Forvitnileg og áhugaverð plata

  Færeyska plötuútgáfan Tutl var að senda frá sér áhugaverða safnplötu,  World Music from the Cold Seas.  Eins og nafnið gefur sterklega til kynna þá inniheldur hún þjóðlega (etníska) tónlist frá Færeyjum, Íslandi, Grænlandi og Samalandi.  Meðal flytjenda eru Eivör,  víkingametalssveitin Týr,  Margrét Örnólfsdóttir,  Kristian Blak og grænlenska hljómsveitin Sume. 

  Af lögum á plötunni má nefna  Ólaf Liljurós  í flutningi Tryggva Hansen,   Ormin langa  með Tý og  Fæðing máfsins II  með Klakka.  Klakki er hljómsveit Nínu Bjarkar Elíasson.   Fæðing máfsins II  er eftir hana og Sjón.  Fallegt lag með flottum texta.

  Samtals inniheldur platan 16 lög,  fjögur frá hverju því landi sem áður er nefnt.  Johan Anders Bær er líklega sá af samísku flytjendunum sem best er þekktur hérlendis.  Hann átti til að mynda lag á safnplötunni vinsælu  Rock from the Cold Seas  sem kom út fyrir 13 árum.   World Music from the Cold Seas  er einskonar sjálfstætt framhald af þeirri plötu.  Lögin eru sungin á móðurmáli flytjenda. 

  World Music from the Cold Seas  fæst í Smekkleysu á Laugarvegi og áreiðanlega í fleiri plötubúðum.  Tékkið á plötunni.

  Hér fyrir neðan er sýnishorn af því sem heyra má á  World Music from the Cold Seas.   Það er með grænlensku hljómsveitinni Sume.

 

Athugasemdir

[Stefán (IP-tala skráð) 14.12.2012 kl. 15:39]

Gott að Bubba Morthens er greinilega ekki að finna á þessari annars eigulegu safnplötu.

[Sigurður I B Guðmundsson, 14.12.2012 kl. 18:10]

Veistu hvað Ormurinn langi er orðinn langur?

[Jens Guð, 16.12.2012 kl. 23:39]

  Stefán,  það er sneytt framhjá léttpoppi. 

[Jens Guð, 16.12.2012 kl. 23:40]

  Sigurður I.B.,  það eina sem fólk veit er að hann er langur.  Töluvert langur.