Stórfenglegir færeyskir hljómleikar í Hörpu

  Færeyska álfadrottningin,  Eivör,  og færeyska heimspoppshljómsveitin Yggdrasil héldu óvænt hljómleika í kyrrþey í Hörpu í kvöld.  Í kyrrþey segi ég vegna þess að hljómleikarnir voru ekki auglýstir.  Ég held að miðasala hafi ekki einu sinni verið á midi.is.  Færeyingarnir sáu enga ástæðu til að gera eitthvað mál úr þessu.  Þetta var aðeins til gamans gert.   

  Hljómleikunum var "riggað" upp með hraði.  Eivör og Yggdrasil hefja nefnilega hljómleikaferð um Bandaríkin og Kanada á morgun.  Það er ekki beint flug frá Færeyjum til Ameríku.  Þess vegna fljúga þau frá Færeyjum til Íslands og héðan til Ameríku.  Komu til Íslands í dag og fara á morgun.  Þeim þótti upplagt að nota kvöldið til að spila í Hörpu, frekar en að gera ekki neitt.

  Hljómleikarnir spurðust út.  Mæting var góð.  Svo gott sem fullur salur.

  Yggdrasil er rösklega fertug heimspoppshljómsveit (world music) með sterkum djasskeim.  Músík hennar mætti einnig kalla frjálsan þjóðlegan djass (ethno-jazz).  Píanóleikarinn og tónskáldið Kristian Blak er forsprakki Yggdrasil.  Hugmynd hans var sú að Yggdrasil yrði sam-norræn hljómsveit.  Þannig skipuð var hljómsveitin framan af ferli.  Með tímanum hafa Færeyingar þó orðið ráðandi í henni.  En jafnan þó einhver útlendingur með.  Að þessu sinni er það sænski blásarinn Anders Hagberg.

  Eivör var söngkona Yggdrasil um 2ja ára skeið á fyrri hluta þessarar aldar.  Þetta var í fyrsta skipti sem hún syngur aftur með Yggdrasil.  Það var rosalega gaman á að hlýða.  Það var eins og Eivör og sextettinn hefðu ekki tekið sér svo mikið sem dags hlé,  svo vel smullu þau saman. 

  Að tveimur lögum afgreiddum hvarf sextettinn af sviði.  Eivör söng þá og spilaði við eigin undirleik,  m.a. nokkur splunkuný lög sem verða á plötu með henni er kemur út í lok ágúst.  Í þeim lögum naut Eivör aðstoðar bassa- og hljómborðsleikarans Mikaels Blaks.  Þetta var frumflutningur á þessum lögum á sviði.  Þau eru ljúf, falleg og gefa góð fyrirheit um plötuna. 

  Liðsmenn Yggdrasil fjölmenntu aftur á svið.  Eivör söng þá með þeim nokkur gömul færeysk lög.  Áheyrendur kunnu svo vel að meta að hljómsveitin var klöppuð ákaft upp.  Er hljómleikunum lauk tróðust gestir að söluborði með færeyskum plötum.  Þeir toguðust á um plötur með lögunum sem Eivör og Yggdrasil höfðu flutt.  Það staðfesti hversu mjög gestir höfðu heillast upp úr skóm.   

Athugasemdir

[Erling (IP-tala skráð) 21.6.2012 kl. 00:43]

Synd að missa af þessum tónleikum :S

Kv, Lovísa

[Ómar Ingi, 21.6.2012 kl. 01:37]

Og þú lætur mann ekkert vita ÖSSSS

[Sigurður I B Guðmundsson, 21.6.2012 kl. 14:58]

Hefur þú sótt um að verða sendiherra Íslands í Færeyjum??? Eða upplýsingafulltrúi Færinga á Íslandi eða.....!!!!!

[Jens Guð, 21.6.2012 kl. 19:53]

  Erling,  það naga sig margir í handarkrikann fyrir að hafa misst af hljómleikunum.  En Eivör kemur aftur til Íslands í lok ágúst og heldur nokkra hljómleika með hljómsveit.

[Jens Guð, 21.6.2012 kl. 19:54]

  Ómar Ingi,  ég lét vita á Fésbók.  Þess vegna mættu svona margir.

[Jens Guð, 21.6.2012 kl. 20:05]

  Sigurður I.B.,  Færeyingar eru ekki sjálfstæð og fullvalda þjóð.  Þess vegna eiga þeir enga sendiherra né sendiráð.  Sem hluti af danska sambandsríkinu sjá Danir um þau mál. 

  Hinsvegar er rekin hérlendis með miklum myndarbrag Færeyska sendistofan.  Hún gegnir einmitt upplýsingahlutverki um Færeyjar á Íslandi.  Ég hef oftar en einu sinni leitað þangað eftir upplýsingum.  Ég er ekkert vel að mér um Færeyjar almennt.  En ég hef fylgst vel og náið með færeyskri tónlist í næstum tvo áratugi.  Það auðveldaði mér við skráningu á bókinni um Eivöru sem kemur út í haust.