Níræður maður fraus fastur

  Næstum níræður kappi (88 ára),  sprækur og hress, brá sér á veiðar á litlu skektunni sinni núna á þriðjudagsmorgun.  Hann lét hvorki hörkufrost né veðurspá um ennþá kaldara veður hafa áhrif á sig.  Reyndar veitti hann því enga eftirtekt.  Hann hafði um annað að hugsa.  Honum þykir ekkert skemmtilegra en dúlla í skektunni sinni í Nakskov-firði í Danmörku.

  Kallinn var varla fyrr komin um borð en veðurguðirnir tóku stjórnina.  Hávaðarok feykti skektunni á miklum hraða þvert yfir fjörðinn.  Um 100 metrum frá landi stöðvaðist skektan loks í íshröngli.  Ísinn var of þunnur og mjúkur til að hægt væri að ganga á honum.  En nógu þéttur til að skektan fraus þar föst umsvifalaust.  Alveg pikkföst.  

  Kallinn var ekki með neinn búnað til að gera vart við sig.  Hann neyddist til að húka aðgerðalítill í skektunni í fjóra klukkutíma.  Hann hafði ekki einu sinni krossgátublað meðferðis til að stytta sér stundir.  Þess í stað starði hann vonlausum augum upp á land.  Hann var alveg ráðalaus.

  Um klukkan eitt eftir hádegi kom undrandi Dani auga á úr mikilli fjarlægð að maður sat í pikkfrosinni skektu úti á firði.  Hann hafði þegar í stað samband við neyðarlínuna.  Þar á bæ var ræstur út björgunarbátur,  sjúkrabíll og læknir.  Sá gamli var orðinn helkaldur,  lamaður af hræddur og ræfilslegur þegar björgunarsveitin fiskaði hann upp úr bátnum.  Hann skammaðist sín ógurlega og hefur heitið björgunarsveitinni því að gera þetta aldrei aftur.  Ekki einu sinni þó hann yrði píndur með flísatöngum og snúið upp á bakið á honum.  Hann dvelur nú á sjúkrahúsi þangað til mesti hrollurinn er farinn úr honum.

   

Útlit fyrir versnandi veður

Athugasemdir

[Hörður Þórðarson, 17.12.2010 kl. 10:29]

Honum var nær, að hlusta ekki á veðurspána.

[Hörður Sigurðsson Diego, 17.12.2010 kl. 11:32]

Hann hefði nú orðið flott minnismerki þarna úti á firðinum.

[doctore (IP-tala skráð) 17.12.2010 kl. 12:53]

Það eru góðar líkur á að hann muni ekki eftir loforðinu með að gera þetta ekki aftur :)

[Jens Guð, 17.12.2010 kl. 16:19]

  Hörður Þórðarson,  það gerðu menn í Hjaltadalnum í Skagafirði á mínum uppvaxtarárum.  Þeir siguðu ekki einu sinni hundi út nema veðurspáin gæfi grænt ljós. 

[Jens Guð, 17.12.2010 kl. 16:20]

  Hörður Sigurðsson,  mér varð á að skella upp úr.  Góð tillaga.

[Jens Guð, 17.12.2010 kl. 16:20]

  DoctorE,  það þarf kannski að setja staðsetningatæki á hann.  Eða hafa hann í ól.

[Siggi Lee Lewis, 17.12.2010 kl. 20:12]

Ég fraus einu sinni.

[Jens Guð, 17.12.2010 kl. 20:17]

   Ziggy Lee, ég veit líka um fólk sem er meira og minna freðið alla daga.

[Þorsteinn (IP-tala skráð) 17.12.2010 kl. 23:04]

Honum hefði vissulega hlýnað, ef hann hefði haft krossgátu.Hvað hlýjar manni betur en góð krossgáta.

[Jens Guð, 17.12.2010 kl. 23:17]

   Þorsteinn, ég tala nú ekki um ef nokkrar Sudoku hefðu verið með.  Þá hefði honum hitnað nægilega til að fara úr að ofan.