Eivör, Kór Langholtskirkju, Graduelakórinn...

.

- Viðburður:  Jólasöngvar í Langholtskirkju

- Flytjendur:  Kór Langholtskirkju,  Graduelakór Langholtskirkju,  einsöngvarar,  hljóðfæraleikarar og Táknmálskórinn

- Stjórnandi:  Jón Stefánsson

- Einkunn:  ****

.

  Það eru þrennir hljómleikar eftir:  Tveir í kvöld og lokahljómleikarnir á sunnudag.

  Dagskráin er fjölbreytt og spannar hátt í hálfan annan tíma (með hléi).  Á efnisskrá eru allt frá laufléttum þekktum jólapoppssöngvum (Ljósadýrð loftin fyllir,  Jólasnjór - Meiri snjó!  og fleiri) til hátíðlegustu jólasálma.  Þar á milli er m.a. boðið upp á bandarískan negrasálm (Go, Tell It On The Mountain  með íslenskum texta),  samsöng með áheyrendum á þekktum jólalögum,  djössuð lög (m.a.  Hvít jól) og frumsamda jólasöngva eftir Eivöru.  Flytjendur eru hátt í hundrað.  Þar af þrír kórar:  Kór Langholtskirkju,  Graduelakór Langholtskirkju og Táknmálskórinn.

  Sérviskulegur músíksmekkur minn og lauflétt popplög eiga sjaldan samleið en skemmta öðrum þeim mun meira.  Fyrir mig bættu hinsvegar hátíðlegri jólasálmarnir um betur.

  Einn af hápunktum hljómleikanna er magnþrunginn flutningur Ólafar Kolbrúnar Harðardóttur,  hljómsveitar og kóra á  Ó, helga nótt.  

  Andri Björn Róbertsson er eini karlkyns einsöngvarinn.  Hann syngur hljómfagran bassa-barítón.  Kvenkyns einsöngvararnir eru 7.

  Á engan er hallað þó að Eivör sé sögð stjarna hljómleikanna.  Jólasöngvar hennar tveir eru í flokki með hennar best sömdu.  Er þó af nógu að taka í þeim efnum.  Hátíðleg umgjörðin í Langholtskirkju spilar inn í og liðsinni kóranna.  Þar fyrir utan hefur Eivör einstaklega góðan og sterkan sviðsljóma.  Svo ekki sé minnst á blæbrigðaríka,  stóra og fagra söngröddina.  

  Auk frumsömdu söngvanna syngur Eivör  Pie Jesu  eftir Andrew Lloyd Webber.  

  7 manna hljómsveitin er sparlega notuð. Yfirleitt er ekki spilað á nema 2 - 3 hljóðfæri í hverju lagi.  Það undirstrikar fjölbreytileikann í tónlistinni.  Orgel er stundum í aðalhlutverki.  Í öðrum tilfellum eru það tvær flautur eða harpa eða píanó og Eivör spilar á kassagítarinn sinn.  

  Táknmálskórinn setur svip á hljómleikana og minnir okkur á þau forréttindi að heyra.   

  Einu atriði þarf að kippa í lag:  Það snýr að heitu súkkulaði sem boðið er upp á í hléi og piparkökum.  Þannig háttar til að veitingarnar standa á þremur langborðum í hliðarsal.  Fyrstir hrúgast að borðum þeir sem sitja niðri.  Það er þröngt á þingi.  Þegar þeir sem sátu á svölum komust að voru allir súkkulaðikönnurnar tómar.  Þær voru þó fjöldamargar.  En dugðu ekki fyrir fulla kirkju (560 sæti).  Heyra mátti grát og gnístan tanna þegar svalagestir gerðu örvæntingafulla en árangurslausa leit að könnu með heitu súkkulaði.  Þessi lýsing er kannski full yfirdrifin hjá mér og seinni hluti hljómleikanna varð áreiðanlega til þess að þeir súkkulaðilausu tóku gleði sína á ný.  Allir fóru sælir og glaðir heim af hljómleikunum.  Það þarf samt að gera ráðstafandir til að allir fái heitt súkkulaði í hléi.    

  Það er ekki hægt að pósta hér inn myndbandi af Eivöru og Gradúelakórnum flytja  Jólaminningu.  Engu að síður er mögulegt að sjá og heyra það með því að smella á þennan hlekk:  http://www.youtube.com/watch?feature=player_embedded&v=YDrGYqc_eMw

Athugasemdir

[Sólrún :) (IP-tala skráð) 18.12.2011 kl. 17:00]

Eivör er flott.

Og hefur líka agent sem getur jafnvel

fengið mann til að trúa á SKÖTU.

