Gítarspil er tomstundagaman.  En það aflar þér ekki tekna."

  -  Þegar Bítlarnir spiluðu í Bandaríkjum Norður-Ameríku 1964 gáfu þeir út yfirlýsingu um að áheyrendum yrði ekki mismunað vegna kynþáttar.  Þetta var byltingarkennd yfirlýsing á þeim tíma.

  -  Bítlarnir voru fyrstu alvöru stóru poppstjörnur til að gagnrýna hernað Bandaríkjanna í Vietnam.  Þvert á fyrirmæli umboðsmanns Bítlanna,  Brians Epsteins.  Það var George Harrison sem braut fyrstur gegn þessum fyrirmælum Brians.  Ekki John eins og margir halda í dag.

.

Athugasemdir

[JR (IP-tala skráð) 26.11.2010 kl. 02:21]

Jens.

Það er ekki hægt að skoða hjá þér skrifin vegna auglýsinga frá mogganum !

Þetta er óþolandi !

Hættur að skoða þessa síðu þína ef þetta á að vera svona !

[Billi bilaði, 26.11.2010 kl. 13:22]

„Long John and the Silver Beatles" skv. þeim Bítlabókum sem ég hef lesið.

Það er á Anthology (minnir mig) upptaka af John vera að taka upp pikkið fyrir „Julia“. Hann klikkar í lokin og segir við upptökustjórann að þetta hafi verið næstum fullkomið. (Það gæti svo sem verið að Paul hafi spilað það eftir það.)

ES: „Hey Bulldog“ finnst mér vera vanmetnasta Bítlalagið.

[Ómar Bjarki Kristjánsson, 26.11.2010 kl. 23:29]

Hafði heyrt eða lesið allt í aðalatriðum - nema fyrsta atriði, þetta með partýið 74.

En varðandi það sem eg hafði orð á í kommenti hér um daginn, um hvað Lennon hefði borðið sig vel á sviði, og þá í þeirri merkingu hvað hann hafi verið sterkur og mikið - uuu hvað segir maður, svona performance í honum.  Einhver útgeislun.  Og svona látbargð sem segir:  Eg er kóngurinn o.s.frv.  (En vel að merkja að þar með er ekki sagt að hinir hafi verið eitthvað ósterkir.  Aðeins að Lennon er miklu sterkar yfirleitt og það er soldið áberanndi ef maður fer að klikka á youtube)   Og þú bentir þá á að þetta væru eigi ný tíðindi per se því Bítlunum hefði að mestu leiti borið saman um að Lennon hefði verið aðalmaðurinn í hljómsveitinni.

Að. altso, það verður þá skiljanlegra eða í raun lá beint við, að eftir að þeir hættu tónleikaferðum og Paul fór að láta meira til sín taka eða Lennon að draga sig í hlé - að það gæti ekki þýtt neitt annað en vandræði.  Lennon alls ekkert tilbúinn til þess að láta Paul verða aðalmanninn.

Það er líka þetta með sem þú bentir einnig á, minnir mig,  að Lennon hefði yfirleitt verið með einn hljóðnema útaf fyrir sig en Paul og George saman með einn. 

Það þarf ekkert að deila um þetta lengur.  Lennon var aðalmaðurinn - og  youtube sannar það! 

http://www.youtube.com/watch?v=4BW5FnJzHZ8

þetta er alveg ótrúlegt að sjá  (að mínu mati)  Stórfurðulegt bara. Hljóðið er ekki læf samt  (Held eg)  Tekið upp seinna.  (Skilst mér)

[Guðmundur Júlíusson, 27.11.2010 kl. 01:24]

Skil ekki comment  JR hér að ofan, verð ekki var við  truflanir vegna  auglýsinga  á síðunni!!

[Guðmundur Júlíusson, 27.11.2010 kl. 01:25]

En frábær grein Jens

[Jens Guð, 27.11.2010 kl. 04:03]

  JR,  ég kann ekki ráð við þessu.  Auglýsingarnar eru vel til hliðar í þeim tveimur tölvum sem ég hef til umráða.  Einnig í tölvum annarra í mínum vinahópi.  Hinsvegar hafa fleiri en þú nefnt þetta vandamál hér í athugasemdakerfinu.

  Sennilega fer þetta eitthvað eftir því hvernig tölvur fólk er með og hvaða forrit það notar.  Eða eitthvað.  Ég get ekkert gert varðandi þetta.  Nema hugsanlega að kaupa auglýsingarnar á síðunni í burt.  

