Söngvari Led Zeppelin syngur um Eivöru

 

  Enski söngvarinn Robert Plant var í bestu rokkhljómsveit sögunnar,  Led Zeppelin.  Með henni kom hann fyrst til Íslands 1970.  Hljómsveitin hélt hljómleika í Laugardalshöll.  Skömmu síðar sendi Led Zeppelin frá sér plötuna Led Zeppelin III.  Þar syngur Robert lag um Ísland,  Immigrant Song.  Textinn hefst á þessum orðum:

  We come from the land of the ice and snow
from the midnight sun where the hot springs blow

  The hammer of the gods will drive our ships to new lands
To fight the horde and sing and cry, Valhalla, I am coming

  Þarna er tilvísun í ásatrú.  Robert Plant er heiðursfélagi í íslenska Ásatrúarfélaginu.  Hann fær reyndar ekki að vera skráður formlega hjá Hagstofunni í félagið.  Það geta aðeins íslenskir ríkisborgarar. 

  Fyrir nokkrum árum mætti Robert óvænt á blót hjá Ásatrúarfélaginu í þáverandi félagsheimili þess á Grandagarði.  Á miðju blóti kvaddi hann sér hljóðs.  Hann lýsti gleði sinni sem ásatrúarmaður yfir því að á Íslandi sé starfandi og skráð Ásatrúarfélag. 

  Robert Plant hefur oftar heimsótt Ísland.  Ekki veit ég hvenær hann hefur uppgötvað færeysku söngkonuna Eivöru,  sem Íslendingar hafa slegið eign sinni á.  Ef grannt er hlustað má heyra hann hér syngja um hana strax í upphafi lags:  If Eivör a Carpenter...

 

Athugasemdir

[Sigurður Þorsteinsson, 30.6.2012 kl. 06:47]

Já það væri sannarlega viðeigandi  ef sungið væri um gyðjuna Eivör. Eivör okkar, því auðvitað verðum við að eiga örlítið í henni. Þetta var góður lestur í morgunsárið, takk.

[Jens Guð, 30.6.2012 kl. 23:53]

  Sigurður,  ég er búinn að skila af mér handriti að bók um gullmolann Eivöru.  Bókin kemur út í haust.  Við,  Íslendingar,  eigum heilmikið í henni.  Fjögurra ára dvöl hennar á Íslandi er stór hluti af hennar ferli.