Lulla frænka forðaði sér

  Eins og áður hefur komið fram í upprifjun minni af Lullu frænku þá var hún dugleg að heimsækja systkini sín.  Þau bjuggu öll á Norðurlandi en Lulla í Reykjavík.  Í heimsóknum sínum norður til systkinanna dvaldi Lulla vikum saman á hverjum bæ.  Öllum til mikillar gleði og ánægju.  Lulla var svo skemmtileg.  

  Norðurreisa Lullu fékk óvæntan endi eitt sumarið.  Hún mætti til bróðir síns að kvöldi dags.  Er leið að háttatíma gekk heimilisfólkið og Lulla til hvílu.  Morguninn eftir var Lullu og bíl hennar hvergi að finna.  Á þessum árum var símasamband með öðru sniði en í dag.  Aðeins var möguleiki á að hringja út fyrir sína sveit í einn eða tvo klukkutíma snemma morguns og eða að kvöldi til.  Um kvöldið var gerð tilraun til að hringja í síma Lullu í Reykjavík.  Hún svaraði.  Sagðist hafa vaknað óvænt snemma nætur.  Þá mundi hún skyndilega eftir því að hestalest átti að fara úr Reykjavík norður í land einhverja næstu daga.  Lullu hugnaðist ekki að lenda inni í hestaþvögu.  Hún spratt þegar í stað á fætur,  rauk út í bíl og brunaði suður til Reykjavíkur - án þess að kveðja kóng né prest eða skilja eftir sig orðsendingu.  Mikilvægara var að komast hjá hestaþvögunni.    

  Nú leita ég til þín,  kæri lesandi,  eftir hjálp við að staðsetja hestalestina - upp á seinni tíma sagnfræði (Bókaforlag hefur óskað eftir því að fá að gefa út sögurnar af Lullu frænku í bókarformi).  Þetta var einhvern veginn þannig að hestalest flutti póst á milli landshluta af einhverju sérstöku tilefni.  Frímerkjasafnarar sættu lagi,  sendu póst og náðu þar póststimpli sem aðeins var notaður í þessari einu póstlest.   

------------

Fleiri sögur af Lullu frænku: http://jensgud.blog.is/blog/jensgud/entry/1360372/

        

Athugasemdir

[Árni Gunnarsson, 7.3.2014 kl. 22:16]

Landsmót á Vindheimamelum sumarið 1974. Man ekki í svipinn hvað pósturinn hét.

[Árni Gunnarsson, 7.3.2014 kl. 22:26]

Farið frá Reykjavík 3. júlí og komið á Vindheimamela 14, júlí. Forgöngu höfðu hestamenn úr Kópavogi og  Kjósarsýslu.

Þarna fóru 6 reiðmenn undir forystu Þorláks Ottesen verkstj. sem um skeið var formaður Hestamannafél. Fáks í Reykjavík. 20 hestar með koffort undir bréfapóst (stimpluð umslög). Allt samkvæmt fornum hefðum landpóstanna.

[Jens Guð, 7.3.2014 kl. 22:35]

  Árni,  bestu þakkir.

[María (IP-tala skráð) 8.3.2014 kl. 13:47]

Þess ber einnig að nefna að þeir seldu líka takmarkað magn af umslögum sem voru svo send með, bæði var hægt að senda sín eigin umslög sem voru stimpluð og líka umslög sem eru mjög spes, en þau eru með mynd af hestalest, og neðst á þeim stendur "Pósthestaferð Reykjavík - Vindheimamelar 1974" og þar fyrir aftan er svo númer bréfsins.

Ég á 3 umslög sem voru send með þessari ferð sem ég erfði eftir ömmu mína og eitt þeirra er með áletrun til hennar en hin voru stimpluð á vindheimamelum bara upp á gamanið.

[Hrólfur Þ Hraundal, 8.3.2014 kl. 14:25]

Hún hefur verið snarráð hún frænka þín engu síður en hún frænka þín Anna á Hesteyri.  Hvernig voru þær skildar og þekktust þær?  

[Ásthildur Cesil Þórðardóttir, 8.3.2014 kl. 14:54]

Virkilega gaman að þessum sögum um Lullu frænku.

[Jens Guð, 8.3.2014 kl. 18:47]

  María,  takk fyrir innleggið.

[Jens Guð, 8.3.2014 kl. 18:58]

  Hrólfur,  Anna frænka og Lulla frænka voru ekki skildar.  Anna og móðir mín voru bræðradætur.  Lulla var föðursystir mín.  Ég veit ekki til þess að Anna og Lulla hafi hist.  Þær vissu samt áreiðanlega af hvor annarri. 

[Jens Guð, 8.3.2014 kl. 18:59]

  Ásthildur Cesil,  það er gaman að heyra þetta.  Takk fyrir það.

[Jósef Smári Ásmundsson, 8.3.2014 kl. 20:51]

Heyrðu Stjáni minn.Ekkert skyldar ,segurðu.En voru þær ekki báðar frænkur?Nú,þá hafa þær verið frænkur.

[Jens Guð, 8.3.2014 kl. 21:51]

  Jósef,  allir Íslendingar eru skyldir.  Frænkur jafnt sem frændur. 

[Jósef Smári Ásmundsson, 9.3.2014 kl. 09:56]

Nokkuð til í því,frændi.