Skemmtilegur og fróðlegur útvarpsþáttur

 

  Ég veit ekki hvers vegna það er að dagskrá rásar 1 fer meira og minna framhjá mér.  Kannski er ástæðan sú að dagskráin er ólík frá degi til dags.  Á rás 2,  X-inu og Útvarpi Sögu er dagskráin í fastari skorðum.  Maður kann hana utan að og gengur að áhugaverðum föstum þáttum þar sem vísum. 

  Fyrir tilviljun datt ég í dag inn á skemmtilegan og fróðlegan þátt á rás 1.  Hann kallast  Albúmið  og er í umsjá Jóns Ólafssonar og Kristjáns Freys Halldórssonar.   Í þættinum tóku þeir fyrir plötuna  London Calling  með bresku hljómsveitinni The Clash.  Spiluðu öll 19 lög plötunnar og fjölluðu um þau hvert fyrir sig. 

  London Calling  er iðulega á listum yfir 10 bestu plötur rokksögunnar.  Mikla athygli vakti þegar söluhæsta poppblað heims,  bandaríska Rolling Stone,  útnefndi þetta bestu plötu níunda áratugarins.  Útnefningin var ekki umdeild nema fyrir þær sakir að platan kom út á áttunda áratugnum (1979).  Kaninn hefur aldrei stressað sig á nákvæmum ártölum þegar músík er til umfjöllunar.  Ótal spaugileg dæmi um það má finna í sögu Grammy verðlauna. 

  Fyrir þá sem misstu af þættinum á rás 1 í dag þá má hlusta á hann með því að smella á þessa slóð:  http://www.ruv.is/sarpurinn/albumid/09062012

  Ég er töluvert eldri en Jón og Kristján Freyr.  Fylgdist þess vegna sem rígfullorðinn maður náið með pönkbyltingunni 1976/77 á rauntíma á meðan Jón og Kristján Freyr sóttu fermingarfræðslu.  Fyrir bragðið var góð skemmtun að hlusta á vangaveltur tvímenninganna um það hvernig pönkarar tóku  London Calling.  Platan kom pönkurum í opna skjöldu.  Hún var það stórt skref frá frumpönkinu en samt nógu sterk til að menn heilluðust.  En margir þurftu að velta vöngum tvístígandi á meðan þeir voru að melta þetta uppátæki.  Nokkru munaði um að platan byrjaði bratt á öflugu titillaginu.  Lagi sem í dag tilheyrir "klassísku rokki".  Er spilað á Bylgjunni jafnt sem X-inu og Brúsi frændi syngur á hljómleikum.

Athugasemdir

[Atli Viðar Engilbertsson (IP-tala skráð) 9.6.2012 kl. 22:06]

Þetta er athyglisvert með Rás 1 Albúmið -ég sem hlusta bara á Rás 2 -Xið eða Bylgjuna á morgnanna meðan ég reyni að vakna. Útvarp þarf nefnilega helst að vera í mynd líka fyrir mig." Og gaman að því að þú jensguð minnist á fermingardrengi -þá var minn æsku og fermingar prestur -prófastur séra Baldur Vilhelmsson í Vatnsfirði við Djúp. En hann hefur alltaf kallað sjónvarið "myndvarp."  En Atla Viðar finnst skemmtilegra sjá líka efnið sem er hverju sinni. En The Clash: Ég átti þessa plötu (tvöfaldan vínil) fyrst þegar hún kom út -en seldi hana lánaði eða gaf. Titillagið eldist mjög vel og gríðargóð smíð. En gaman að þetta verðlauna klassík 80this híhí og eða 90this?

[sæunn guðmundsdóttir (IP-tala skráð) 10.6.2012 kl. 18:44]

með aldrinu hef ég oftar staðið mig að því að skipta á gufuna og margt skemmtilegt í gangi þar

[Jens Guð, 10.6.2012 kl. 22:05]

  Atli Viðar,  þessi plata hefur elst betur en flestar aðrar plötur frá þessu tímabili.  Fyrir utan titillagið hefur "Guns of Brixton" orðið sívinsælt.  Fjöldi tónlistarmanna hefur nýtt auðþekkjanlega bassalínu og hljómfall lagsins.  Í fljótu bragði man ég eftir lagi með Cypress Hill sem byggði á þessu og varð vinsælt.  Man bara ekki nafnið á því lagi.

[Jens Guð, 10.6.2012 kl. 22:06]

  Sæunn,  það er margt skemmtilegt á rás 2.  Það er tilfellið.