Frábær mynd

  Dýr eru merkilegar skepnur og áhugaverðar um margt.  Mörg dýr gera glöggan greinarmun á fullorðinni manneskju annarsvegar og ungu barni hinsvegar.  Til að mynda sýna kettir ungum börnum ótrúlegt umburðarlyndi.  Barnið bögglast klaufalega með köttinn,  togar í skottið á honum eða gerir annað sem klárlega veldur kettinum sársauka eða veruleg óþægindi.  Kötturinn lætur sig hafa þetta.  Hann bregst ekki til varnar.  Reynir,  jú,  varlega að koma sér úr aðstæðunum án þess að valda barninu ama.  Kötturinn hefur fullan skilning á að þarna sé óviti að verki.

  Þess er líka fjöldi dæmi um að kettir vakti barnavagn þegar kornabarn sefur úti.   

  Algengt er að hestar hagi sér allt öðru vísi með ungt barn á baki en fullorðna manneskju.  Með ungt barn á baki getur ólmasti hestur orðið ljúfur sem lamb.  Hann gerir allt sem hann getur til að varna því að barnið detti af baki.  Hann gengur til hliðar ef barnið hallar á aðra hlið.  Gengur undir því, eins og það er kallað.  Það er hrífandi að fylgjast með því hvernig verstu tryppi skipta um gír með ungt barn á baki.  Umhyggja fyrir ungviðinu gengur fyrir öllu.  

  Hundar finna iðulega til sterkrar ábyrgðartilfinningar þegar ungt barn er á heimilinu.  Ef hvutta finnst barnið fara glannalega í námunda við vatn grípur hann þegar í stað til varúðarráðstafana.

 

Rottur stærri en kettir í Tehran

Athugasemdir

[Stefán (IP-tala skráð) 6.3.2013 kl. 08:17]

Þessi hundur minnir mig nú á Bubba Morthens ( nema bara mun gáfulegri og meira traustvekjandi en Bubbi ) þegar hann er aftur og aftur að verja ,, litla karlinn " hann Jón Ásgeir.   

[Ásthildur Cesil Þórðardóttir, 6.3.2013 kl. 12:31]

Mikið rétt með ketti og börn, ég átti líka hund sem vaktaði mín börn meðan þau voru lítil.  En merkilegasta sem ég hef heyrt með dýr og ungviði er um minkana sem eru með grimmustu dýrum hér, í ræktun þá bæði taka læðurnar til sín hvolpa annara (lélegri) mæðra og ef hvolpur sleppur út úr búri, getur hann labbað óáreittur yfir öll búin, en ef fullorðin minkur gerir það sama er hann étinn upp að kjúkum. 

[sæunn guðm (IP-tala skráð) 6.3.2013 kl. 15:05]

mikið rett hundurinn okkar passar ömmustelpuna öllum stundum ,þegar hun svaf útí vagni lá hann við dyrnar og let okkur vita um leið og hun vaknaði,þegar hun sefur i rúminu okkar liggur hundurinn fyrir aftan hana svo hun detti ekki út,i gærkvöldi gisti hun og þær lágu og heldu hvor utanum aðra þegar var kominn svefntimi ;)

[Jens Guð, 8.3.2013 kl. 00:40]

  Stefán, já, það er að verða dálítið pínlegt.

[Jens Guð, 8.3.2013 kl. 00:41]

  Ásthildur Cesil,  þetta vissi ég ekki um minkana.  Þetta er merkilegt.

[Jens Guð, 8.3.2013 kl. 00:42]

  Sæunn,  þetta er krúttleg saga.