Auðlærðar aðferðir til að lesa í veðrið

  Stöðug vætutíðin í vor og sumar hefur slævt tilfinningu Íslendinga fyrir veðrinu.  Veðrið er alltaf eins.  Við erum hætt að hugsa út í það.  Hætt að spá í veðrið.  Hætt að tala um veðrið.  Veðrið er bara þarna.  Alveg eins og í gær.  Alveg eins og í síðustu viku.  Alveg eins og í síðasta mánuði.  Alveg eins og í allt sumar. 

  Þetta er hættuleg staða.  Ef að skyndilega hitnar í veðri og enginn tekur eftir því er næsta víst að illa getur farið.  Til að forðast hættuna er ástæða til að hafa augun hjá sér.  Skima stöðugt allt í kringum sig.  Reyna að koma auga á vísbendingar.  Það er auðveldara en halda má í fljótu bragði.  Þumalputtareglan er að læra utan að eftirfarandi atriði:

  Tekur vodkaglasið úti á veröndinni skyndilega upp á því að halla undir flatt?   Svoleiðis hendir í heitu veðri.  Einkum ef um plastglas er að ræða. 

  Liggur umferðarkeilan í götunni eins og sprungin blaðra?  Gáðu að því.  Kannski er þetta húfa sem álfur hefur týnt.  Ef þetta reynist vera umferðarkeila er heitt í veðri.

  Sjást fuglar aðeins í skugga?  Hvergi annarsstaðar?  Þá er heitt.

  Liggur hálfsofandi dýr ofan í vatnsskálinni á veröndinni?  Ef að dýrið harðneitar að yfirgefa vatnsskálina má reikna með að heitt sé í veðri. 

  Liggur hesturinn ofan í vatnsbalanum sínum?  Það gerir hann bara í heitu veðri.

  Leka spaðarnir á loftkælingunni niður?  Það er ekkert flott.

Athugasemdir

[Jósef Smári Ásmundsson, 25.8.2013 kl. 17:32]

Þegar ég er orðinn allt of máttfarinn til að veltast um af hlátri yfir þessum myndum(sérstaklega hestinum),ja þá er sko orðið verulega heitt hjá mér.En það eru nú bara 24 gráður ennþá hérna í Noregi.

[Helga Kristjánsdóttir, 26.8.2013 kl. 03:00]

Svo er það kuldinn maður; "Frýs í æðum blóð” þá er verulega kalt,konur segja þetta oft er þær lýsa ótta sínum við eitthvað.

[Hörður Björgvinsson (IP-tala skráð) 26.8.2013 kl. 08:21]

Allt eru þetta góðar vísbendingar um veður, en óþarflega flóknar.  Allt sem maður þarf er veðursteinn, eins og þann sem hangir í spotta austur á Sólheimum í Grímsnesi.  Þeir sem hafa lært á steininn sjá eftirfarandi:

1.     Ef steinninn er blautur er rigning.

2.     Ef steinninn er þurr er ekki rigning

3.     Ef skuggi er af steininum þá er sólskin

4.     Ef steinninn sveiflast til og frá þá er vindur

5.     Ef steinninn er hvítur að ofan þá er snjókoma

6.     Ef steinninn hoppar upp og niður þá er jarðskjálfti

7.     Ef þú sérð ekki steininn þá er annaðhvort myrkur eða honum   hefur verið stolið.

3.     Ef steinninn sveiflast í spottanum er vindur

[Sigurður I B Guðmundsson, 26.8.2013 kl. 12:10]

Vá, þetta hefði ég ekki fattað og þó kannski nr. 7.

[Jens Guð, 26.8.2013 kl. 12:49]

  Jósef,  assgoti er veðrinu misskipt á milli frændþjóðanna.

[Jens Guð, 26.8.2013 kl. 12:50]

  Helga,  góður punktur.

[Jens Guð, 26.8.2013 kl. 12:51]

  Hörður,  þetta er frábær leiðarvísir.  Ég er viss um að Veðurstofan noti svona stein.

[Jens Guð, 26.8.2013 kl. 12:52]

  Sigurður I.B.,  ekki var ég búinn að fatta þetta.  Ekki einu sinni nr. 7.  Þetta sannar að alla ævina er maður að læra veðurfræði.