Að skata sé bæði girnileg og ómissandi :)

[Jens Guð, 19.12.2011 kl. 20:24]

  Sólrún,  skata er ómissandi á þessum árstíma.  Ég er búinn að fá mér skötu þrisvar síðustu daga.  Og er hvergi hættur fyrr en jólin ganga í garð.

[Sólrún :) (IP-tala skráð) 19.12.2011 kl. 22:33]

Til hamingju með þetta Jens :)

Eg öfunda þig samt pínulítið

Skatan er svo MÖGNUÐ að hún

hlýtur að vera dúndur fyrir þá sem

ná henni almennilega

Eg öfunda þig samt miklu meira

af Færeyjum og öllu því

Eg er mikill aðdáandi þeirra en

hefði viljað vita meira um ýmislegt þar

íslendingar hefðu áreiðanlega gott af að kynnast færeyjingum betur

[Jens Guð, 19.12.2011 kl. 23:02]

  Sólrún,  ég fór fyrst til Færeyja 1993.  Síðar var ég fenginn til að kenna þar skrautskrift.  Ég fór þangað nokkur ár í röð í þeim tilgangi.  Og tók ástfóstri við Færeyjar og Færeyinga.  Ég fór að stússa með þeim í músíkmálum.  Setja upp hljómleika og aðstoða með plötuútgáfu.  Færeyingar eru elskulegasta fólk sem ég hef kynnst á minni ævi sem nú nálgast 60 árin.  Ég hef látið húðflúra á mig landakort af Færeyjum og vörumerki Föreyja Bjór.  Ég er búinn að skrifa bók um Eivöru sem kemur út á næsta ári.  Hún er að lesa handritið þessa dagana.  Í meira en áratug hef ég heimsótt Færeyjar ekki sjaldnar en tvisvar á ári og iðulega þrisvar.  Þar líður mér svo vel að ég hef ítrekað íhugað að flytja þangað.

[Sólrún :) (IP-tala skráð) 20.12.2011 kl. 00:19]

EG ÖFUNDA ÞIG ÓGERÐSLEGA MIKIÐ !

Ætli sé hægt að sjá Færeyska sjónvarpið á netinu ?

eða veistu um einhverja góða linka ?

Eg hef bara einusinni komið til Færeyja fyrir löngu síðan.Og það var gaman.

Þá vorum við á Sjímannaheimilinu í Þórdhöfn.

Þetta var meðan ekki mátti kaupa áfengi nema vera búinn að borga skattinn og hvergi hægt að fá slíkt keypt í búðum.

Mér skildist að á þessum tíma hefði verið mikið um allskyns trúfélög þarna og stíft stundaðar trúarsamkomur.

Vinstra megin við innganginn á gistiheimilinu var nokkuð stórt herbergi með orgeli og einhverjum stólum minnir mig.

Þaðan barst sálmasöngur á kvöldin og færðist töluvert í aukana eftir því sem á leið kvöldið.

Stemmingin var góð og menn komu rjóðir sælir með sig og forlyftir út af þessum samkomum.

Hótelstjórinn lék undir á orgelið.Dásamlegt.

[Jens Guð, 20.12.2011 kl. 17:54]

  Það er ekki hægt að sjá færeyska sjónvarpið á netinu.  En á youtube eru mörg skemmtileg og falleg myndbönd af Færeyjum.  Þú þarft bara að slá inn Faroe Islands og þá dúkka þau upp.

  Það er ennþá mikill trúarhiti í Færeyingum.  Eiginlega ótrúlega mikill.  Hérlendis tölum við um Krossinn,  Aðventísta,  Veginn og Mormóna sem sértrúarsöfnuði.  Þetta eru tiltölulega einangraðir og fámennir söfnuðir.  Í Færeyjum er trúarhiti af sömu gráðu og í þessum söfnuðum normið,  hvort sem fólkið er í ríkiskirkjunni eða eru það sem kallast "klapparar" (það er bannað að klappa í ríkiskirkjunni en þeim mun meira er klappað og stappað og hlaupið um í öðrum færeyskum trúfélögum).

[Sólrún (IP-tala skráð) 21.12.2011 kl. 00:16]

Takk fyrir þetta

Eg fór að leita í gærkvöldi og fann svo margt fallegt að eg sat þangað til klukkan var allt í einu orðin 3

Eg er líka forvitin um Hjaltlandseyjar eg finn einhverja tengingu þangað

Eg set herna flottasta tengilinn sem mér fannst

þó að þú sért kannski búinn að sjá myndina

glæsilegt :)

[Sólrún (IP-tala skráð) 21.12.2011 kl. 01:13]

http://www.youtube.com/watch?v=dTj26z1KYV8&feature=bf_prev&list=PLD6CFA98FD5A61EB3&lf=results_main