Skúbb! Eivör á rappplötu

  Síðustu árin hefur dúettinn Nik & Jay verið stærsta nafnið í dönsku rappsenunni.  Og reyndar eitt stærsta nafnið í dönsku músíkflórunni í það heila,  ásamt rokksveitinni Nephew.  Nik & Jay hafa átt fjölda laga og platna í efstu sætum danska vinsældalistans og farið heim með verðlaunagripi frá Dönsku tónlistarverðlaununum.  Alveg eins og færeyska álfadrottningin Eivör.  Það er skemmtileg tilviljun.  Fyrir mánuði fékk Eivör nefnilega beiðni um að gera lag með Nik & Jay.  Um er að ræða titillag næstu plötu drengjanna,  Engle eller Dæmoner. 

  Ekki nóg með það.  Hugmyndin er að flétta lagi Eivarar,  Tröllabundin,  inn í  Engle eller Dæmoner.  Samstarfið verður á jafnréttisgrundvelli.  Eivör hefur jafn mikið að segja um útfærsluna og drengirnir.  Þetta er samvinnuverkefni fremur en að Eivör sé gestasöngvari í lagi hjá Nik & Jay. 

  Eivör tók erindi Nik & Jay vel.  Þegar hefur verið ákveðið að fara lengra með samstarfið.  Til að mynda er áhugi fyrir því að Eivör taki þátt í hljómleikum Niks & Jays í sumar. 

  Í fyrra kom Eivör fram á fjölda hljómleika vinsælustu hljómsveitar Danmerkur,  Nephew,  og einnig vinsælustu vísnahljómsveit Noregs,  Vamp.  Að auki söng Eivör á plötu Vamp.  Hvorutveggja vakti mikla athygli og var góð kynning fyrir Eivöru.  Næsta víst er að svo mun einnig verða með samstarf hennar og Niks & Jays. 

Athugasemdir

[Steingrímur Helgason, 17.4.2011 kl. 01:15]

Þezzi Eivör, er þetta dona óvirkandi víruzavörn ?

Er hún frí, eða í fríi ?

'-}

[Flosi Kristjánsson, 17.4.2011 kl. 17:47]

Alltaf eru þau nú skemmtileg orðin sem hafa sama samhljóðann þrisvar sinnum í röð: rappplata, þátttaka, gullleitarmaður, rassskelling :-)

[Jens Guð, 17.4.2011 kl. 22:55]

Steingrímur, Eivör er alltaf flottust burt séð frá fríi eða ekki fríi.

[Jens Guð, 17.4.2011 kl. 22:58]

   Flosi, strangt til tekið ætti ég að setja bandstrik á milli þegar útlent orð (rapp í þessu tilfelli) "klassar" við íslenska endingu.