Glæsilegur pakki

 

   Bæði erlendis og hérlendis höfum við ótal oft orðið vitni að því að hljómsveitir eða einstaklingar verði ofurvinsælar stjörnur um hríð en fatist flugið og endi í geymslu hjá tröllum.  Bubbi er augljóst dæmi.  Hann flaug með himinskautum á níunda áratugnum.  Plötur hans seldust í um og yfir 20 þúsund eintökum.  Hann naut ofurvinsælda og virðingar.  Rödd hans hafði vægi.  Í dag seljast nýjar plötur frá honum ekki neitt.  Þrátt fyrir að plöturnar séu spilaðar grimmt í aðal útvarpsstöð Jóns "Baugs" Ásgeirs,  Bylgjunni.  Eða kannski að hluta einmitt þess vegna.  Eða eitthvað.

  Aðrir eiga langan farsælan feril sem hvergi sér fyrir enda á.  Raggi Bjarna er dæmi um það.  Annar til er Herbert Guðmundsson,  Hebbi.  Hann hefur í meira en fjóra áratugi verið áberandi í tónlistarsenunni.  Á áttunda áratugnum söng hann með helstu rokksveitum landsins.  Allt frá Tilveru og Eik til Pelicans og Kan.  Um miðjan níunda áratuginn kom hann fram með eitt sívinsælasta lag íslensku rokksögunnar,  ofursmellinn Can´t Walk Away.  Þar var ekki látið staðar numið.  Fjöldi annarra smella fylgdu í kjölfarið - alveg fram á þennan dag:  Svaraðu,  Hollywood,  Eilíf ást,  Time,  Vestfjarðaróður...   

  Hver ný plata með Hebba selst í 5 - 6 þúsund eintökum.  Nýjasta platan er glæsilegur pakki.  Hún heitir  Flakkað um ferilinn.  Þetta er yfirlitsplata með tuttugu af hans vinsælustu lögum.  Með í pakkanum eru tuttugu myndbönd á DVD.  Þar af meirihlutinn tekinn upp á hljómleikum.  Í veglegum umbúðum er að finna fjölda skemmtilegra ljósmynda af Hebba allt frá barnsaldri og unglingsárum í bland við nýjar og nýlegar.

  Pakkann má panta á www.herbert.is/verslun eða kaupa í næstu plötubúð.  

 

Athugasemdir

[Grrr (IP-tala skráð) 18.1.2014 kl. 12:55]

Það er dularfullt hvað niðurhalið bitnar bara á Bubba.

Kannski eru aðdáendur hans sérstaklega blankir og/eða með verra siðferði en aðdéndurnir hjá hinum listamönnunum, sem að selja vel.

Ásgeir, Mugison, Lay Low, Mammút... virðast höfða einungis til þeirra sem að enn kaupa geisladiska og borga fyrir niðurhal.