Plötuumsögn

. 

 - Titill:  Nýtt upphaf

 - Flytjandi:  Herbert Guðmundsson

 - Einkunn: ****

.

  Yfir tónlistinni í heild er meiri léttleiki en á fyrri plötum Hebba.  Ballöðurnar eru poppaðri.  Í textum er hinsvegar tregi og eftirsjá í fyrstu 4 lögunum.  Í fimmta laginu,  Komdu með, er skipt um gír:  "Kveð veturinn / sem langur var og stríður."  Sumri, sól, ást og gleði er fagnað í fjörlegum léttrokkuðum sumarslagara.  Þetta lag hefur alla eiginleika til að verða sívinsæll sumarsmellur.

  Treginn skýtur aftur upp kolli í næsta lagi,  ballöðunni  Sé þig hvar sem er.  Þannig skiptast á skin og skúrir í næstu lögum.  Það er nett sumarstemmning í laufléttu og söngrænu  Sumarið er stutt. 

  Í hinu rólega  Við tvö  örlar á smá kántrý eða eiginlega blágresiskeim.  Í fljótu bragði man ég ekki eftir Hebba á þeim slóðum.

  Það kemur ekki á óvart að stórsmellurinn frá í fyrra,  Eilíf ást,  sé á plötunni.  Reyndar bæði í íslenskri útgáfu og einnig með enskum texta.  Enska útgáfan er hraðari og glaðværari.

  Mörgum kom í opna skjöldu að  Eilíf ást  skyldi ekki verða keppnislag Íslands í Söngvakeppni evrópskra sjónvarpsstöðva í fyrra.  Ég hef aldrei fylgst með þessari keppni og veit ekki út á hvað hún gengur.  Mér skilst að dansspor keppenda,  klæðnaður,  hárgreiðsla og eitthvað svoleiðis skipti sköpum. 

  Hvort sem sá skilningur er réttur eða ekki þá hefur  Eilíf ást  orðið lífseigari en flest lögin sem það atti kappi við í keppninni í fyrra.

  Þátttakan í keppninni færði Hebba stærri sigur en öðrum keppendum.  Þátttakan leiddi saman hann og eiginkonu hans,  Lísu Dögg Helgadóttur.  Platan er tileinkuð henni.  Lísa Dögg er höfundur texta upphafslagsins,  Camilia. 

  Hebbi hefur jafnan gert út á frumsamda söngva.  Á  Nýju upphafi  bregður svo við að Hebbi spreytir sig á sjö lögum eftir sænska höfunda.  Fyrir bragðið er pínulítið önnur áferð á sumum laglínum og í útsetningum en við eigum að venjast á plötum með Hebba.  Engu að síður gerir Hebbi lögin að sínum með sínum persónulega stíl.  Hans þrjú frumsömdu lög skera sig ekki frá sænsku lögunum.  Þetta er heilsteypt plata.  Allur flutningur er fagmannlegur.  Þórir Úlfarsson spilar á hljómborð og heldur utan um upptökur og útsetningar;  Gulli Briem og Ingólfur Sigurðsson tromma;  Pétur Valgarð Pétursson og Stefán Már Magnússon spila á gítara;  Friðrik Sturluson plokkar bassa og semur flesta texta.  Um bakraddir sjá Þórir Úlfarsson, Edda Viðarsdóttir, Elísabet Ormslev pg Pétur Örn Guðmundsson.   

..

Athugasemdir

[Stefán (IP-tala skráð) 12.2.2013 kl. 08:36]

Í mínum eyrum er Herbert Guðmundsson væminn poppsöngvari og smellpassar því inn í Eurovision keppnina, þar sem hommalegt útlit skemmir alls ekki fyrir keppendum. Dr Gunni hefur líka sagt að þeir sem helst sækja í þessar keppnir erlendis séu hommar og það sést líka vel að hér á landi er það eins.   Með fullri virðingu samt fyrir samkynhneigðum auðvitað.  Varðandi vinsældir og plötusölu skemmir Hebbi klárlega mjög fyrir sér með endalausu trúarrugli út og suður, sem gerir hann að aðhlátursefni á betri kaffistofum og víðar.  Spurning hvort hann ætti ekki bara að ganga alla leið og gerast trúarsöngvari og predikari í suðurríkjum bandaríkjanna þar sem hann gæti orðið stórstjarna sem slíkur.      

[Grrr (IP-tala skráð) 12.2.2013 kl. 22:09]

4 krossar af 5 virðist vera heldur mikið gjafmildi.

[Óskar, 15.2.2013 kl. 16:36]

Alveg óþarfa skítkast hjá Stefáni sem greinilega er eitthvað illt í sálinni.

Hebbi "prangraði" þessum disk inná mig í Kolaportinu, keypti hann nú meira svona til að styrkja karlinn en prófaði svo að skella honum í græjurnar.  Hann kom mér mikið á óvart, diskurinn er einfaldlega frábær ef undan eru skilin þrjú síðustu lögin sem mér finnst draga hann dálítið niður.  Alveg sammála þessum 4 stjörnum - lag no.5 "Komdu með" er langbesta lagið, hreinlega frábært.  Reyndar ekki eftir Hebba en hann fer mjög vel með það og sérlega flott útsetning.   Það verður botnað á rúntinum niður Laugaveginn næsta sumar!