Jólasveinar

  Ég skrapp í Bykó í gær og smakkaði þar á glæsilegu jólahlaðborði.  Það er tvöfalt girnilegra en jólahlaðborð Húsasmiðjunnar.  Samt 190 kr. ódýrara.  Þar sem ég sat í rólegheitum - snæddi hangikjöt og maulaði laufabrauð með - gekk ungt par framhjá ásamt lítilli stelpu.  Sú var á að giska 2ja eða 3ja ára.  Hún snarstoppaði við hliðina á mér,  benti vísifingri á mig og kallaði hátt til mömmu sinnar:  "Sjáðu!"  Mamman fór að hlæja og dró stelpuna frá mér.  Ég heyrði þær nefna jólasveininn.  

  Fólkið settist við borð skammt frá.  Stelpan var sett í háan barnastól.  Hún tók varla augun af "jólasveininum".  Ég glotti til hennar.  En hún starði alvörugefin og undrandi á mig.  Eins og hún væri hissa á að sjá jólasveininn.

  Þetta er hvorki í fyrsta né síðasta sinn sem börn taka mér sem jólasveini eftir að skeggið á mér hvítnaði.  Fyrir nokkrum árum gerði systir mín sér áramótaferð úr sveitinni til Reykjavíkur.  Með í förum var um það bil 4ra ára sonur hennar.  Sá hafði ekki áður séð mig.  Ég kíkti til þeirra.  Hafði ekki verið þar lengi þegar sími systur minnar hringdi.  Strákurinn svaraði.  Eldri bróðir hans var á línunni.  Sá yngri hóf samtalið með því að segja:  "Jólasveinninn þekkir mömmu.  Hann er í heimsókn hjá okkur!"  

 

----------------------------------------------------

Íslenska jólatréð tekur sig vel út í Þórshöfn í Færeyjum:

 

 

     

Föndurdagatal Hurðaskellis og Skjóðu

Athugasemdir

[Sigurður I B Guðmundsson, 1.12.2014 kl. 19:52]

Nú komsr loksins upp um þig!!!!

[Jens Guð, 1.12.2014 kl. 21:51]

  Sigurður IB,  ég hef aldrei svarið af mér að vera jólasveinn.  

[Sigurdur Hermannsson (IP-tala skráð) 2.12.2014 kl. 10:20]

Gledileg jol Jens og takk fyrir pistlana thina a arinu.

Siggi Lebanon.

[Ásthildur Cesil Þórðardóttir, 2.12.2014 kl. 12:18]

Þú ert örugglega flottur jólasveinn Jens minn, sá reyndar annan svona í Samkaup í gær, og einmitt litla stúlku með ömmu sinni, hún benti og starði á karlinn, hún var samt mest hissa á því að hann hafði bundið skeggið í tagl.  

[Jens Guð, 2.12.2014 kl. 20:16]

  Siggi,  eigðu sömuleiðis gleðileg jól. 

[Jens Guð, 2.12.2014 kl. 20:19]

  Ásthildur Cesil,  takk fyrir það.  Ég ætla að kaupa mér jólasveinahúfu á morgun til að skerpa á stemmningunni þegar ég er á röltinu.

[Jack Daniel's, 11.12.2014 kl. 17:40]

Frábær færsla og ég efast ekki um að börnin sem mæta þér fá ekta jólasveinaviðmót.
Nú er bara að æfa vel og vendilega hið fræga "Hó, hó, hó".

[Ásthildur Cesil Þórðardóttir, 11.12.2014 kl. 22:32]

Endilega, frábær hugmynd Jens . 

[Jens Guð, 11.12.2014 kl. 23:22]

  Jack,  ég er þegar byrjaður að æfa:  "Hó, hó, hó!"

[Jens Guð, 11.12.2014 kl. 23:23]

 Ásthildur Cesil,  ég tek þetta alla leið með barnabörnin.  

[Ásthildur Cesil Þórðardóttir, 12.12.2014 kl. 10:03]

Þú ert flottur. 

[Jens Guð, 12.12.2014 kl. 21:43]

:)