Óvænt uppgötvun: Lítið þekkt íslensk hljómsveit í bandarískri plötubúð

  Það er alltaf gaman og dálítið skrýtið að sjá íslenskar plötur í útlendum plötubúðum.  Ekki síst í dag eftir að plötubúðir heimsins eru orðnar fátæklegri af "sjaldgæfari" plötum og gera meira út á það sem hæst ber á vinsældalistum.  Það er hægt að ganga að plötum Bjarkar,  Sykurmolanna,  Sigur Rósar og Jónsa sem vísum í útlendum plötubúðum.  Svo rekst maður á eina og eina íslenska plötu sem vekur undrun.

  Fyrir áratug keypti ég plötuna "Saga rokksins" með Ham í plötubúð í Prag í Tékklandi.  Það var óvænt og gaman.  Í Berlín í Þýskalandi keypti ég plötu með I Adapt fyrir nokkrum árum.  Þar var meira að segja verið að spila hana í hátölurum búðarinnar er ég gekk þar inn.  Afgreiðslumennirnir sýndu mér að auki jákvæðan plötudóm um plötuna í þýsku blaði.  Blaðið suðaði ég út úr þeim til að sýna strákunum í I Adapt.

  Fyrir tveimur árum rakst ég á sömu plötu í plötubúðum í Póllandi.  Það var einnig fjallað um hana í þarlendum rokkblöðum.  Í ljós kom að um sjóræningjaútgáfu var að ræða.  Síðast þegar ég frétti voru liðsmenn I Adapt komnir með lögfræðing í málið.

  Á dögunum í New York fann ég í plötubúð plötu með íslensku hljómsveitinni Pascal Pinon,  samnefnda hljómsveitinni.  Í bandaríska rokkblaðinu Under the Radar er umfjöllun um þessa plötu.  Hún fær þar einkunnina 6 (af 10). 

  Ég veit fátt um þessa hljómsveit.  Nema þekki lagið ljúfa sem hér fylgir með.  Hef heyrt Bubba spila það í "Færibandinu" á rás 2.  Virkilega krúttlegt lag.

  Í umsögn um plötuna í Under the Radar segir að hljómsveitin Pascal Pinon sé nefnd í höfuðin á tvíhöfða sirkus-fríki.  Þar segir líka að tónlist hljómsveitarinnar sé samin af 14 ára tvíburasystrum.  Um sé að ræða aðlaðandi lo-fi (lágstemmd naumhyggja) tónlist spilaða á kassagítar,  flautu og klukknahljóm (mér heyrist sem þarna laumist líka lágvært hljómborð með.  Mitt innskot).  Það megi skilgreina þetta sem krúttlegt en sé um leið hrífandi og mildur hljóðheimur sem lofi bjartri framtíð.     

  Under the Radar fæst ekki hérlendis.  Ef einhver hér þekkir til stelpnanna í Pascal Pinon skal ég senda þeim eintak af blaðinu með plötudómnum. 

Athugasemdir

[Ómar Ingi, 28.1.2011 kl. 08:37]

Góður

[Ásthildur Cesil Þórðardóttir, 28.1.2011 kl. 10:00]

Gaman að þessu og lagið er vissulega hugljúft.

[Axel G. Sig. (IP-tala skráð) 28.1.2011 kl. 11:01]

Skemmtilegt framtak!

Nokkuð viss um að Nesvegur 46 sé lausnin.

[Jens Guð, 28.1.2011 kl. 12:31]

  Ómar Ingi,  ég stend vaktina.  Plötubúðir eru reyndar einu búðir sem ég nenni að heimsækja í útlöndum.

[Jens Guð, 28.1.2011 kl. 12:33]

  Ásthildur Cesil,  ég er hrifinn af þessu lagi.  Á eftir að tékka á sjálfri plötunni.

[Jens Guð, 28.1.2011 kl. 12:33]

  Axel,  takk fyrir þessar upplýsingar. 

[Númi (IP-tala skráð) 29.1.2011 kl. 00:00]

Frábærar þessar ungu dömur,þennan disk hefði maður áhuga að eignast.

[Jens Guð, 29.1.2011 kl. 01:29]

  Númi,  þetta lag í myndbandinu lofar góðu.  Ég á eftir að hlusta á plötuna.

[Jens Guð, 29.1.2011 kl. 01:33]

  Axel,  eiga tvíburastelpurnar heima á Nesvegi 46?  Veistu hvað þær heita?  Ég á heima rétt hjá og get stungið eintaki af blaðinu í réttan póstkassa. 

[Jens Guð, 29.1.2011 kl. 01:58]

  Þegar Nesvegi 46 er flett upp á ja.is koma aðeins upp nöfn tveggja kvenna.  Af myndbandinu að ráða eru tvíburastelpurnar Ákadætur. 

[Ómar Ingi, 30.1.2011 kl. 13:42]

Þeim fer fækkandi sérstaklega í USA , en ég skil þig mætavel

[siggi óli (IP-tala skráð) 1.2.2011 kl. 10:56]

sæll jens

þetta eru frænkur mínar þær ásthildur og Jófríður Ákadætur

nærð allavega í móður þeirra hér:[e-mail]

kv

siggi

[Jens Guð, 2.2.2011 kl. 00:43]

  Ómar Ingi,  plötubúðum fer fækkandi allsstaðar í nágrannalöndum og þær sem eftir standa halda sig við plöturnar á vinsældalistum í stað fjölbreytni.  Sú var tíð að ágæt plötubúð var á Kastrup-flugvelli í Kaupmannahöfn.  Nú er hún horfin.  Í flugstöðinni sem ég heimsótti á dögunum í New York höfðu verið tvær plötubúðir.  Nú er þar engin plötubúð.  Þannig mætti áfram telja. 

[Jens Guð, 2.2.2011 kl. 00:47]

  Siggi Óli,  takk fyrir þetta.  Ég var búinn að finna netfang hjá Pascal Pinon og senda þeim póst.  Án viðbragða.  Nú er þetta allt að smella saman.  Ég sé á ja.is að Kristín er til heimilis á Nesvegi 46.  Þannig að ég kem Under the Radar til skila þangað.