Bráðskemmtileg spurningakeppni

  Fyrir nokkrum árum slæddist ég inn á skemmtistað í miðborginni ásamt Sigga Lee Lewis.  Erindið var að spreyta okkur í poppspurningakeppni,  svokallaðri "poppquest".  Ég man ekki nafn skemmtistaðarins.  Hann er ekki lengur starfræktur en var rekinn af Ingu Sóley,  ljósmyndara.  Spurningahöfundur var Valgeir Guðjónsson,  tónlistarmaður.  Leikar fóru þannig að við Siggi enduðum í jafntefli við einhverja aðra.  Þá var farið í bráðabana.  Við Siggi enduðum í 2. sæti.  Það var ekkert nema gaman.  Sigurliðið var hljómsveit sem ég man ekki lengur hver var.

  Ég hef ekki aftur tekið þátt í svona spurningaleik.  Fyrr en í kvöld.  Hreiðar og Danni úr Gyllinæð plötuðu mig með sér í rokkquest á Dillon.  Ég veit ekki hver spurningahöfundur var.  Hann er kallaður Addi (heyrðist mér) og ku vera trúbador.  Spurningarnar voru flestar leiddar út frá flutningi Adda á hinum ýmsu dægurlögum.  Það er líflegt og skemmtilegt fyrirkomulag.  Spurningarnar voru fjölbreyttar,  bæði varðandi tímatal og músíkstíla.  Þær voru 15 talsins.  Hver spurning var í nokkrum liðum og gat gefið 2 og allt upp í 4 stig.      

  Þegar stig voru saman talin reyndist sigurliðið vera með 37 stig.  Mitt lið var með 36 stig.  Liðið í 3ja sæti náði 35 stigum. 

  Í ljós kom að sigurliðið var skipað valinkunnum tónlistarmönnum:  Adda söngvara og gítarleikara hinna frábæru Sólstafa;  Hróa bassaleikara Atomstöðvarinnar og Páls Rósinkrans;  svo og Bergi bassaleikara - að ég held - Buffs og Dúndurfrétta. 

  Þetta var hin besta skemmtun og hellingur af bjór í verðlaun. 

Athugasemdir

[Númi (IP-tala skráð) 23.2.2011 kl. 12:56]

Hvað voðalega mannst þú lítið frá þessari skemmtilegu spurningakeppni,varstu í álögum.?

[Sigurður I B Guðmundsson, 23.2.2011 kl. 17:53]

Þú hefðir átt að krefjast endurtalningar og svo hefður þú líka mátt láta vita af þessari keppni og líka........

[Jens Guð, 23.2.2011 kl. 21:50]

   Númi, langtímaminnið er brigðult.  Skammtímaminnið reyndar líka (eða vinnsluminniið,  eins og það heitir á fræðimáli).  Einkum þegar málið snýr að nöfnum skemmtistaða.  Með tilliti til þess er ég nokkuð ánægður með frammistöðuna í þeim spurningaleikjum sem ég hef tekið þátt í:  Að hafa tvívegis spreitt mig og náð 2. sætinu með hársbreidd frá toppsætinu í bæði skiptin (annars hefði ég ekki bloggað um það.  Hehehe!).

[Jens Guð, 23.2.2011 kl. 21:56]

   Sigurður I.B., ég vissi ekki af spurningaleiknum á Dillon í gær fyrr en nokkrum mínútum áður en hann hófst.  Það var hringt í mig og ég kallaður til leiks.  Stigatalningin var áreiðanlega rétt.  Þar fyrir utan var þetta aðeins léttur samkvæmisleikur sem ástæðulaust er að taka hátíðlega og gera að einhverju öðru.