Veistu hver ég var?

   17. ágúst næstkomandi svífur á skjáinn splunkuný sjónvarpsþáttasería,  "Veistu hver ég var?"  Hún verður á dagskrá Stöðvar 2.   Þetta er spurningaþáttur.  Umsjónarmaður, spyrill og dómari er Siggi Hlö.  Viðfangsefnið er níundi áratugurinn.  Nánar tiltekið sú músík sem fellur undir samheitið "80´s" (dansvænt tölvupopp, nýróman...) og kvikmyndir.

  Hvernig stendur á því að ég veit þetta?  Öfgafullur maður sem var á kafi í því selja pönkplötur, gefa út pönkplötur og stússa í pönkhljómleikum á níunda áratugnum?  

  Skýringin liggur í því að ég er í einu af 18 keppnisliðum sem spreyta sig í "Veistu hver ég var?"  Þættirnir hafa þegar verið teknir upp.  Það var góð skemmtun að taka þátt í leiknum.  Egils Gull var í boði.  Gott ef að pizzur og eitthvað fleira voru ekki einnig á boðstólum.  Ég einbeitti mér að Gullinu.

  Ég var í keppnisliði Hebba Guðmunds.  Ásamt okkur var í liðinu Bjarni Jóhann Þórðarson.  Það munaði um minna.  Sá var og er á heimavelli þegar 80´s poppið er annars vegar.  Þar fyrir utan hugsar hann svo hratt að áður en mínar heilasellur náðu að sameinast í að grafa upp svar við einni spurningu var Bjarni búinn að svara mörgum.  

  Keppnislið Hebba atti kappi við lið Sverris Stormskers.  Sverrir er fjölfróðari um 80´s músík en margur heldur.  Honum til halds og trausts voru tveir Snorrar.  Annar er Snorrason og sigurvegari í Idol eða X-factor.  Ég held að ég sé ekki að rugla honum saman við einhvern annan þegar ég tengi hann við hljómsveitina Jet Black Joe.  

  Hinn Snorrinn er Sturluson.  Hann var íþróttafréttamaður, ja, nú man ég ekki hvort það var á Rúv eða hjá Stöð 2.  Eða kannski báðum.  Hann hefur líka verið dagskrárgerðarmaður á Rás 2 og öðrum útvarpsstöðvum.  Lið Sverris var öflugt.  

  Siggi Hlö er stuðbolti.  Hann tekur sig ekki hátíðlega.  Það einkennir þáttaseríuna.  Þetta er allt til gamans gert.  Það er útgangspunkturinn.  Ungmennafélagsandinn "að vera með í leiknum" svífur yfir vötnum.  Siggi Hlö er rétti maðurinn í hlutverki þáttastjórnandans, eins og dæminu er stillt upp:  Fjörmikill gleðipinni og snöggur til svars af léttúð undir öllum stöðum sem upp koma.  Hann á auðvelt með að keyra upp stemmninguna  Það er svo mikið stuð á stráknum.  Hann kann þetta frá A - Ö. 

  Það var virkilega gaman að taka þátt í þessum spurningaleik.  Ég skemmti mér konunglega.  Ég hlakka til að sjá útkomuna í endanlegri útfærslu.  Ekki aðeins þáttinn með keppnisliðum Hebba og Stormskers.  Aðrir þættir eru líka spennandi.  Til að mynda viðureign Rásar 2 og Bylgjunnar.  

 

Athugasemdir

[Helga Kristjánsdóttir, 13.8.2013 kl. 23:24]

Fínt! Ertu með Færeyingahúfu,það kann ég virkilega að meta.Ég var búin að gleyma þessu einkenni þeirra,en kannski eru þeir hættir að nota hana nema á hátíðum.

[Tobbi (IP-tala skráð) 14.8.2013 kl. 11:04]

Mér finnst skeggið virðulegra en hárið.

[Jens Guð, 14.8.2013 kl. 12:06]

  Helga,  já,  ég er með færeysku húfuna.  Ég reiknaði með að flestar spurningarnar myndu snúast um færeyska músík og vildi vera í rétta gírnum.  Færeyingar setja ennþá upp svona húfu við hin ýmsu tækifæri.  Þegar tilefnið er ánægjulegt er húfan rauð.  Þegar tilefnið er dapurlegt er húfan blá. 

[Jens Guð, 14.8.2013 kl. 12:07]

  Tobbi,  það er rétt.  Skeggið er virðulegra. 

[Siggi Lee Lewis, 14.8.2013 kl. 20:48]

Mér finnst glasið hans Sigga Hlö virðulegra en jakkagötin hans. Og líka gleraugun hans Hebba flottari en hárið hans

[Steingrímur Helgason, 14.8.2013 kl. 21:57]

Zpúrdi kann zitt 'eightíz'. tja & zixtíz & zewentíz líka ef út í þá á er zkundað kúta- & korklauzt.
Ólíkindalega gaman að þú takir þátt í að endurupplifa 'dizkóið' félagi vænn.

Flottur með húfuna.

[Jens Guð, 14.8.2013 kl. 22:25]

  Ziggy Lee,  þetta er allt flott. 

[Jens Guð, 14.8.2013 kl. 22:26]

  Steingrímur minn,  ég er úti á túni þegar röðin kemur að diskóinu.  En ég samþykki að færeyska húfan sé flott. 

[Siggi Lee Lewis, 15.8.2013 kl. 04:47]

Húfan er flottari en diskóið!

[Guðmundur Bjarnason (IP-tala skráð) 15.8.2013 kl. 10:56]

Sæll Jens.

[Guðmundur Bjarnason (IP-tala skráð) 15.8.2013 kl. 10:59]

Sæll Jens.
Ertu nokkuð að fela þeð að þú ert að vaxa uppúr hárinu?
Hreint engin skömm að slíku.

Takk fyrir skemmtileg skrif.

Kveðja,

[Jens Guð, 15.8.2013 kl. 20:29]

  Ziggy Lee,  húfan er flottust.

[Jens Guð, 15.8.2013 kl. 20:31]

  Guðmundur,  nei,  það er enginn feluleikur í gangi.  Hárið er tekið að þynnast.  En ekkert frekar á hvirflinum. 

[sæunn g (IP-tala skráð) 25.8.2013 kl. 15:30]

þrælfinir þættir passlega hallærislegir til að maður geti hlegið ;)   hlakka til að sjá ykkur meistarana 

[Jens Guð, 25.8.2013 kl. 18:20]

  Sæunn,  ég á eftir að sjá þessa þætti.