Plötuumsögn

 

 - Titill:  Himinbrim

 - Flytjandi:  Nóra

  - Einkunn: *****

  Það var nokkuð merkilegt hvernig íslenska hljómsveitin Nóra fjármagnaði sína aðra plötu,  Himinbrim.  Hljómsveitin leitaði til aðdáenda sinna úti í heimi.  Og viti menn:  Frá gjörvallri heimsbyggð bárust fjárframlög sem gerðu hljómsveitinni kleift að hljóðrita og gefa út plötuna.  Það skemmtilega er að Nóra semur og syngur sín ljúfu lög á íslensku.  Rétt eins og Sigur Rós.

  Samlíkingin við Sigur Rós nær lengra.  Tónlist Nóru svipar að hluta til seiðmögnuðu fegurðarinnar sem einkennir músík Sigur Rósar.  Þó fer því fjarri að um stælingu á Sigur Rós sé að ræða.  Nóra er alveg með sinn persónulega og sjálfstæða hljóðheim.  Til að vísa í fleira kunnuglegt má alveg eins nefna hljómsveitina Maus til sögunnar.  En samt ekki beinlínis. Söngstíll Egils Viðarssonar minnir á söngstíl Bigga í Maus.  Ekki síst þegar gítar og rokk krauma undir. 

  Fallegur og stígandi hljómagangur einkennir lagasmíðar Nóru.  Fegurð, hátíðleiki og rísandi framvinda umlykja tónlistina.  Hugsanlega má staðsetja hljómaganginn í humátt að fegurstu lögum Coldplay.  Nóra er bara miklu skemmtilegri hljómsveit.  

  Platan í heild er pínulítið seintekin.  Lögin hljóma samt vel við fyrstu hlustun.  Þau hljóma ennþá betur við ítrekaða spilun.  Hægt og bítandi opnast blómið og springur að lokum út í allri sinni dýrð.

  Þetta er tölvupopp og píanóspil skreytt með strokhljóðfærum (fiðlum og sellói).  Söngrödd Auðar Viðarsdóttur er mjúk og ljúf.  Textaframburður hennar er skýr og góður.  Músíkin flakkar á milli þess að vera notalega þægileg annars vegar og fast að harðneskju og hávaða hins vegar.  Trommuleikurinn er aftarlega í hljóðblöndun. Hann er snilld þegar best lætur.  Virkilega flottur. 

  Allt er fagmannlega afgreitt en jafnframt á "lifandi" hátt.

 Umslagið er krúttlegt.  Nóra tilheyrir,  jú,  krúttkynslóðinni.  Allur texti á umslagi er handskrifaður með auðlæsilegri rithönd.  Það hefur tekið tímana tvo eða rúmlega það.  Sem leturfræðingur hef ég gaman af að rýna í nostursamlega handskrifaðan textann.  Brúnleitt litaval (út í gult og "orange") er gott. 

  Himinbrim  er glæsileg plata og tvímælalaust ein af þeim bestu 2012. 

  Hægt er að hlusta:  http://listen.noramusic.is/album/himinbrim

Athugasemdir

[Stefán (IP-tala skráð) 19.12.2012 kl. 16:04]

Hef því og miður ekki heyrt þessa snilld, en Þetta var heiðarleg og klár fjármögnun hjá þeim.  Eitthvað annað líklega en var hjá Kristjáni Arasyni núverandi starfsmanni hjá N1, sem var að fá afskrifaða tvo milljarða á einkahlutafélag sitt. Kanski viðskiptavinir hans á Sölusviðinu hjá N1 fái nú skuldir sínar afskrifaðar um áramótin ? 

[Jens Guð, 20.12.2012 kl. 20:58]

  Stefán,  það er margt ljótt í sögu Neins.