[Jens Guð, 27.11.2010 kl. 04:21]

  Billi,  hljómsveitin kom aldrei fram undir nafninu Long John and the Silver Beatles.  Hinsvegar stakk umboðsmaður þeirra upp á þessu nafni.  Nokkrum dögum seinna hitti umboðsmaður frá London hljómsveitina.  Þá hafði John afráðið að nafnið yrði aðeins The Silver Beatles.

[Jens Guð, 27.11.2010 kl. 04:23]

  Paul spilaði aldrei í laginu  Julia.  Aftur á móti lærði hann og náði tökum á þessari gítarpikktækni og hefur notað hana á sólóferlinum.

[Jens Guð, 27.11.2010 kl. 04:25]

  Ómar Bjarki,  takk fyrir hlekkinn á myndbandið.  Ég var ekki búinn að sjá þetta.  Skemmtilegt myndband.  Og lagið flott!

[Jens Guð, 27.11.2010 kl. 04:26]

  Guðmundur,  takk fyrir það.

[Ómar Ingi, 27.11.2010 kl. 11:52]

Endalaust Bitlagarg hérna !!!

[Jens Guð, 27.11.2010 kl. 13:49]

  Ómar Ingi,  það slæðist alltaf með inn á milli.

[Billi bilaði, 28.11.2010 kl. 19:33]

"...then Long John and the Silver Beatles, when they went on tour in Scotland with Johnny Gentle..."

[Jens Guð, 28.11.2010 kl. 23:32]

  Billi,  þetta er svo sem ekkert atriði sem ég ætla að berjast fyrir.  Fyrir einhverjum árum gluggaði ég í bók sem fékkst í Eymundsson í Kringlunni.  En keypti hana ekki.  Samt man ég eftir að þar var rakið dag fyrir dag hvenær hljómsveitin hét þetta eða hitt.  Bókin hét eitthvað sem vísaði til þess að saga Bítlanna var rakin í dagsetningum.  Þar kom þetta fram sem ég nefndi í "kommenti" #7.  Umboðsmaðurinn frá London var að leita að hljómsveit sem gæti hitað upp fyrir tiltekinn poppara.  Líklega var það þessi Johnny Gentle.  Í bókinni sem ég vitna til (en á ekki og get því ekki vísað orðrétt í hana) kom fram að að þáverandi umboðsmaður Bítlanna lagði til þetta nafn en þegar Bítlarnir hittu þennan frá London var John orðinn fráhverfur því að nota Long John nafnið.  Hugsanlega kynnti umboðsmaður Bítlanna þá fyrir þessum frá London með þessu nafni.  Og kannski er þín tilvísun rétt að það nafn hafi verið notað í auglýsingum um hljómleikaferðina. 

  Ég "gúglaði" þetta og hér:  

http://abbeyrd.best.vwh.net/named.htm



  kemur fram að þetta nafn hafi komið til greina en verið hafnað. 

[valgeir (IP-tala skráð) 1.12.2010 kl. 23:11]

Góðir pistlar hjá þér Jens

Þegar horft er á hin ýmsu youtube myndskeið af bítlunum eins og "ticket to ride"

http://www.youtube.com/watch?v=d0dhJNxCxhk

"hey Jude"

http://www.youtube.com/watch?v=BDbHBuqJsTs

og roof top tónleikana fer ekki hjá því maður taki eftir hinu sérstaka sambandi milli Paul og Johns. Hvernig þeir horfa hvor til hins í flutningnum.

Það er einnig fróðlegt aða heyra viðhorf John til Pauls sem má finna á youtube undir.

Lennon's views on McCartney

 http://www.youtube.com/watch?v=GCmKc5oqGGU&feature=more_related

Sérstaklega hvað Yoko segir í lokin að Lennon hafi séð í Paul eiginleika sem hann hafi sjálfur vilja búa yfir.

[Jens Guð, 2.12.2010 kl. 00:16]

  Valgeir,  John sagði einhverntímann frá því að þeir Paul hafi tengst sterkari böndum en aðrir í hópnum í upphafi vegna þess að báðir misstu móðir sína sem unglingar.  Fyrir báða var það eðlilega sár lífsreynsla sem þeir gátu ekki útskýrt fyrir öðrum.  En þurftu ekki að útskýra fyrir hvor öðrum.  

  Þeir voru uppteknir af móðurmissinum en bjuggu sér til kaldhæðinn húmor þegar mæður þeirra bar á góma.  Húmor sem aðeins þeir tveir vissu að var gríma til að fela sársaukann.  

  Þar fyrir utan báru þeir mikla virðingu fyrir hvor öðrum og hæfileikum hvors annars og voru afar nánir.