Frábær útvarpsþáttur: Plötuskápurinn á rás 2

  Rás 2 hefur lengi búið að þeirri gæfu að þar hafa safnast saman dagskrárgerðarmenn með góða þekkingu á tónlist og hæfileika til að miðla sínum fróðleiksmolum til hlustenda.  Nægir að nefna Óla Palla,  Guðna Má,  Andreu Jónsdóttur,  Magnús Einarsson,  Frey Eyjólfs,  Kristján Pálsson,  Matta,  Þossa,  Ásgeir Eyþórs,  Arnar Eggert og marga sem ég er að gleyma í augnablikinu.  Nema þó ekki snillingnum Andra Frey og Gunnu Dís.  Móðir mín á níræðisaldri sagði mér að hún sé alveg "hooked" á Þessum morgunþætti.  Andri Freyr sé svo fyndinn og konan hafi sig alla að halda aftur af honum.  "Það er ævintýralega líflegt og yndislegt að hlusta á þau," sagði mamma sem vill alltaf hafa hasar í öllu.  Og ekki lýgur hún.  Né heldur vissi hún að ég hef þekkt Andra Frey frá því að sá grallari fæddist,  son eins  besta vinar míns.  Trommuleikara Frostmarks,  Jarla og fleiri hljómsveita.  Viðars Júlí Ingólfssonar á Reyðarfirði,  vinsælasta plötusnúðar (DJ) á Austurlandi.

  Nú hefur hafið göngu sína á rás 2 meiriháttar góður þáttur sem heitir Plötuskápurinn.  Þar fara þeir Gunnlaugur Sigfússon,  Sigurður Sverrisson og Halldór Ingi Andrésson á kostum.  Hver um sig er alfræðiorðabók í músík.  Þátturinn er á dagskrá á föstudagskvöldum.  En það er einnig hægt að hlusta á hann hlaðvarpi.  Jafnvel aftur og aftur.

  Í kvöld fjallaði Halldór Ingi Andrésson um forvera Bobs Dylans,  Dylan sjálfan og sporgöngumenn hans.  Frábær þáttur.  Hægt er að hlusta með því að smella á http://www.ruv.is/frett/plotuskapurinn/ahrif-dylans-og-ahrifavalda

  Hér fyrir ofan flytur Bob Dylan lag sitt  Like A Rolling Stone.  Ég ætla að mér yngra fólk átti sig ekki á því hvað þetta var nýstárlegur og framandi hljóðheimur á sínum tíma.  Þetta var sleggjuhögg.  Algjört dúndur.

Athugasemdir

[JR (IP-tala skráð) 10.12.2011 kl. 02:29]

Orðin sem þú skrifar um dagskrárgerð Rásar 2 eru orð að sönnu !

Daman með Andra Frey heitir Gunna Dís !  Var ekki Jón og Gunna algengustu nöfnin hér áður fyrr ?

 Gott hjá þér að mina okkur hin á þennan þátt á föstudagskvöldum, missti af honum í kvöld !

[Jens Guð, 10.12.2011 kl. 03:20]

  JR,  takk fyrir upplýsingarnar.  Mig minnti eitthvað nafn í þessa veru en vildi ekki slá fram vitlausu nafni.  Heitir annars einhver Gunna?  Þetta hlýtur að vera stytting á fullu nafni.  Þar fyrir utan:  Þau eru frábær saman.

[Ásdís Sigurðardóttir, 10.12.2011 kl. 14:56]

Greinilega hress og skemmtilega kona hún mamma þín

[Jens Guð, 10.12.2011 kl. 17:51]

  Ásdís,  hún er það.  Mikill fjörkálfur.

[Sigurbjörg Sigurðardóttir, 10.12.2011 kl. 21:23]

Usss,er of löt og mikil er vinnann hjá mér svo kæri Jens þau 9 ár sem ég hef verið búsett hér á ískalda klakanumm hef ég bara hlustað á xið og voninn var með nálina sem fæddist og dó er það ekki rétt hjá mér?.Stundum á laugardögum(þegar er frí frá vinnu) og nenni ekki að hlusta á fóbolta þá horfi ég á tækið og rúlla til gullbilgjuna og jahjerna dettur maður inn í gömul og vel gerð blues lög,og annað,jabb,músikin er allt,það nærir mig betra en matur.

[Jens Guð, 11.12.2011 kl. 01:13]

  Sigurbjörg,  þú ert greinilega með góðan músíksmekk fyrst að þú hlustar á Xið og hlustaðir á Nálina.  Nálin var í loftinu aðeins í nokkra mánuði.  Auglýsingamarkaðurinn var ekki búinn að jafna sig eftir bankahrunið.  En mér skilst að ennþá standi til að endurreisa Nálina.  Ég var með þátt á Nálinni og sakna stöðvarinnar.