Jón Þorleifsson og slagsmál

 

 

 

 

 

 

 

 

 

 

 

 

 

 

 

   Jón Þorleifsson,  verkamaður og rithöfundur,  var mikil barnagæla.  Sjálfur eignaðist hann engin börn.  Hann var einhleypur alla ævi.  Börn löðuðust að Jóni.  Hann kom fram við þau eins og jafningja og gat endalaust leikið við þau.  Þó að hann væri orðinn háaldraður þá lét hann sig ekki muna um að velta sér um gólf eða skríða á fjórum fótum þegar það hentaði leiknum.  Synir mínir og systkinabörn mín elskuðu Jón.  Það var ætíð fagnaðarfundur þegar Jón kíkti í heimsókn.  Skipti þá engu máli þó að hann kæmi stundum dag eftir dag. 

  Einhverju sinni var leikurinn þannig að litlir plastkallar voru látnir slást.  Hvort að þeir hétu Action Man,  He-Man,  Hulk eða eitthvað annað.  Synir mínir stýrðu sitthvorum plastkallinum.  Jón þeim þriðja.  Hans kall var fyrst og fremst í því hlutverki að verja sig í stað þess að sækja fram.  Sennilega var það þess vegna sem sonur minn spurði Jón:  "Hefur þú aldrei verið í slagsmálum?"

  Jón svaraði strangur á svip:  "Nei,  aldrei.  Ég hef óbeit á öllu ofbeldi.  Slagsmál eru andstyggð!"

  Ég blandaði mér í umræðuna.  Sagðist hafa heyrt af slagsmálum Jóns við nasista á Eyrarbakka eða þar um slóðir.

  Jón spratt á fætur og andlitið ljómaði við upprifjunina.  Hann lagði handarbakið á barkann á sér og sagði hróðugur:  "Ég sló nasistann með spýtu af alefli á barkann.  Hann steinlá og var ekki til frekari stórræða þann daginn!"

__________________________________________

Fleiri sögur af Jóni:

http://jensgud.blog.is/blog/jensgud/entry/1409699/

Athugasemdir

[Stefán (IP-tala skráð) 4.12.2014 kl. 08:32]

Ég hef lesið bækur eftir umræddan mann og tók eftir því að honum var tíðrætt um spillingu hér á landi. Hann hafði svo sannarlega rétt fyrir sér, því að nú er búið að upplýsa það, að á Íslandi er spilltasta stjórnkerfi á Norðurlöndunum enda er Framsóknarflokkurinn bara til á Íslandi.

[agust hrobjartur runarsson (IP-tala skráð) 4.12.2014 kl. 21:20]

alltaf jafn gaman að heyra sögurnar frá þér! eg tek alltaf minn daglega rúnnt jens,og fréttaveiturnar  þurfum að hittast við tækifæri kv gústi

[Jens Guð, 4.12.2014 kl. 23:12]

  Stefán,  gagnrýni JÞ á spillingu og símahleranir voru ekki út í hött.  Tíminn hefur leitt það í ljós.  Hann mátti oft sæta því að vera sakaður um ofsóknarkennd.  

[Jens Guð, 4.12.2014 kl. 23:13]

  Ágúst,  takk fyrir það.  Finnum endilega kvöldstund yfir bjórglasi með Danna,  kannski á Classic Rock.