Alltaf markaður fyrir spennandi tónlist

 

  Á allra síðustu árum hefur sala hérlendis á plötum einstakra listamanna verið ævintýraleg. Svo dæmi sé tekið þá hafa stakar plötur með Mugison og Ásgeiri Trausta selst í 30 - 40 þúsund eintökum á útgáfuári.  Eða því sem næst.  

  Nú stefnir ný plata með rapparanum Gísla Pálma í gull.  Á útgáfudegi mynduðust biðraðir við plötubúðir.  Slíkur var ákafinn í plötuna.

  Það vekur athygli að plötukaupendurnir eru unga kynslóðin.  Fólk sem ólst ekki upp við vinylplötur í 12" formi.  Fólk sem neytir tónlistar í stórum stíl með því að spila hana á netsíðum á borð við spotify.com og youtube.com.  

  

  Fyrir nokkrum áratugum var fátt í boði annað en kaupa vinylplötur.  Fyrir kaup hafði kaupandinn ekki heyrt nema eitt eða tvö lög af plötunni.  Stundum ekkert lag.  Platan var keypt út á að önnur plata með sama flytjandi hljómaði vel.  Oft urðu menn fyrir vonbrigðum með nýju plötuna sína.  Það skipti flytjandann ekki máli.  Hann var búinn að selja plötuna sína.

 

  Í dag kaupa menn ekki lengur köttinn í sekknum. Sala á óspennandi tónlist hefur hrunið við þessar breyttu aðstæður.  Það veldur því að heildarsala á tónlist hefur dalað.  Það er eðlilegt.  Góðu fréttirnar eru þær að spennandi plötur seljast sem aldrei fyrr.  

 

      

Athugasemdir

[Stefán (IP-tala skráð) 29.4.2015 kl. 08:22]

Eitthvað við Gísla Pálma sem minnir á Bubba á meðan var og hét. Vonandi að hann dagi ekki líka upp í voluðu skallapoppi og jeppaauglýsingum.

[jon (IP-tala skráð) 29.4.2015 kl. 08:41]

Óli Palli hefði nú alveg mátt leiðrétta helstu rangfærslur viðmælanda síns í þessu viðtali. Að "enginn hafi þorað að segja frá þessu", er auðvitað hlægileg vitleysa, því það hefur einmitt um fátt annað verið talað síðasta áratuginn en einmitt þetta; unglinga á glapstigum, fíkniefnaneyslu úrræðaleysi o.s.frv. Tónlistarmaðurinn er ca 10 árum á eftir umræðunni en áttar sig ekki á því  - sennilega vegna þess að þegar hann var í ruglinu, þá fylgdist hann ekki með umræðunni.

Síðan hefði Óli Palli mátt leiðrétta það komment að "þessi veruleiki sé eitthvað sem gamla kynslóðin þekkir ekki". Nú er það þannig að allir þessir hlutir sem nefndir eru í textabrotinu, hömluleysi, kærur, handjárn, ofbeldi, osfvr. var snar þáttur í mjög róstusömu lífi í bæjum og þorpum víðast um landið, en þetta er veruleiki sem unga kynslóðin, þar á meðal Gísli Pálmi, þekkir ekki. Hann talar mannalega og lætur sem gamla kynslóðin sé reynslulaus. Ef drengurinn fengi smánasaþef af því sem viðgekkst t.d. á Siglufirði á Síldarárunum, þá myndi hann staldra við. En rapparinn er ungur og vitlaus, í góðlátlegri merkingu orðsins. Hann hefur ekki talað við gamla lögreglumenn sem vitna um skelfilega hluti sem urðu á tímum afa og ömmu. Í raun er rapparinn ekki að segja neitt nýtt, en það er þannig með ungt fólk að það hefur vanalega lítinn áhuga á öðru en sjálfu sér og þess vegna skortir það afl til að sannreyna sínar eigin staðhæfingar um lífið fyrr og nú.

[Jens Guð, 30.4.2015 kl. 21:13]

  Stefán,  Gísli Pálmi er til alls líklegur.

[Jens Guð, 30.4.2015 kl. 21:15]

  Jon,  ég tók því þannig að drengurinn væri að tjá sig um íslensku rappsenuna en ekki alla dægurlagasöguna frá árdaga rokksins á sjötta áratugnum.