Plötuumsögn

  -  Titill:  Baldur

  -  Flytjandi:  Skálmöld

  -  Útgefandi:  Tutl

.

  -  Einkunn:  ***** (af 5)

.

  Orðið víkingarokk segir ekki alla sögu um þungarokk Skálmaldar.  Nærtækt er að vísa frekar til færeysku hljómsveitarinnar Týs og hliðarverkefnis forsprakka hennar,  Hera Joensen,  Heljareyga.  Skálmöld tekur víkingarokkið þó töluvert lengra.  Meðal annars með vel útfærðum fjölrödduðum kvæðasöng og þróttmiklum 16 manna karlakórssöngur.  Þetta er þjóðlagakennt (etnískt) þungarokk sem sækir í söngrænt (melódískt) og rymjandi dauðarokk og jafnvel svartmálm.  Einnig er þarna margt sem minnir á Tý og Heljareyga,  eins og áður er tæpt á.

  Liðsmenn Skálmaldar koma úr ýmsum þekktum hljómsveitum,  svo sem pönksveitinni Innvortis,  grallarasveitinni Ljótu hálvitunum,  Ampop,  Klamidiu X og Hrauni.  Hljómsveitum sem eru þekktari fyrir mun léttari músík en víkingarokkið með Skálmöld.  Ég veit ekki hvað liðsmenn Skálmaldar taka sig alvarlega sem víkingarokkara.  Þá er ég að vísa til galsans í Ljótu hálvitunum og Innvortis.  Þó er ekki annað að heyra en að um einlægt og sannfærandi víkingarokk sé að ræða.

.

  Hljóðfæraleikur er góður;  líflegur og blessunarlega laus við stæla og sýndarmennsku.  Forsöngur er kraftmikill og flottur.  Gestasöngvarinn Addi í Sólstöfum á dúndur innlegg.  Lagasmíðar eru alveg ljómandi.  Textar Snæbjarnar Ragnarssonar eru haganlega ortir með stuðlum og höfuðsstöfum.  Þeir rekja sögu víkingsins og ásatrúarmannsins Baldurs.  Fjölskylda hans og heimili verða fyrir fólskulegri árás að Baldri fjarstöddum.  Þá er ekki um annað að ræða en leita hefnda.    

.

  Þetta er góð plata.  Hún hljómar best þegar hlustað er á hana alla í heild.  Kannski frekar þungmelt í fyrstu atrennu en vex verulega við frekari hlustun.  Spræk og hressandi.  Vel heppnuð í alla staði.  Tvímælalaust ein af bestu og skemmtilegustu plötum ársins 2010.  Ég setti hana á minn lista í áramótauppgjöri Fréttablaðsins.  Ég hef sterkan grun um að aðrir þátttakendur í áramótauppgjörinu hafi ekki verið komnir með plötuna í hendur.  Hún kom svo seint á markað:  Um sama leyti og menn skiluðu inn sínum áramótalista til Fréttablaðsins (og annarra fjölmiðla). 

.

  Umslagshönnun Hallmars Freys Þorvaldssonar myndar glæsilega og óaðfinnanlega gjörð utan um glæsilega plötu. A+ fyrir umslagið.

.

  Íslenskir plötuútgefendur höfðu lítinn áhuga á  Baldri.  Þess vegna er platan gefin út af færeyska plötufyrirtækinu Tutl (framborið Tútl á færeysku.  Tutl er færeyskt orð yfir hljóðið sem heyrist þegar vatnsdropi fellur á vatn.  Ég held að ekki sé til neitt íslenskt orð yfir það.  Orðin skvamp, drypl og gutl ná því ekki alveg).  Færeyingarnir munu ekki sjá eftir því að gefa þessa plötu út.  Baldur  mun seljast vel og lengi út um allan heim.  Fyrsta upplag,  1000 eintök,  seldist upp nánast á einum degi.  Annað upplag er í vinnslu.  Velgengni platna Týs hjá Tutl á alþjóðamarkaði mun klárlega nýtast bærilega við sölu og markaðssetningu á  Baldri  Skálmaldar.  Hljómsveitin Týr og plötur hennar eru komnar á góðan stall á alþjóðamarkaði víkingarokks. 

  Á Týsdaginn (þriðjudag) verður Rokkland sunnudagsins endurflutt á rás 2 eftir útvarpsfréttir klukkan 22.00.  Þáttuiinn er helgaður Skálmöld og  Baldri.

.

 

  Hér er sýnishorn í betri hljómgæðum:

Athugasemdir

[Hjóla-Hrönn, 30.1.2011 kl. 20:17]

21 desember síðastliðinn var ég að fagna ákveðnum tímamótum í mínu lífi og dreplangaði að skvetta ærlega úr klaufunum.  Þungarokk er ekki alveg minn tebolli, en ákvað að gúggla hljómsveitirnar sem áttu að koma fram á Andkristnihátið og féll alveg kylliflöt fyrir Skálmöld.  Hlustaði nokkrum sinnum á þá og Gone Postal og skellti mér svo á tónleikana um kvöldið.  Drakk mig niður á eyrnasneplana og dansaði mig upp að hnjám.  Alveg déskoti góð skemmtun.  Það verður fróðlegt að fylgjast með þessum í framtíðinni.

[Jens Guð, 30.1.2011 kl. 21:09]

  Hjóla-Hrönn,  flott hjá þér.  Þú ert töffari!

[Gunnar (IP-tala skráð) 31.1.2011 kl. 07:15]

Þetta er virkilega vel heppnað. Löngu orðið tímabært að það kæmi almennilegur víkinga málmur

[Jens Guð, 31.1.2011 kl. 11:28]

  Gunnar,  ég tek undir það.

[Bubbi J. (IP-tala skráð) 31.1.2011 kl. 20:28]

Þetta er hörkugripur

[Jens Guð, 1.2.2011 kl. 01:33]

  Bubbi,  alveg frábær plata.

[kolbeinn (IP-tala skráð) 1.2.2011 kl. 14:34]

Mér hefur ekki liðið svona vel, síðan ég heyrði Relationship of Command með At The Drive In. Þetta er epískt verk með tengingar við allt sem íslenskt er. Blóðhefndina sæmd og fóstbræðralag. Ég hugsa að Skálmöld eigi eftir að safna í kringum sig stórum hópi aðdáenda um Evrópu og víðar.

kv

Kolbeinn

[Jens Guð, 2.2.2011 kl. 00:52]

  Kolbeinn,  ég er áreiðanlega búinn að hlusta á plötuna 50 eða 100 sinnum.  Það kom mér á óvart hvað hún er góð og heilsteypt,  hörð,  þung og kraftmikil.  Ég tek undir með þér að Skálmöld eigi klárlega eftir að sanka að sér aðdáendum um alla Evrópu og víðar.  Ég hlusta töluvert mikið á víkingarokk af öllu tagi,  dauðarokk og svartmálm.  Skálmöld stenst glæsilega allan samanburð.